Ձմեռային Օլիմպիական խաղեր-2018. քաղաքական հանդիպումներից մինչև Դոնալդ Թրամփի և Կիմ Չեն Ինի հանդիպումը

Փետրվարի 9-ին հարավկորեական Փհենչհան քաղաքում մեկնարկել են 2018թ. ձմեռային Օլիմպիական խաղերը: Այս տարի խաղերն իրենց վրա են գրավել ոչ միայն մարզասերների ուշադրությունը: Ողջ աշխարհն ուշի ուշով հետևում է նաև Փհենչհանում ծավալվող քաղաքական զարգացումներին: 2018թ. ձմեռային Օլիմպիական խաղերը հաճախ անվանում են «Խաղաղության օլիմպիադա», քանի որ հենց այս խաղերի շնորհիվ երկու Կորեաների միջև հարաբերությունների փոքր-ինչ ջերմացում է նկատվում:  

Հյուսիսային Կորեան Փհենչհան է ուղարկել շուրջ 500 հոգու: Իսկ 22 մարդուց կազմված բարձրաստիճան պատվիրակության կազմում են Հյուսիսային Կորեայի պաշտոնական ղեկավարը՝ Բարձրագույն ժողովրդական ժողովի նախագահության ղեկավար Կիմ Յոն Նամը, ինչպես նաև երկրի ղեկավար Կիմ Չեն Ինի կրտսեր քույրը՝ Կիմ Յո Չժոնը: 

Փետրվարի 10-ին Կորեայի Հանրապետության նախագահ Մուն Չժե Ինը հանդիպում է ունեցել Փհենյանի պատվիրակության հետ: Այս հանդիպումը կարելի է անվանել պատմական, քանի որ 2007-ից ի վեր սա երկու երկրների ղեկավարության առաջին հանդիպումն է: Բացի այդ, առաջին անգամ Հարավային Կորեայի հետ սահմանը հատել է Հյուսիսային Կորեայի ղեկավարի ընտանիքի անդամը: Մուն Չժե Ինն իր հյուրերին ընդունել է նախագահական պալատում: Հանդիպումը տևել է մոտ 3 ժամ: Հանդիպումից հետո հարավկորեական ղեկավարի վարչակազմի ներկայացուցիչը լրատվամիջոցներին հայտնել է, որ Հյուսիսային Կորեայի ղեկավար Կիմ Չեն Ինը Հարավային Կորեայի նախագահ Մուն Չժե Ինին մոտ ժամանակներս հրավիրել է Փհենյան: Կիմ Չեն Ինի բանավոր հրավերը փոխանցել է նրա քույրը: Ի պատասխան այս հրավերի՝ Մուն Չժե Ինը խոստացել է Փհենյան այցելել բոլոր անհրաժեշտ պայմանները ստեղծելուց հետո:

Ընդհանրապես Մուն Չժե Ինը բավական լարված գրաֆիկով է աշխատում: Օլիմպիական խաղերի բացման օրը նա մի շարք հանդիպումներ է ունեցել, այդ թվում՝ Ճապոնիայի վարչապետ Շինզո Աբեի, Նիդերլանդների վարչապետ Մարկ Ռյուտեի, ՄԱԿ-ի գլխավոր քարտուղար Անտոնիու Գուտերիշի հետ: Վերջինս նշել է, որ չնայած Օլիմպիական խաղերը շատ կարևոր են, սակայն իր այցի հիմնական պատճառը Հարավային Կորեային իր աջակցությունը հայտնելն է: Կողմերը նաև ընդգծել են, որ Օլիմպիական խաղերի ընթացքում երկու Կորեաների երկխոսությունը պետք է նպաստի երկխոսությանը Վաշինգտոնի և Փհենյանի միջև: Սակայն Վաշինգտոնը, կարծես, այդքան էլ մեծ նախաձեռնություն չէր դրսևորում այս երկխոսության կայացման հարցում: ԱՄՆ փոխնախագահ Մայք Փենսը խաղերի բացման արարողությանը նախորդող ընդունելությանը ներկա է գտնվել  ընդամենը հինգ րոպեով: Փենսը պետք է նստեր Հյուսիսային Կորեայի պաշտոնական ղեկավար Կիմ Յոն Նամի դիմաց, սակայն նա բաց է թողել ճաշը:

Քաղաքական և մարզական իրադարձություններից բացի, Օլիմպիական խաղերի կազմակերպիչների գլխավոր խնդիրներից է մարզիկների և հանդիսատեսի անվտանգության ապահովումը: Ներկայումս սպառնալիքները միայն ցամաքից չեն սպասվում: Հնարավոր սպառնալիքների ցանկում են նաև հարձակումները անօդաչու թռչող սարքերի կողմից: Դրանց դեմ Հարավային Կորեան անվտանգության հատուկ միջոցառումներ է ձեռնարկել՝ գործի դնելով «անօդաչու թռչող սարքեր որսացող ԱԹՍ-ներ»:

Ինչ վերաբերում է Օլիմպիադայի կիբերանվտանգությունը, ապա դա պաշտպանելն այնքան էլ լավ չհաջողվեց: Խաղերի բացման արարողության ժամանակ սերվերների վրա կիբերհարձակում է տեղի ունեցել, որի հետևանքները հաջողվել է վերացնել միայն հաջորդ առավոտյան:

Սակայն Օլիմպիական խաղերի բացման շքեղ արարողության ժամանակ զվարճալի պահեր նույնպես եղել են: Մարզադաշտում են հայտնվել Հյուսիսային Կորեայի ղեկավար Կիմ Չեն ինի և ԱՄՆ նախագահ Դոնալդ Թրամփի նմանակները: Սակայն կազմակերպիչները նրանց շատ արագ դուրս են հրավիրել: