Սոցիալական բնակարանների նոր ծրագիր Գյումրիում․ նախատեսվում է վերականգնել Լիսինյան 1 հասցեի կիսակառույց շենքը

Գյումրիում բնակարանային ապահովմանն ուղղված «ԱՌՔ» բարեգործական հիմնադրամի ծրագիրը դեռ մնում է հստակեցումների փուլում։ Պատճառը շինանյութի, ինչպես նաև անշարժ գույքի շուկայում թանկացումներն են։ Գնային փոփոխություններով պայմանավորված հիմնադրամն անընդհատ վերանայում է բնակարանային ծրագրի տարբերակները։ Մինչ այդ հիմնադրամը բնակարաններ է կառուցել ու հատկացրել անօթևաններին։

Միաժամանակ, Գյումրիում սոցիալական բնակարանաշինության մեկ այլ ծրագրի առաջարկ է ներկայացվել։ Նախաձեռնությունը «Դեպի առաջ» բարեգործական հասարակական կազմակերպությանն է, մտադիր է Գյումրիում անավարտ շենքը կառուցելուց հետո վերադարձնել  քաղաքին, միայն առաջին հարկը ընկերությանը կտրամադրվի՝ սոցիալ-կրթական և արտադրական նպատակների համար։

Ավելի քան 30 տարի, այսպիսի պայմաններում են ապրում տնակի բնակիչները, դրանք չեն փոխվում անգամ տնակի ժամանակ առ ժամանակ վերանորոգումից հետո։ Մխիթարյաններն իրենց տնակում քիչ թե շատ կոմունալ հարմարություններ ստեղծել են, այտեղ են մեծացել երկու զավակները, հիմա հերթը թոռներինն է, 88-ին բնակարան չեն կորցրել, վարձով են ապրել, անօթևանների հերթացուցակում հաշվառված չեն, բայց փաստացի տնատեր էլ չեն։ Սեփական ուժերով նոր բնակարան ձեռք բերել չեն կարողացել, հիմա համեմատաբար ձեռնտու տարբերակ են համարում «ԱՌՔ» բարեգործական հիմնադրամի սոցիալական բնակարանների ծրագրին դիմելը։

«Իմացա ծրագրի մասին, մտածեցի հնարավորություն է, օգտվենք, ոնց էլ լինի 10 տարվա ընթացքում էդ փողը կմուծենք, կմարենք, մանավանդ որ առանց տոկոսների է»,- նշում է տնակի բնակիչ Հասմիկ Հաջյանը։

Գյումրիում անօթևան ընտանիքի բնակարանային ապահովման ծրագրի առաջարկվող 50/50 տարբերակը հիմնադրամում դեռ անփոփոխ է մնում։ Այսինքն՝ ներդրվող գումարի 50 տոկոսը ընտանիքների համար անհատույց նվիրատվություն է լինելու, իսկ մյուս 50-ը ընտանիքները վերադարձնելու են հիմնադրամին՝ 10 տարվա ընթացքում, որից հետո բնակարանը կհամարվի նրանց սեփականությունը: Մոտեցումը վերջնական չէ, բայց դրանք կլինեն բնակարանաշինության արդյունքում, թե կգնվեն շուկայից։ Հիմնադրամում որոշումները դեռ վերանայում են։

«Հիմա, քննարկման արդյունքում, ևս մեկ անգամ ուսումնասիրվելու է, թե ունեցած բնակարանների գինը և նորը կառուցելու հետ համեմատականը ինչ տարբերություն կստացվի և վերջնական մոտակա օրերին որոշումը կընդունվի»,- նշում է Գյումրիի քաղաքապետ Վարդգես Սամսոնյանը։

Նոր կառուցված բնակարան է տրվելու, թե գնված ու վերանորոգված՝ հիմնադրամն է որոշելու։ Իսկ շահառուների փաստաթղթերն արդեն ուսումնասիրվել են, 88 ընտանիք համապատասխանում է սահմանված չափորոշիչներին։ Եթե քննարկումների արդյունքում հիմնադրամը կրկին վերադառնա բնակարանների կառուցմանը, ապա այն կսկսեն նախատեսված հասցեում՝ նախորդ 2 ծրագրերով Անի թաղամասում կառուցված սոցիալական բնակարանների հարևանությամբ, անավարտ շենքի հիմքերի վրա։

Սոցիալական բնակարանաշինության մեկ այլ ծրագրի վերաբերյալ նաև հուշագիր է ստորագրվել։ Այն առաջարկել է «Դեպի առաջ»  բարեգործական կազմակերպությունը։ Գյումրիում կիսակառույց կամ անավարտ շենք են նախատեսում վերակառուցել և վերադարձնել համայնքին։ Ընտրվել է Մսի կոմբինատ թաղամասի Լիսինյան 1 հասցեի եռահարկ կիսակառույցը։ Ծրագիրը կյանքի կոչելու դեպքում ևս 10-12 անօթևան ընտանիքի բնակարանի հարց կլուծվի։ Շահառուների ընտրությունը իր վրա է վերցնում կազմակերպությունը։

Բացի բնակարանաշինական բաղադրիչից, «Դեպի առաջ»-ի հետ նախատեսվում է համագործակցել նաև սոցիալ-կրթական և արտադրական ոլորտներում։ Վերակառուցված շենքի առաջին հարկը տրամադրվելու է ընկերությանը՝ սոցիալ-կրթական և արտադրական նպատակների համար:

Բնակարանաշինական մեկ այլ ծրագիր, Հայաստան համահայկական հիմնադրամի միջոցներով, Մուշ 2-2 թաղամասում մոտենում է ավարտին, որը կունենա նաև շարունակություն։ Արդեն կառուցված 2 շենքերում բնակարանատեր կդառնա 36 ընտանիք, շահագործման կհանձնվի նաև 50 երեխայի համար նախատեսված մանկապարտեզը։ Հիշեցնենք, որ 88-ից հետո առաջին անգամ Գյումրիում կառուցվում են 5 հարկից բարձր շենքեր։ Նորակառույցների մի մասը լինելու են 6, ևս երկուսը՝ 7 հարկանի բնակելիներ։