Հիմնանորոգված դպրոց՝ առանց նոր գույքի․ Գյումրիի Ակադեմիական վարժարանին չի հաջողվում գույք ձեռք բերել

Սեպտեմբերից շահագործման հանձնված Գյումրիի Ակադեմիական վարժարանի հիմնանորոգված շենքում դասերը շարունակում են երկհերթ։ Պատճառը համավարակային կանոնների պահպանումը կամ տարածքային պայմանները չեն, այլ գույքի պակասն է։ Դպրոցի ունեցածը հին է և բավարար չէ  աշակերտության քանակին։ Խնդրի կարգավորման ուղղությամբ կրթության, գիտության, մշակույթի և սպորտի նախարարությունը գումարային հատկացում կատարել է, բայց գույքի ձեռքբերման համար անցկացվող մրցույթներն արդեն մի քանի անգամ է՝ չեն կայանում։

Համաշխարհային բանկի ֆինանսավորմամբ վարժարանի շենքը հիմնանորոգվեց, և 2021 թվականին վերակառուցումն ավարտվեց, կրթօջախին տրվեց շահագործման թույլտվություն։ Բայց դրանով վերջնական չկարգավորվեց կրթական հաստատության բնականոն աշխատանքը։ Վարժարանի շենքային պայմանները լիարժեք են, դասասենյակները բավարարում են եղած աշակերտական քանակին, բայց սեպտեմբերից այստեղ դասերը երկհերթ են շարունակում, աշակերտական գույքը չի բավականացնում։

30 աշակերտ ունեցող մեկ դասարանում կարող է նստել աշակերտների ուղիղ կեսը։ Նոր ու ժամանակակից լուծումներով հիմնանորոգված շենք է տեղափոխվել դպրոցի ունեցած հին գույքը, որը ոչ միայն քիչ է, նաև զգալի մաշված է: 90-ականներից օգտագործվող, մի քանի անգամ շենքից-շենք տեղափոխված գույքը անհարմար է։ Սեղան-աթոռների պակասը թույլ չի տալիս ընդարձակ դասարաններում տեղադրել աշակերտների թվով նստարաններ ու դասերն անցկացնել ամենօրյա ռեժիմով ու միահերթ։

«Եթե մենք գույք ունենայինք,  կկարողանայինք մեր դասարանի բոլոր երեխեքով դաս անեինք, իսկ հիմա կիսված ենք ու մեր վերջին տարին է, ես դրանից եմ դժգոհում, որ չենք տեսնում մեր դասընկերներին»,- նշում են վարժարանի աշակերտները։

Գույքի մի մասը կրթության նախարարությունն է տրամադրել՝ ուսուցիչների սեղանները, աթոռները, գրապահարանները, իսկ աշակերտական նստարանների ձեռք բերման համար 12 մլն դրամ է հատկացվել դպրոցին, գույքը մրցութային կարգով ձեռք բերելու համար։ Իսկ մրցույթի կազմակերպման և անցկացման պարտավորությունը, պարզվում է, դպրոցինն է։ Մինչ օրս գույքի մատակարարի 3 մրցույթ է հայտարարվել, որոնց մասնակցելու համար, սակայն, ոչ մի կազմակերպություն հայտ չի ներկայացրել։

 «Դպրոցը պետական ոչ առևտրային կազմակերպություն է, դպրոցը իրավունք ունի իր գույքի ձեռքբերման համար մրցույթ հայտարարել, էստեղ էնքան էական չէ՝ ով կանի մրցույթը, որովհետև ավելի արդյունավետ ու նպատակային կլինի հայտարարությունը, որովհետև դպրոցն ինքն ավելի լավ գիտի գույքի կարիքները, քանակը։ Նման մրցույթներ բազմաթիվ են լինում, որ դիմողներ չեն լինում, թե պատճառները որոնք են, որ չեն դիմում, չենք կարող ասել, գուցե տեղեկատվության պակասն է կամ չգիտեմ․․․ Ամեն դեպքում նոր մրցույթ կհայտարարվի այնքան, մինչև մրցույթը կայանա»,- Shantnews.am -ի թղթակցի հետ զրույցում նշել է  ՀՀ ԿԳՄՍ նախարարության հանրակրթության վարչության պետ Արսեն Բաղդասարյանը։

Վարժարանում առաջիկայում մտադիր են նորից մրցույթ հայտարարել, մինչև մարտ ամսվա վերջ գույքի խնդիրը, հույս ունեն, որ կկարգավորեն։ Դպրոցի գույքն ամբողջությամբ նորացնելու համար պահանջվում է 320 աշակերտական սեղան, 640 նստարան և 13 համակարգչային սեղան՝ իրենց աթոռներով։ Մինչ օրս վարժարանը սեփական միջոցներով կարողացել է ձեռք բերել դահլիճի աթոռները, ձայնային տեխնիկան: