Սուր իշեմիկ կաթվածի անվճար բուժման ծրագիրն արդեն հասանելի է Գյումրիում

Գյումրի բժշկական կենտրոնում այսօրվանից գործում է սուր իշեմիկ կաթվածի բուժման ծրագիրը, բաժանմունքը պատրաստ է ընդունել հիվանդներին և բուժման պետական ծրագրով համապատասխան օգնություն ցուցաբերել, ինչպես դեղորայքային, այնպես էլ վիրահատական մեթոդներով։ Պետական ծրագիրը մարզերից առաջինը իրականացվում է Շիրակում։ «Գյումրի» բժշկական կենտրոնում կաթվածի բուժման ծրագրում համատեղվել են 2 նորագույն բուժումների մեթոդները՝ թրոմբոլիտիկ թերապիան և վիրահատական բուժումը։

Հայաստանում ինսուլտը հանդիսանում է մահվան հանգեցնող հիվանդություններից երկրորդ, իսկ հաշմանդամության առաջացման՝ առաջին պատճառը։ Այդ ռիսկերը նվազեցնելու համար էլ ծրագրվեց այն ներառել առողջապահության պետպատվերի շրջանակում։

«Այս մեթոդների կիրառումը մեծապես փոխում է պրագնոզը, այսինքն՝ հիվանդի շանսերը մեծանում են, ինսուլտը շատ ծանր հիվանդություն է, այն հանդիսանում է Հայաստանում մահացության 2-րդ պատճառը, հաշմանդամության առաջին պատճառը։ Այս մեթոդների կիրառության շնորհիվ մենք կունենանք մահացության կրկնակի իջեցում և հաշմանդամության անգամներ, կրկնակիից շատ իջեցում։ Քանի որ այս բուժումները ժամանակակախյալ են, այսինքն՝ խիստ սահմանափակ ժամանակում է հնարավոր իրականացնել բուժումը, ցավոք, հեռու մարզերի բնակիչների համար տեխնիկապես դա անհնար էր դառնում, փորձում էին մաքսիմալ շուտ հասցնել Երևան բուժում ստանալու համար, բայց, ցավոք, շատ դեպքերում դա չէր ստացվում ժամանակի սղության պատճառով»,- նշում է «Գյումրի» ԲԿ-ի նյարդաբանության և կաթվածի ծառայության ղեկավար Ժորա Բաղդասարյանը։

Ծառայության հասանելիության ապահովումը մարզերում այժմ համարվում է առաջնահերթ։ Ինսուլտի դեպքում հիվանդի րոպե առաջ բուժհաստատություն հասցնելը ոչ միայն վճռորոշ է հիվանդի հաշմանդամությունը կանխելու, այլև կյանքը փրկելու համար։ Ծառայությունը Գյումրիում լիարժեք իրականացնելու համար նյարդաբանության և կաթվածի նորաստեղծ ծառայության ղեկավարը մոտ 6-7 ամիս աշխատել է ամենատարբեր ուղղություններով։ Նախ՝ բուժանձնակազմի մասնագիտական մոտեցումների, հմտությունների ուղղությամբ են գործնականում աշխատել «Էրեբունի» ԲԿ-ի բժիշկների հետ, որոնք էլ ծրագրի սկզբնական փուլում ինսուլտով հիվանդներին կմատուցեն բժշկական ծառայություններ։

«Մարզը բավականին երկար ժամանակ  լուրջ պատրաստություն է տեսել։ Եվ՛ դեղորայքային, և՛ գործիքային  առումով լուրջ պատրաստված է, անգիոգրաֆիկ սարքն էլ նախատեսված է տրոմբեկտոմիա կատարելու համար, դա ինսուլտի սրագույն փուլի բուժման նորագույն տարբերակներից է»,- նշում է «Էրեբունի» ԲԿ-ի նյարդաբան Հովհաննես Եզոյանը։

Տեղի մասնագետները այժմ էլ ընթացիկ վերապատրաստումների են արտերկրում։ Բաժանմունքում հոսպիտալացվող սուր ինսուլտով հիվանդները տեղում լաբորատոր-գործիքային հետազոտություններ կանցնեն, անհրաժեշտության դեպքում կվիրահատվեն։ Գյումրիում վիրահատական, դեղորայքային նորագույն բուժումն իրականացվելու է պետպատվերով, դա համարվում է թանկարժեք բուժում։ Ինսուլտի ախտանշանների հայտնաբերումից հետո բուժումն արդյունավետ կլինի, եթե չորսուկես ժամվա ընթացքում անհրաժեշտ հետազոտություններն ու դեղորայքային միջամտությունները կատարվեն, որոնց համար պետությունը հատկացնում է 1,5 միլիոն դրամ գումար, իսկ երկրորդ մեթոդը, որը վիրահատականն է, տրամադրվում է 2,5-3,5 միլիոն դրամ։

Պետպատվերից, սակայն, բոլորը չէ, որ կկարողանան օգտվել, այս դեպքում կգործի համավճարի տարբերակը։ Նոր բաժանմունքում առաջին օրով հոսպիտալացված հիվանդներ չկային։ Բուժման արդյունավետության ու դիմելիության մասին խոսելու համար մասնագետներին առնվազն երեք ամիս ժամանակ է պետք։ Ծրագրի հաջող ընթացքի դեպքում հետագայում նախատեսվում է բաժանմունքներ բացել նաև ևս երեք մարզերի բժշկական կենտրոններում։ Գյումրիի ծառայությունը սպասարկելու է նաև հարևան մարզերի բնակիչներին։