Սոցիալական բնակարանաշինությունից անցում բնակարանների գնման․ «ԱՌՔ» բարեգործական հիմնադրամը Գյումրիում փոխում է ծրագրի բնույթը

Գյումրիում սոցիալական բնակարանաշինության «ԱՌՔ» բարեգործական հիմնադրամի ծրագիրը փոխում է իր բնույթը։ Որպես նախկինում իրականացրած սոցիալական բնակարանների կառուցման շարունակություն, հիմնադրամը նախատեսում էր դրանց կողքին, Անի թաղամասում, անավարտ հիմքերի վրա 9-10 բնակարան կառուցել և հատկացնել բնակարանի կարիք ունեցող տնակի բնակիչ այն ընտանիքներին, որոնք 10 տարվա ընթացքում կպարտավորվեին վճարել տան արժեքի 50 տոկոսը։ Այժմ հիմնադրամը ծրագիրն այլ ձևաչափով է շարունակելու։

Հիմնադրամի հոգաբարձուների խորհուրդը որոշել է անորոշ ժամանակով սառեցնել նախորդ 2 փուլերով կառուցված սոցիալական բնակարանների հարևանությամբ եռահարկ շենք կառուցելու ծրագիրը։ «ԱՌՔ» -ի առաջարկն այս դեպքում բնակապահովման խնդիր ունեցող վճարունակ գյումրեցի ընտանիքներին է վերաբերում։

«Կա հոգաբարձուների որոշումը․ շինանյութի արժեքների անակնկալ և շարունակական թանկացումները մեզ ուրիշ տարբերակի բերեցին, որ շատ ավելի հեշտ կլինի, ավելի էժան կլինի ու ավելի ընդգրկուն կլինի ծրագիրը, եթե ուղղակի պատրաստի տները գնենք ու նվիրատվություն ձևակերպենք։ Ծրագրի գլոբալ ուղղությունը չենք փոխում, էլի տնակներում ապրող ընտանիքների համար բնակարանային ծրագիր է սա»,- նշում է «ԱՌՔ» բարեգործական հիմնադրամի տնօրեն Հրահատ Ստեփանյանը։

Դեռ տարեսկզբին հիմնադրամը հայտարարել էր, որ նախատեսում է մարտ ամսին սկսել նոր՝ Մովսես Խորենացի փողոցում, անավարտ հիմքերի վրա կառուցվող շենքի նախագծային աշխատանքները և հետո շինարարությունը։ Բայց հիմնադրամը այդպես էլ չի սկսել նախագծի մշակումը, փոխարենը հետաքրքրվել է Գյումրիի անշարժ գույքի շուկայի գներով, ըստ այդմ էլ՝ նախնական հաշվարկներով հնարավոր են համարում 10 բնակարան գնել անհամեմատ քիչ ֆինանսական ներդրումներով, քան կպահանջվեր նույնքան բնակարան կառուցելու համար:

Խոսքն այս դեպքում տնակներում ապրող, բայց վճարունակ ընտանիքների մասին է, որոնք ի վիճակի կլինեն բնակարանի արժեքի 50%-ը վճարել։ Փոխվում են բնակարանի հատկացման պայմանները, բայց անփոփոխ են մնում ծրագրից օգտվողների համար սահմանված պահանջները։ Պոտենցիալ շահառուն պետք է վերջին 15 տարում ապրած լինի տնակում և նույն ժամանակահատվածում որևէ գույք ձեռք բերած կամ օտարած չլինի։ Ի տարբերություն սոցիալական բնակարանների, այս դեպքում շահառուին տրամադրված բնակարանը կդառնա իր սեփականությունը, միայն թե իրավունք չի ունենա այն վաճառել։

«Մենք բնակարանը կգնենք, նոտարով կձևակերպենք, սեփականության վկայականն իրենց անունով կգրենք, տունը գրավ կդրվի, ու 10 տարվա ընթացքում բնակարանի արժեքի 50 տոկոսը անտոկոս վերադարձնելու են»,- ասում է Հրահատ Ստեփանյանը։

Ծրագրի նոր մոտեցումներն ու պահանջները բացատրել են այն ընտանիքներին, որոնք այս երկու 2 ամսում դիմել են Գյումրիի քաղաքապետարան՝ ծրագրից օգտվելու ցանկությամբ։ Դիմում է ներկայացրել 100 անօթևան ընտանիք, նրանցից, նախնական տվյալներով, 87-ն է համապատասխանել ծրագրի պահանջներին։ Մոտ 100 դիմումատու էլ ծրագրի պայմաններին տեղում ծանոթանալուց հետո է հրաժարվել։ Հիմնական պատճառը բնակարանի արժեքի վճարման 50 %-ի չափով մասնակցությունն է։

«Մենք բոլորին մանրամասն ներկայացրել են, որ սա վճարովի ծրագիր է, և չվճարելու դեպքում դուք կզրկվեք բնակարանից, նաև տնակից, քանի որ 15 օրվա ընթացքում տնակը պարտադիր ապամոնտաժվելու է, այսինքն՝ բարերարի հետ կարող եք խնդիր ունենալ, եթե չկարողանաք վճարել»,- մանրամասնում է Գյումրիի քաղաքապետարանի անշարժ գույքի կառավարման բաժնի պետ Գևորգ Գրիգորյանը։

Խաչատրյանների ընտանիքն ավելի քան 30 տարի է՝ ապրում է տնակում։ 88-ին բնակարան չեն կորցրել, վարձով են ապրել, երկրաշարժից հետո տեղափոխվել են տնակ։ Ընտանիքում փոքրիկի լույս աշխարհ գալուց հետո որոշել են, թեկուզ 50 տոկոս ներդրմամբ, դիմել բնակապահովման այս ծրագրին։

«Այլ տարբերակ չկար, ստիպված դիմել ենք էս ծրագրին, որպեսզի մեզ նման մեր երեխեքն էլ տնակում չմեծանան։ Տնակում ապրելն այլևս անհնար է, ճիշտ է, մեծ դժվարություններով պետք է վճարենք, բայց համաձայնվել ենք»,- նշում է տնակի բնակիչ Լիանա Խառատյանը։

Ընտանիքը 2 սենյականոց բնակարանի շահառու է, թե ինչքան գումար կկազմի և ինչ մակերեսով տուն կառաջարկվի ընտանիքին, որը համաձայնել է բնակարանի արժեքի 50 տոկոսի վճարումով օգտվել ծրագրից, հիմնադրամին էլ հայտնի չէ։ Այս շաբաթվա ընթացքում հանձնաժողովը հերթական նիստում կանդրադառնա դիմումներին, ըստ այդմ էլ՝ որոշելու, թե քանի 1-4 սենյականոց բնակարաններ են գնելու առայժմ 10 շահառու ընտանիքի համար, իսկ ընտրությունը վիճակահանությամբ է։