Մինաս Ավետիսյանի տաք գույները ցուրտ թանգարանում. Ջաջուռի թանգարանի ջեռուցման խնդիրը չի լուծվում

Մինաս Ավետիսյանի Ջաջուռի թանգարանը շահագործման է հանձնվել 2005 թվականին։ Հայրենի գյուղում գործող թանգարանում ցուցադրվում են Երևանի պատկերասրահից բերված Մինասի գործերի մի մասը։ Կտավներ են, գրաֆիկական աշխատանքներ, գեղանկարչի թատերական դեկորացիաներ։ Բայց դրանց մի մասը, և հիմնականում յուղաներկով աշխատանքները ձմռան ամիսներին ցուցադրությունից հանվում են։ Թանգարանն այս ձմեռ էլ  ջեռուցում չունեցավ։ Գեղանկարչի որդին Արման Ավետիսյանը պատմում է, որ ջեռուցման խնդիրը թանգարանի հիմնադրման պահից սկսած եղել է։

«Ինչպես գիտեք Ջաջուռը գազաֆիկացված չէ, ինչպես նկատում եք շատ ցուրտ է և այս պայմաններում գեղանկարչական աշխատանքները ցուցադրելը խիստ վտանգավոր է։ Դրա համար մենք չենք ցուցադրում գեղանկարչական աշխատանքները»,- նշում է թանգարանի վարիչ Արման Ավետիսյանը ։

Թանգարան մուտք գործելիս անմիջապես աչքի են ընկնում հանճարեղ գեղանկարչի մայրերգության թեմայով ստեղծագործությունները, որոնք  վտանգավոր չեն ու ցուրտը չի վնասում։ Հայ մանրանկարիչ Թորոս Ռոսլինի ծնունդը, «Ցերեկ» որմնանկարները, որոնք թանգարանի արժեքավոր նմուշներից են, ևս ցածր ջերմաստիճանի պայմաններում պահպանվում են։ Մինասի մյուս բոլոր ինքնատիպ, տաք գույներով գեղանկարչական կտավները, ցուրտ ցուցասրահներից հանվել են, պահվում են ֆոնդային մասում, որտեղ հատուկ ջերմաստիճանային պայմաններ ամեն դեպքում ստեղծել են։ Հայտնի գեղանկարչի որդին՝ Արման Ավետիսյանը ափսոսում է՝ կտավները տեղափոխելիս, շարժելիս ամեն տարի վնասվում են։

«Առաջին գործոնը՝ տաք ու ցրտի առումով նկարը կախվում է, լայնանում կամ նեղանում է, ինչպես յուրաքանչյուր առարկա, եթե այդպիսի բան է տեղի ունենում, ապա ներկի շերտը սկսում է ճաքճքել և այդ ամենը շատ լուրջ վտանգ է։ Բացի դրանից, եթե խոնավ է լինում, կարող է բորբոս առաջանալ»։

Հունվար-փետրվար ամիսներին ընդամենը 30 այցելու են ունեցել։ Ամռան ամիսներին Մինասի թանգարանը դառնում է պահանջված զբոսաշրջային ուղղություններից մեկը։ Թանգարանի էքսկուրսավարն ափսոսում է, որ Մինասի շատ գործեր հնարավորություն չունի ներկայացնելու այցելուներին։ Կան աշխատանքներ, որոնք իրենց նշանակությամբ շատ կարևոր են։

«Դիպլոմային աշխատանքները Մինաս Ավետիսյանի, որոնք շատ ուշագրավ պատմություններ ունեն, շատ կուզենայի ներկայացնել, բայց իմ ցանկությունը քիչ է։ Դրանք պետք է նորմալ ջերմաստիճանում պահել ,որպեսզի փոխանցվի սերունդներին, իսկ այս պայմաններում հնարավոր չէ ցուցադրել»։

Թանգարանում արևային էներգիայով ջեռուցում ապահովելու համար Արման Ավետիսյանը մեկ տարի առաջ էր դիմել է մշակույթի նախարարություն, բայց առաջարկի հետագա քննարկում տեղի չի ունեցել ու ջեռուցման հարցը հայտնվել է փակուղում ։

«Երբ ներքին տուրիզմը սկսեց Շիրակի մարզում զարգանալ մենք ունեին 1500-2000 այցելու, և ի ուրա։ Արդեն  ցույց են տալիս այդ տվյալները, որ անընդհատ աճի տենդենց ունենք այցելուների, և բնականաբար, դա հուշում է , որ թանգարանը պետք է ունենա պայմաններ»,- ասում է Ջաջուռի թանգարանի վարիչ Արման Ավետիսյանը։

Թանգարանի աշխատակիցները ամբողջ տարին սպասել են արևային էներգիային։ Ամեն հաջորդ տարում ջեռուցման հարցը դառնում է անլուծելիներից մեկը։ Ջաջուռի թանգարանի վարիչը դարձյալ նույն բովանդակության դիմում է գրելու նախարարությանը։ Գյուղի բարձրադիր հատվածում կառուցված թանգարանի պատերը չեն տաքանում մինչև մայիս։ Այս տարի ևս տուրիստական մեծ հոսքի են սպասում։ Ամռանը նորից ցուցադրության կդրվեն ցրտի պատճառով պահված կտավները։