Գյումրիի Մարիամ և Երանուհի Ասլամազյան քույրերի պատկերասրահում կրեատիվ տոնածառերի ցուցադրություն է բացվել

Սուրբ Ծննդյան տոնի և Ամանորի խորհրդանիշը տոնական զարդարված եղևնին է, որը երկար ճանապարհ է անցել՝ մինչև մեզ հասնելը: Գերմանիային է վերագրվում Սուրբ Ծննդյան տոնի ծառի զարդարման ավանդույթի սկիզբը՝ 16-րդ դարում, երբ հավատավոր քրիստոնյաները զարդարված ծառերը բերեցին իրենց տներ: Դարերի ընթացքում տոնական ծառի զարդարման տարբերակները փոխվել են, բայց դրա խորհուրդն անփոփոխ է՝ եղևնին հարատևության ու նոր կյանքի  խորհրդանիշ է։ Նախատոնական ու տոնական օրերին Գյումրիի Մարիամ և Երանուհի Ասլամազյան քույրերի պատկերասրահում կգործի կրեատիվ տոնածառերի ցուցադրություն։ Տարբեր արվեստագետներ իրենց ստեղծագործ միտքն արտահայտել են լուսային տոնածառերով։

Պատկերասրահի մշտական ցուցադրության հետ միասին նաև տոնական ցուցադրություն է բացվել, իսկ ցուցանմուշները տոնածառերն են, բայց ոչ սովորական։ Եղևնու ձև ունեցող կոնստրուկցիաները ոչ թե տոնական  խաղալիքներով, այլ միայն լույսերով են զարդարված։ Լուսային եղևնիները տոնածառի խորհուրդն անփոփոխ են պահում, բայց ներկայանում են յուրովի։

«Ցուցանմուշներում կան տեխնոլոգիական լուծումներ՝ լուսային էֆեկտներ ենք տեսնում և տոնածառի ավանդական ձևն է։ Ոնց որ ամբողջ աշխարհն է երկրաչափական պատկերներով կազմված, դա շրջանն է, քառակուսին, տարածական գունդն ու խորանարդը, այնպես էլ այստեղ եռանկյունու միջոցով տեսնում ենք աշխարհաստեղծման խորհուրդը։ Տեխնոլոգիան խորհրդանշում է նոր սերունդը, արվեստը՝ հինը։ Ոչ թե տարանջատում ենք, այլ միահամուռ ձևով ենք ներկայացնում։ Սա ժամանակի հրամայականն է՝ ընթանալ համահունչ, ապրել, վերստեղծել և նորովի ամեն ինչին վերաբերել»,- SHANTNEWS-ին ասել է Գյումրիի Մարիամ և Երանուհի Ասլամազյան քույրերի պատկերասրահի էքսկուրսավար Գոհար Սմոյանը։

Գրեթե բոլոր տոնածառերի պատրաստման ու զարդարման հումքը ապակին ու լույսերն են։ Լույսը արվեստագետների համար գույն է, ապակին՝ այդ գույները կրկնապատկելու ու եռապատկելու հնարավորություն տվող միջոց։ Ապակու վրա լույսի պրոյեկցիայի շնորհիվ տոնականությունը ցուցասրահներում ավելացել է:

Արվեստագիտական մտքի արտահայտություն է նաև ցանկությունների տոնածառը, որը մյուս ցուցանմուշներից տարբերվում է սրանով, որ լույսեր չկան։ Պոլիէթիլենային թաղանթից պատրաստված տոնածառը զարդարված է ու շարունակում է զարդարվել մարդկանց ցանկություններով։ Պատկերասրահի այցելուներն իրենց ամանորյա մաղթանքներն են այստեղ գրում։

«Կարծես թափանցիկ եղևնի է կամ թափանցիկ սկիզբ է, որը ենթադրում է մաքուր, թափանցիկից սկսել և փորձել ապրեցնել։ Այն, ինչ գուցե վերջին շրջանում բարդ է դարձել»,- ասել է Գոհար Սմոյանը։

Պատկերասրահի տոնածառ-ցուցանմուշները դեռ ավելանալու են։ Տարբեր արվեստագետներ ու անհատներ իրենց հետաքրքիր լուծումներով եղևնիները կարող են Ասլամազյան քույրերի պատկերասրահում ցուցադրել մինչև հունվարի 13-ը։ Մինչև 30 տոնածառ է նախատեսվում ցուցասրահներում տեղադրել։ Իսկ այցելուները դրանք տեսնել կկարողանան նոր տարվա հենց առաջին օրերին։ Պատկերասրահը հունվարի 2-ից բաց է Ամանորի օրերը Գյումրիում անցկացնող հյուրերի համար։ Իսկ նրանց թիվն այս տարի, ըստ կանխատեսումների, քիչ չի լինելու։ Հյուրատներում ու թանգարաններում տոնական օրերի համար  բավական շատ ամրագրումներ կան։