2021-ին Շիրակի մարզում 22 մլրդ դրամի ճանապարհաշինական աշխատանքներ են կատարվել

Անցնող տարում Շիրակի մարզում շուրջ 22 մլրդ դրամի ճանապարհաշինական աշխատանքներ են կատարվել։ Այս հաշվարկն ընդգրկում է միջպետական, հանրապետական, միջմարզային ու տեղական նշանակության ճանապարհահատվածների հիմնանորոգումը, «Հյուսիս-հարավ» արագընթաց մայրուղու Շիրակի մարզի հատվածի կառուցումը և Գյումրիի փողոցաշինական մեծ ծրագրի շարունակությունը։

Կան նաև փոխանցիկ ճանապարհահատվածներ, որոնց վերանորոգման նախագծերը կազմվել են, որոշակի հողային աշխատանքներ կատարվել են, բայց բուն շինարարությունը կկատարվի 2022-ին։

Վարդաքար-Այգաբաց-Արևիկ ճանապարհը 3 գյուղերը կապում է մարզկենտրոն Գյումրիի հետ։ Խորհրդային տարիներին է կառուցվել՝ որպես այլընտրանք Երևան-Գյումրի մայրուղուն։ Այստեղով ճանապարհը դեպի Գյումրի ավելի կարճ է։ Բայց կարճ ուղին անցնելն ավելի երկար է տևում ճանապարհի քայքայված լինելու պատճառով։ Վարդաքարից Այգաբաց 5,7 կմ է։

Այս ճանապարհը 80-ականներին է նորոգվել, հետո ընդամենը մեկ անգամ փոսալցում են կատարել՝ այն էլ խիճով, որն առաջին իսկ անձրևը լվացրել-տարել է։ Հետո հաջորդել են ճանապարհը հիմնանորոգման ծրագրերում ընդգրկելու անարդյունք դիմումները մինչև 2020 թվականը, երբ Վարդաքար-Այգաբաց ճանապարհի հիմնանորոգման համար ֆինանսավորում է հատկացվել։

Նախագիծն անցած տարի է կազմվել, մրցույթն այս տարվա աշնանն է կայացել։ Շինարարը հասցրել է հին ասֆալտաշերտը քանդել ու հեռացնել, նաև հարթեցումներ կատարել։ Բուն ճանապարհաշինական աշխատանքները հաջորդ տարում են նախատեսված։

Վարդաքար-Այգաբաց հատվածը մեկն է այն 3 ճանապարհներից, որոնց նորոգումն այս տարի է սկսվել ու փոխանցվել հաջորդին։ Մարզպետարանի քաղաքաշինության վարչության պետն է նշում՝ պայմանագրային պարտավորություններով այդ ճանապարհահատվածների նորոգումը փուլային է լինելու։

Ընդհանուր հաշվով՝ այս տարի մարզում 67 կմ ճանապարհ է նորոգվել։ Այս հաշվարկում է Գյումրի-Արմավիր մայրուղու Ղարիբջանյանի հատվածը, Գյումրի-Բավրայի 4 կմ ճանապարհահատվածը, Պեմզաշեն-Արթիկը։ Առանձին հաշվարկով նաև «Հյուսիս-հարավ» արագընթաց մայրուղու Շիրակի մարզի բաժինն է, որտեղ այս տարի միակողմանի երթևեկելի դարձավ որոշակի հատված։

«Շիրակի մարզի Հյուսիս-հարավ ճանապարհի մեկ երթևեկելի մասի ծրագիրը որոշակի արդեն պատրաստ է, մոտ 75 %-ոց երթևեկության ճանապարհ ունենք։ Հաջորդ տարի ավելի ինտենսիվ կիրականացվեն աշխատանքները, քանի որ այս տարի նոր ասֆալտբետոնի գործարան տեղադրվեց չինական ընկերության կողմից։ Կփորձեն, ինչպես խոստացել են, 2023 թվականին ամբողջությամբ մեր հատվածն ավարտել։ Մեր մարզի հատվածը հասնում է մինչև Արևիկ-Այգաբաց-Ազատանի խաչմերուկ»,- SHANTNEWS-ին ասել է Շիրակի մարզպետարանի քաղաքաշինության վարչության պետ Խաչատուր Խնձրցյանը։

23 փողոցներ Գյումրիում ՎԶԵԲ ծրագրով են հիմնանորոգվել։ Հաջորդ տարվա է փոխանցվել 3 փողոց։ Եվս 8 փողոցների և կենտրոնական հրապարակի նորոգումը սուբվենցիոն ծրագրով է կատարվել։ Հաջորդ տարում Շիրակի մարզի պետական ծրագրում ընդգրկված ճանապարհահատվածների երկարությունն ավելին է լինելու։

«2022-ին` հաջորդ տարում, մեր մարզում նախնական բյուջեով կազմված ծրագրերով կիրականացվի շուրջ 78,5 կմ երկարության միջպետական, հանրապետական և մարզային, տեղական նշանակության ճանապարհների հիմնանորոգման աշխատանքներ, որոնց նախագծային փաստաթղթերը կազմելու գործընթացն արդեն իսկ սկսվել է։ Մեկ մրցույթ արդեն կայացել է։ Դա դեպի Երերույքի տաճար տանող ճանապարհի հիմնանորոգման աշխատանքն է։ Դեռևս ամփոփվում են մրցույթի արդյունքները»,- ասել է Խաչատուր Խնձրցյանը։

Շիրակի մարզի հանրապետական ու միջպետական գրեթե բոլոր ճանապարհահատվածներն, ըստ քաղաքաշինության վարչության պետի, արդեն բարեկարգ են։ Հիմնանորոգման ենթակա ուղղությունները շատ են տեղական նշանակության ճանապարհներին։ Մարզում 495 կմ  տեղական նշանակության ճանապարհ կա, որոնց 30 տոկոսը ենթակա է հիմնանորոգման։