Ռոբերտ Քոչարյանին կալանքի տակ պահելն այս պահին անհրաժեշտ է. ՀՔԾ պետ

Հատուկ քննչական ծառայության պետ Սասուն Խաչատրյանն օգոստոսի 2-ին՝ Կառավարության նիստից առաջ անդրադարձավ ՀՀ երկրորդ նախագահ Ռոբերտ Քոչարյանին մեղադրանք առաջադրելու և կալանավորելու վերաբերյալ հնչող քննադատություններին ու մտահոգություններին:

Հարցին՝ 41 պատգամավորի ստորագրած երաշխավորագիրը կարո՞ղ է ինչ-որ ազդեցություն ունենալ, որի արդյունքում Ռոբերտ Քոչարյանի նկատմամբ կիրառտված խափանման միջոցը կփոխվի, նա պատասխանեց, որ հարցի հասցեատերն ինքը չէ. խափանման միջոց կալանավորումը փոխելու հարցը որոշում է դատախազը: Խաչատրյանը դարձյալ վստահեցրեց՝ եթե քրգործով բացահայտման ենթակա հանգամանքների մասին որևէ պաշտոնատար անձ կարող է որևէ նշանակալի տեղեկություն հայտնել, նա հարցաքննվելու է:

Արձագանքելով Ռոբերտ Քոչարյանի պաշտպանական կողմի՝ իրենց հասցեին հնչեցրած քննադատություններին ու մի շարք արտահայտություններին՝ ՀՔԾ պետն ասաց.

«Ես չեմ իջնում իրենց մակարդակին և անձնական վիրավորանքներով իրենց պատասխանել չեմ ցանկանում, մեղադրանքի որոշումը այնքան հստակ է, պարզ ու հիմնավորված, որ ինձ համար անհասկանալի են, տեղ-տեղ նաև ծիծաղելի այդ որոշակի մանիպուլյացիաները, որ փորձում են արվել պաշտպանական կողմի ներկայացուցիչների կողմից, ինչպես նաև քաղաքական հայտարարությունները: Ռոբերտ Քոչարյանը մեղադրվում է «Սահմանադրական կարգը բռնի տապալելու» մեջ, նման մեղադրանք առաջադրելու համար հիմք է հանդիսացել բանակի ներգրավումը քաղաքական գործընթացներում, ինչն արգելված էր ինչպես նախկին, այնպես էլ Սահմանադրության ներկայիս խմբագրությամբ, դա անթույլատրելի է: Դա կարող էր լինել միայն այն դեպքում, երբ հայտարարված լիներ ռազմական դրություն. ինչպես գիտեք՝ ռազմական դրություն հայտարարված չի եղել: Ես չեմ հասկանում այս աղմուկը, որ բարձրացվել է»:

Դիտարկմանը, թե երկրորդ նախագահը հրավիրվել է որպես վկա, սակայն ստացել մեղադրյալի կարգավիճակ, ՀՔԾ պետը պատասխանեց, որ քրեական դատավարությունը դինամիկ գործընթաց է, այսինքն՝ ապացույցների ձեռքբերումը տեղի է ունենում անընդհատ՝ ամեն ժամ, ամեն օր, ամեն վայրկյան, և անձի կարգավիճակը գնահատվում է այդ ապացույցների համակցության հիման վրա. ենթադրենք, այսօր անձին մեղադրանք առաջադրելու համար չկա այդ համակցությունը, մի ժամ անց՝ ապացույցներ ձեռք բերելուց հետո, կարող է վարույթ իրականացնող մարմինը գա այն եզրակացության, որ այդ համակցությունը՝ անձին մեղադրանք առաջադրելու համար, առկա է, և եթե այդ պահին նա հարցաքննվի որպես վկա, ապա խախտված կլինեն տվյալ անձի իրավունքները: Խաչատրյանն ասաց, որ երբ քննչական գործողություն պիտի լիներ, Ռոբերտը Քոչարյանին ծանուցվել է, որ նա ունի մեղադրյալի կարգավիճակ:

ՀՔԾ պետը հայտնեց, որ մարտի 1-ի գործով փաստահավաք խմբի տեղեկությունները ստուգվում են, դրանց հիման վրա արդեն դատավարական ընթացակարգերով ձեռք են բերվում ապացույցներ, կատարվում  են առգրավումներ, զննություններ, այսինքն՝ այդ ապացույցներին տրվում է դատավարական պատշաճ կարգավիճակ: Խաչատրյանը արձագանքեց նաև տեսակետին, թե կարելի էր խափանման միջոց ընտրել ոչ թե կալանքը, այլ՝ գրավը:

«Խափանման միջոցն ընտրվում է՝ ելնելով այն անհրաժեշտությունից, որ ապահովվի կասկածյալի կամ մեղադրյալի պատշաճ վարքագիծը վարույթի ընթացքում. թյուր կարծիք կա հասարակության մեջ, որ պատշաճ վարքագիծը փախուստի դիմելն է, պատշաճ վարքագծի ամենակարևոր բաղադրիչը մեղադրյալի կողմից քրեական դատավարությանը մասնակցող անձանց վրա ապօրինի ազդեցությունը բացառելն է: Հենց այս կարևոր նախապայմանից ելնելով՝ ես գտնում եմ, որ Ռոբերտ Քոչարյանին կալանքի տակ պահելն այս պահին անհրաժեշտ է, որ մենք կարողանանք լրիվ ծավալով քննություն կատարել, և բացառվի նրա ապօրինի ազդեցությունը վարույթի, քրեական դատավարության մասնակիցների վրա»,- ասաց նա: