Պատերազմի երկու գույները․Արցախյան պատերազմի հերոսական դրվագները գրող-հոգեբան Մարինե Մանուկյանի ժողովածուներում

Մտավորականի ընտանիքում ծնված Մարինեն վաղ տարիքից է բանաստեղծություններ գրել։ Կարդալը, սովորելը իր տարերքն էր։ Հոգնել չուներ՝ ինչպես հիմա է։ 1988 թվականի երկրաշարժը անհետևանք չի մնացել աղջկա կյանքում։ Ձեռք բերած ֆիզիկական դժվարությունները, սակայն, նրան կոփեցին հոգեպես: Մարինեն իրենց տան ամենալավատեսն ու հույս արթնացնողն է։ Մասնագիտությամբ դատական հոգեբան է: «Աղետի հետևանքների հոգեբանական գնահատականը» նրա առաջին հեղինակային գիրքն է, որտեղ ներկայացրել է հաշմանդամություն ունեցող անձանց կարիքները:

«Ինքս, լինելով աղետի հետևանքը կրողը, որոշեցի վեր հանել հաշմանդամություն ունեցող անձանց խնդիրները։ Ինքս իմ մեջ ուժ գտա հաղթահարելու այդ թերությունը հոգեբանորեն ու օգնել մյուսներին նաև»,- պատմում է Մարինեն։

Մարինեն 2016 թվականից Ամերիկայի գրողների միության անդամ է, 4 գրքերի համահեղինակ է և 4 գրքի հեղինակ, որոնք բովանդակությամբ միայն հոգեբանական վերլուծություններ չեն, բայց հոգեբանի մասնագիտությունն է օգնել, առաջնորդել գրել բանաստեղծություններ ու հոդվածներ։ Ապրիլյան քառօրյա պատերազմը Մարինեի կյանքում դառնում է շրջադարձային: Տան առանձնացված անկյունում գրքի հերոսներն են։ 2016 թվականի ապրիլյան քառօրյա պատերազմում զոհված գյումրեցի տանկիստ Տիգրան Աբգարյանի պատկերով վզնոցը կրում է որպես թալիսման։

Մարտական խաչ երկրորդ աստիճանի շքանշանակիր Արթուր Աղասյանի հետ ջերմ մտերմության արդյունքում սկսել էր նրա մասին գրել, բայց Աղասյանը չհասցրեց կարդալ այն։ Ապրիլյանի հաղթական օրերի կապիտանը զոհվեց 44 օրյա պատերազմում։ Մարինեն այդ օրերին ծանր ապրումներ է ունեցել։

«Երբ համացանցում կարդացի, որ Արթուրը զոհվել էր, աչքերիս չէի հավատում։ Ատամներս սեղմած,արցունքներս զսպելով՝ մի կերպ հավաքեցի ինքս ինձ ու որոշեցի գիրք գրել հերոս Արթուրի մասին»։

Ինչպես բոլորի մոտ է լինում, հուսահատության պահեր է ունեցել, բայց ինքնհաշտության կարողացել է հասնել։ Մարինեն չի դժգոհում, չի գանգատվում, անկախ ֆիզիկական դժվարություններից։ Նույն համբերատարությամբ ժամերով ու օրերով գոբելեն է գործում, աշխատանքներում դարձյալ հայրենասիրական թեմատիկան է գերակշռում:

Համակարգչի առջև է օրվա մեծ մասը, վերահսկում է իր հեղինակած սոցիալական էջերը։ Շտապում է լրացնել, որ գրում է ոչ միայն զոհված հերոսների մասին։

«Ես որևէ մեկին չեմ առանձնացնում բոլորն են իմ հերոսները, բայց չեմ կարող 5000 և ավելի հերոսներին, այսպես ասեմ, իմ տան մեջ տեղավորել»,-ասում է Մարինեն։

Մարինեի գրական ստեղծագործություններն ու հերոսապատումները կարդում են, արձագանքում, ինքն էլ համբերատար պատասխանում է բոլորի նամակներին։ Այժմ հերոսապատում գրքի երկրորդ հատորի լույս ընծայման աշխատանքներով է զբաղված։ Իսկ տարբեր հարթակներում եթե հանդիպեք Մատինա գրական կեղծանվամբ հրապարակումների, դրանց հեղինակը նույն ինքը՝ Մարինե Մանուկյանն է։