Գյումրիի սելեկցիոն կայանը հողատարածքներում փորձարկում է հեղուկ և ջրալույծ պարարտանյութեր

Բարձր բերքատվություն ապահովելու համար հողի պարարտացումն անհրաժեշտ բաղադրիչ է։ Գյուղացիական տնտեսությունների համար ավանդական ու անփոխարինելի միջոցը մնում է ազոտական գրանուլացված պարարտանյութը, որը շաղ են տալիս հողի մակերեսին։ Շիրակի մարզում հեկտարներով հողերը տնտեսությունները մշակում են ազոտական պարարտանյութով, իսկ բերքատվության արդյունքները լինում են գոհացնող, եթե կարկուտն ու երաշտը չեն վնասում։ Այս տարի սակայն, հողագործների համար պարարտանյութի ձեռք բերումը մեծ խնդիրներ է ստեղծել։ Շուկայում այն թանկացել է, մեկ պարկի գին է նշվում 20 հազար դրամը։ Թանկին այլընտրանք են փնտրում, միևնույն ժամանակ չեն ուզում հրաժարվել փորձածից ու ավանդականից։ Հիմա Հայաստանում փորձ է արվում զարգացնել հեղուկ և ջրալույծ պարարտանյութերի կիրառությունը։

Ջրալույծ պարարտանյութերը ծծումբ են պարունակում, որն էլ նպաստում է բույսի ազոտի կլանմանը։ Գյումրիի սելեկցիոն կայանում ջրալույծ և հեղուկ պարարտանյութերի կիրառման փորձն ունեն, բերքի արդյունքներից էլ դժգոհ չեն, բացի ֆինանսապես մատչելի լինելուց, կիրառությունն է հեշտ։

«1 հեկտար կարտոֆիլի համար, եթե նախատեսում ես ֆոսֆորական, կալիումական և ազոտական պարատանյութեր, և պիտի օգտագործես մոտ 200կգ կալիումական, 300կգ սուպերֆոսֆատ, 400-500կգ ազոտական պարարտանյութ, էդ բոլորը միասին տոննայից ավելի է լինում։ Դրանց փոխարեն կարող ես սրանից տալ էդ մի հեկտարին ընդամենը 20-25կգ»,- ShantNews.am-ի հետ զրույցում նշել է Գյումրիի սելեկցիոն կայանի արտադրական գծով փոխտնօրեն Վասպուրական Մելիքյանը։

Անկախ պարարտանյութի տեսակից այն պետք է կիրառել հստակ պարարտացման սխեմայով։ Փորձագետները պնդում են, պարարտացումն ինքնանպատակ չպետք է լինի, նախ հարկավոր է ունենալ հողի ագրոքիմիական անալիզները, ցանքաշրջանառության առկայությունը, որից էլ պարզ կլինի տվյալ հողը ինչի պահանջ ունի։

«Պարարտանյութեր, դա չի նշանակում՝ ինչքան շատ, էդքան լավ։ Ոչ, պարարտանյութերը պետք է տալ ինչքան որ պետք է։ Շատը վնասում է»,-նշել է Գյումրիի սելեկցիոն կայանի տնօրեն Դավիթ Մարտիրոսյանը։

Ջրալույծ պարարտանյութերը կիրառելի են բոլոր մշակաբույսերի, նաև մրգատու ծառերի համար։ Դրանք պարունակում են ազոտ, ֆոսֆոր, կալիում, մագնեզիում և միկրոտարրեր, որոնք էլ բույսի աճի և բերքատվության համար կարևոր են, նմանատիպ պարարտանյութերը հնարավոր է կիրառել բույսի աճման տարբեր փուլերում։

Հեղուկ և ջրալույծ պարարտանյութեր սելեկցիոն կայանում օգտագործում են 2020 թվականից։ Փորձարկել են ինչպես հացահատիկի և հատիկ-ընդեղեն մշակաբույսերի, այնպես էլ կարտոֆիլի ցանքերում։ Ապահովված արդյունքը մասնագետները գնահատում են բավարար։ Հետազոտությունները կայանում դեռ շարունակվում են, վերջնական արդյունքներից հետո փորձագետ-գյուղատնտեսները հողագործներին և ֆերմերային տնտեսություններին նոր առաջարկներ կունենան։