Հայ և ֆրանսիացի ակնաբույժները Գյումրիում կատարակտի հեռացման ու ցանցաթաղանթի բարդ վիրահատություններ են կատարել

Տեսողության խանգարումներն ու դրանց ավելի բարդացված պաթոլոգիաները՝ ակնաբուժական հիվանդություններն աշխարհում ավելացել են, ինչպես նաև երիտասարդացել։ Օրինակ՝ կատարակտը, եթե նախկինում համարվում էր ծերունական հիվանդություն, այժմ այն հանդիպող տեսակ է նաև երիտասարդների շրջանում։ Ակնաբուժական մի շարք հիվանդությունների առաջացման պատճառը հիմնականում ուղեկցող խրոնիկ հիվանդություններն են։ Ամենատարածված՝ աչքի կատարակտի ու ցանցաթաղանթի հիվանդությունների բուժումը պահանջում է վիրահատական միջամտություն։ Ակնաբուժության ոլորտում հայ-ֆրանսիական  համագործակցության արդյունքում այժմ այդպիսի բարդ վիրահատությունները կատարվում են նաև Գյումրիում։

Հայ և ֆրանսիացի ակնաբույժներն առաջին համատեղ վիրահատությունն են կատարել Գյումրիում։ Բժշկական կենտրոնում առաջին անգամ կատարակտի վիրահատության ընթացքում կիրառվում էին ֆրանսիական ակնաբուժության մեթոդները։ Ըստ մասնագետների՝ դրանց միջև տարբերությունը բավականին մեծ է, ու համատեղ անցկացվող վիրահատությունը միմյանց փոխլրացնելու և ունեցած փորձի փոխանակման գործնական հնարավորություն է։

«Այստեղ ակնաբուժության մակարդակը շատ բարձր է, շատ լավ ակնաբույժներ կան, բայց մեր տեխնոլոգիաները այլ են, նույնը չեն։ Ինձ թվում է՝ ամենակարևորը վերջնական արդյունքն է, որին էլ բոլորս հասնում ենք»,- նշում է Փարիզի ակնաբուժական հիվանդանոցի ակնաբույժ Մարիլին Նօտարիան-Քրքիաշարիանը։

Մարիլին Նօտարիանը Հայաստան կատարած նախորդ այցերի ընթացքում աչքի գործիքային հետազոտություններ ու խորհրդատվություններ է իրականացրել նաև գյուղական բնակավայրերում։ Կատարակտի վիրահատությունների երկարամյա փորձ ունի։ Աչքի հիվանդությունների շարքում այն ամենատարածվածն է ոչ միայն Հայաստանում, այլև ամբողջ աշխարհում։

«Կարծեմ, աշխարհում տարածված հիվանդությունն է կատարակտը, հիվանդների տարիքն էլ գնալով փոքրանում է,  առաջ միայն ծերերի մոտ էր հանդիպում, չգիտենք՝ ինչու է այդպես»,- ասում է նա։

Կատարակտի երիտասարդացման հիմքերը դեռ հայտնի չեն, բայց ուսումնասիրված են առաջացման պատճառները, դրանք հիմնականում ուղեկցող խրոնիկ հիվանդություններն են։ Ըստ մասնագետների՝ ամենաառաջին տեղում են շաքարային դիաբետն ու հիպերտոնիկ հիվանդությունները։

«Համաշխարհային տվյալներով՝ եթե 10-15 տարի առաջ ամբողջ աշխարհում կար 360 մլն դիաբետով հիվանդ, այսօր արդեն կա 420 մլն հիվանդ, 20 տարի հետո կանխատեսվում է, որ կլինի մոտ կես մլրդ, որովհետև ինքը անընդհատ աճող ու տարածվող հիվանդություն է»,- նշում է ակնահատակի վիրաբույժ Թադևոս Հովհաննիսյանը։

«Հայկական ակնաբուժության նախագծի» շրջանակներում Գյումրիի մարզային ակնաբուժական կենտրոնում արդեն 4 տարի է՝ կատարակտի վիրահատություններ են իրականացնում, «Ֆրանսիական լույս» մարդասիրական ասոցիացիայի ակնաբուժական հմտությունների կատարելագործման ծրագրով Գյումրիում այսուհետև ցանցաթաղանթի բարդ վիրահատություններ ևս կկատարվեն: Այդպիսի միջամտությունները երևանյան կլինիկաներում են կատարվում, հիմա այդ խնդիրը տեղում կկարգավորվի։ Հատկապես տրավմաների ժամանակ աչքի ցանցաթաղանթի վնասվածության դեպքում հիվանդի տեղաշարժը հակացուցված է։

Գյումրիում նման բարդ վիրահատություններ իրականացնելու համար ակնաբուժական կենտրոնն արդեն ախտորոշիչ և վիրահատական նոր ու գերժամանակակից սարքավորումներով է համալրվել։

Ցանցաթաղանթի բարդ վիրահատությունները տեղի մասնագետները սկզբնական փուլում Երևանի ակնաբույժների հետ համատեղ կիրականացնեն։ Հայ-ֆրանսիական համագործակցությամբ ակնաբուժական ծրագրի արդյունքում Գյումրիում երկու օրում ցանցաթաղանթի 10 վիրահատություն է կատարվել։