Վերսկսվել է Գյումրիի «Անի»  թաղամասի ջրամատակարարման ցանցի նորացման ծրագրի երրորդ փուլը

Գյումրիի «Անի» թաղամասում վերսկսվել է գերմանական KFW բանկի միջոցներով ջրամատակարարման ցանցի նորացման ծրագրի երրորդ փուլը։ Նախորդ տարվանից մեկնարկած աշխատանքների արդյունքում արդեն փոխվել է թաղամասի ջրագծերի գլխավոր խողովակների 80 տոկոսը։ Այս տարի նախատեսվում է նորացնել ևս մի քանի տեղամասերի ջրագծերը, զուգահեռ կատարելու են տնային միացումները։ Ջրագծերի անցկացման աշխատանքներ են տարվում նաև Երկաթգծի բանավանում և Կոմիտաս փողոցում։ Ընդհանուր առմամբ, ծրագրի երրորդ փուլով Շիրակի մարզում նախատեսված է շուրջ 11 մլն եվրո արժողության ենթակառուցվածքների նորացում:

Ջրաշինարարը՝ «Դորոժնիկ» ընկերությունը, վերսկսել է նախորդ տարվանից անավարտ թողած ջրամատակարարման ցանցի նորացման ծրագրի շինաշխատանքները։ Ամբողջ թաղամասի ջրամատակարարման համակարգի նորացման ուշացած ծրագրի երրորդ փուլով ջրագծերի տնային միացումներին են հասել։ Շինարարը պարտավորվել է նոր ջրագիծը հասցնել մինչև դիտահոր, իսկ դրանցից կա ամեն շենքի յուրաքանչյուր մուտքի մոտ։

«Այստեղ շենքերի խողովակները 50 մմ տրամաչափի են, դրա համար մենք հիմա նոր՝ 1000 մմ տրամագծով դիտահորեր ենք կառուցում, հինն ենք օգտագործում, կամ եթե շատ է վնասված, նորն ենք տեղադրում, փականային հանգույցը տեղադրելուց հետո խողովակները բաժանում ենք բնակիչներին»,- նշում է Գյումրիի ենթակառուցվածքների վերականգնման ծրագրի ղեկավար Սուրեն Մամաջանյանը։

Ընդհանուր առմամբ փոխվելու է մոտ 20 կմ երկարության ջրագիծ, և 5 կմ չափով էլ շենքերի ներքին ցանցին միացումներ են արվելու։ Քաղաքի մյուս հատվածների, հին բնակֆոնդի հետ համեմատ՝ Անի թաղամասի 30 տարվա ջրագծերը եղել են մաշված, ինչի պատճառով ջրային կորուստները մոտ 70% են կազմում։ Նոր խողովակներն անցկացվել են հին ցանցին զուգահեռ, բայց նոր փորված խրամուղիներում։ Բնակչի ջրամատակարարումը դեռ հին ցանցով է և աշխատանքների ընթացքում չի դադարեցվել։

«Հին ջրագծերը չենք կարող անջատել, քանի որ նոր ցանցը ավարտված չի, հենց որ ավարտենք, փորձարկումից հետո  արդեն բնակիչներին կսպասարկենք նորով ու հին ջրագծերը կանջատենք»,- նշում է Սուրեն Մամաջանյանը։

Եթե եղանակը թույլ տա, աշխատանքները կավարտվեն 2 ամսից։ Դեռ նախորդ տարվանից մեկնարկած ջրամատակարարման ցանցի նորացման աշխատանքներն ժամկետների խախտումով են ընթանում։ Ծրագրի պատասխանատուն պատճառներն է թվարկում, որոնք կապում է համավարակային սահմանափակումների, հետպատերազմական վիճակի, բացի երկուսից, նաև շինանյութի ներկրման դժվարությունների հետ։ Իսկ մասնակի ու տեխնիկական խնդիրներ էլ տեղում են առաջ գալիս։

«Տեղանքի ոչ բարվոք վիճակում գտնվող կոմունիկացիաները ամբողջությամբ փտած են, խրամուղիները բացելուց հետո անմիջապես երևում են, որ գոյություն ունեցող  խողովակները փտած են, ու ամբողջ ջուրը լցվում է խրամուղիների մեջ, էդ ընթացքում վերանորոգում ենք, ինչը դանդաղեցնում է մեր աշխատանքները»,- ասում է ջրաշինարարը։

Բացի խմելու ջրագծերի տնային միացումներից, թաղամասում կնորացվի նաև կոյուղատար համակարգի մոտ 100 մետրանոց հատված, այն գտնվում է բարդ տեղանքում ու շինարարի համար կարող է դժվարություններ առաջացնել։

Ջրամատակարարման ծրագրի ամբողջական ավարտից է կախված Անի թաղամասի փողոցների հիմնանորոգման մեկնարկը, որը մոտ 7 տարի է՝ ուշանում է, այն ընդգրկված է ՎԶԵԲ-ի փողացաշինական ծրագրում։ Հիմա ընդամենը ջրաշինարարը փորած հատվածներում հետլիցք է կատարում ու խճապատում, որը ժամանակավոր լուծում է և ոչ այնքան հարմար թաղամասի բնակիչների համար։