Գաջեթներով անցկացված որքա՞ն ժամանակն է համարվում օպտիմալ

COVID-19 համաճարակը փոխեց մեր կյանքը բազմաթիվ ասպեկտներով, ներառյալ այն ժամանակը, որը մենք ծախսում ենք մեր  գաջեթներին գամված:  2021-ին հրապարակված հետազոտությունը ցույց է տվել, որ 2020-ին ամերիկացիներն օգտագործել են իրենց հեռախոսները շաբաթական միջինը 28,5 ժամ՝ 2018-ին շաբաթական 25,9 ժամից ավելի:

2021 թվականներին կատարված ուսումնասիրությունների համաձայն ԱՄՆ-ում և այլ երկրներում մեծահասակները  էկրաններին  գամվում են միջինը  60-80%-ով  ավելի, քան մինչև համաճարակը: Ապացուցված է, որ էկրանի առջև  չափից ավելի անցկացրած ժամանակը բացասական ազդեցություն է թողնում երեխաների և դեռահասների վրա և որոշակի  հոգեբանական և առողջական  խնդիրներ ստեղծում՝  մասնավորապես՝ դեպրեսիա, տագնապ,վատ քուն, գիրություն: Շատ հետազոտողներ կարծում են, որ հեռախոսների և համակարգիչների  առջև անցկացրած երկար ժամանակը մեծահասակների մոտ կարող է  հանգեցնել աչքերի լարվածության, քնի խանգարման  և մտավոր առողջության վատթարացման:

Այսպիսով,  էկրանի առջև անցկացրած որքա՞ն   ժամանակն է  համարվում օպտիմալ:

Դա սխալ հարց է,կարծում են փորձագետները:  Կարևոր է  այն կոնտենտը, բովանդակությունը, որից օգտվում ենք:  Հեռախոսով վավերագրական ֆիլմ դիտելը, օրինակ, նույն ազդեցությունը չի թողնում, ինչ Instagram-ի էջերն  անիմաստ  վերուվար անելը:

Եթե ​​կարծում եք, որ  էկրանի առջև գամված մնալու  Ձեր ժամանակն ավելացել է, մասնագետները  խորհուրդ են  տալիս ինքներդ ձեզ մի քանի  կարևոր հարց տալ.

Լա՞վ եք քնում։
Լա՞վ եք ուտում։
Տնից դուրս  գալի՛ս եք  և  հանդիպու՞մ եք ընկերների հետ
Դուք ֆիզիկապես ակտիվ եք:
Եթե պատասխանները դրական են, ապա անհանգստանալու հարկ չկա: Հակառակ դեպքում՝ահա մի քանի խորհուրդ հոգեբաններից:

Սահմանափակեք սոցիալական մեդիայում անցկացրած ժամանակը մինչև օրական 30-60 րոպե: Հոգեբանները վստահ են, որ  սոցիալական մեդիայում մարդիկ ստեղծում են կյանքի կատարյալ պատկեր, ինչը անառողջ համեմատությունների տեղիք է տալիս և ձեվավորում թերարժեքության բարդույթներ: Նույնը պետք է ասել նաև հայտնի դեմքերի  մասին: Վերջիններիս իդեալականացված,  նաև թվային տեխնոլոգիաների միջոցով կատարելության հասցրած կառուցվածքն ու դիմագծերը անառողջ վերաբերմունք  են ձևավորում  ժամերով այդ  լուսանկարները թերթող օգտատերերի մոտ:

Իհարկե, իսպառ   բացառել սոցիալական ցանցերն ու  թվային մեդիան  մեր կյանքից  անհնար է:  Սակայն միշտ պետք է հիշել, որ  սոցիալական մեդիայից  դուրս  կա  ռեալ  ու շատ ավելի բովանդակալից  կյանք,  իրական ընկերներ ու  իրական շփում:

Դադարեցրեք գաջեթներ օգտագործել քնելուց առնվազն մեկ ժամ առաջ

Սրտաբան  Գրեգորի Մարկուսի կարծիքով  քնելուց առաջ մեկ ժամվա ընթացքում  էկրաններին նայելը   դժվարացնում է քնելը և բացասաբար է անդրադառնում ինչպես քնի որակի, այնպես էլ տևողության վրա:

«Մարդկանց , ովքեր դժվարանում են քնել,  ես խորհուրդ կտայի հեռախոսը թողնել մեկ այլ սենյակում», – ասում է Մարկուսը: «Դժվարացրե՛ք ձեր հեռախոսին հասնելը, որպեսզի բնականաբար չհասնեք դրան»:

Աչքերի առողջության համար ամեն 20 րոպեն մեկ ընդմիջում արեք

Էկրանի չափից ավելի օգտագործումը կարող է նաև վնասել աչքերը:Դա կարող է  հանգեցնել  կարճատեսության: Բժիշկները խորհուրդ  են տալիս  20-20-20 կանոնը կիրառել: Յուրաքանչյուր  20 րոպեի ընթացքում ձեր աչքերին 20 վայրկյան ընդմիջում տվեք՝ կենտրոնանալով 20  ոտնաչափ կամ ավելի հեռու ինչ-որ առաջկայի վրա»,- ահա բժիշկների խորհուրդը, որը կխնայի ձեր տեսողությունը: