Հունաստանի ԱԳՆ-ը խստորեն դատապարտել է թուրքական ռազմական ավիացիայի՝ իր օդային տարածքում սադրանքները

Հունաստանի արտաքին գործերի նախարարությունը հինգշաբթի օրը խստորեն դատապարտել է թուրքական ռազմական օդանավերի կողմից Հունաստանի օդային տարածքի աննախադեպ խախտումները և տեղեկացրել ԵՄ-ի, ՆԱՏՕ-ի, ՄԱԿ-ի, Քաղաքացիական ավիացիայի միջազգային կազմակերպության (ICAO), ինչպես նաև ՄԱԿ-ի Անվտանգության խորհրդի անդամ երկրների համապատասխան պաշտոնյաներին։  Այս մասին հայտնում է Հունաստանի ԱԳՆ մամուլի ծառայությունը։

«Հունաստանի արտաքին գործերի նախարար Նիկոս Դենդիասի հրահանգով ԱԳ գլխավոր քարտուղար Թեմիստոկլիս Դեմիրիսը նոր բուռն բողոք է հայտնել Թուրքիայի դեսպանին մեկ օրում Հունաստանի օդային տարածքի աննախադեպ քանակի խախտումների և Հունաստանի տարածքի վրայով (թուրքական կործանիչների) թռիչքների (ներառյալ մի շարք տարածքներ, որոնցում բնակչություն կա) կապակցությամբ:  Գլխավոր քարտուղարն ընդգծել է, որ Թուրքիայի շարունակական սադրիչ և հանցավոր պահվածքը, որը խախտում է Հունաստանի ինքնիշխանությունը, լիովին դատապարտելի է և անընդունելի»:

ԱԳՆ գլխավոր քարտուղարն ընդգծել է, որ «բացի ակնհայտ փաստից, որ սա միջազգային իրավունքի կոպտագույն խախտում է, այդ գործողությունները, որոնց պատասխանատվությունը կրում է միայն Թուրքիան, առանձնակի լարվածության մթնոլորտ են ստեղծում երկու երկրների հարաբերություններում, ինչը հակասում է այս մթնոլորտը բարելավելու ջանքերին»։

Սա Թուրքիայի Հունաստանի արտգործնախարարության երկրորդ դեմարշն է երկու օրվա ընթացքում։ Չորեքշաբթի օրը Հունաստանի ԱԳՆ-ն իր խիստ բողոքն է հայտնել Թուրքիայի դեսպանին հունական կղզիների վրայով թուրքական կործանիչների թռիչքի դեմ, հայտնում է Հունաստանի ԱԳՆ մամուլի ծառայությունը։

Աթենքի մակեդոնական լրատվական գործակալության (AMNA) հաղորդման համաձայն, չորեքշաբթի կեսօրին թուրքական F-16 կործանիչները թռել են հունական Ֆարմակոնիսի, Լիփսի, Ֆուրնի և Ինուսե կղզիների վրայով։ Այսօր ավելի վաղ թուրքական F-16 կործանիչի ևս մեկ զույգ թռիչք է կատարել Արկի, Լիփսի, Ագաթոնիսիոն, Սամոս, Ֆուրնի և Ինուսե կղզիների վրայով։ Բոլոր դեպքերում հունական ռազմական ինքնաթիռները օդ են բարձրացել թուրքական ինքնաթիռները որսալու համար, ինչը, միջազգային կանոնների համաձայն, ստիպել է խախտողներին լքել Հունաստանի օդային տարածքը, նշում է գործակալությունը։

Իր հերթին, ProtoThema թերթը չորեքշաբթի երեկոյան հայտնել է, որ Հունաստանի ԱԳՆ դեմարշից հետո թուրքական ավիացիան ակտիվացրել է իր սադրանքները։ Թերթի տվյալներով՝ չորեքշաբթի օրը թուրքական ինքնաթիռները 126 անգամ խախտել են ազգային օդային տարածքը՝ կտրուկ ավելացնելով լարվածությունը հունա-թուրքական հարաբերություններում։ Խախտումների թվում են թուրքական ինքնաթիռների 24 թռիչքները՝ հունական տասնմեկ կղզիների վրայով։

Չորեքշաբթի օրը հունական Newsbomb.gr լրատվական պորտալը հայտնել է, որ Հունաստանի օդային շտաբը չեղարկել է Թուրքիայի հրավերը՝ մասնակցելու ՆԱՏՕ-ի Tiger Meet զորավարժություններին, քանի որ թուրքական կործանիչները մշտապես խախտել են Հունաստանի օդային տարածքը և թռչել հունական կղզիների վրայով։ Պորտալի տվյալներով՝ Հունաստանի ազգային պաշտպանության նախարարությունում տեղի ունեցած արտակարգ խորհրդակցությունից հետո որոշում է կայացվել չեղարկել Թուրքիայի ռազմաօդային ուժերի հրավերը՝ մասնակցելու այս զորավարժություններին, որոնք տեղի կունենան մայիսի կեսերին Արաքսոսում գտնվող Հունաստանի ռազմաօդային ուժերի 116-րդ մարտական ​​թևի ավիաբազայում։