Ի վերջո, Կոստանյանը կաշառք առաջարկե՞լ է Վիրաբյանին, թե՞ ոչ

2004 թվականի ապրիլին տեղի ունեցած հանրահավաքի մասնակիցներից մեկը` Գրիշա Վիրաբյանը, ըստ գործերի, տարվել էր ոստիկանություն և խոշտանգվել: 2012 թվականին ՄԻԵԴ-ը որոշում էր կայացրել ընդդեմ Հայաստանի Հանրապետության: Եվրոպական դատարանը կառավարությանը պարտավորեցրել էր 31 հազար եվրո վճարել տուժողին, սակայն Վիրաբյանը հայտարարել է, որ վճիռը չի կատարվել ՀՀ-ի կողմից: «Շանթ» հեռուստաընկերության «Հեռանկար» հաղորդաշարի տաղավարում ԱԺ պատգամավոր Գևորգ Կոստանյանը, անդրադառնալով այս խնդրին, նշել է, որ Եվրոպայի խորհրդի նախարարների կոմիտեն է գնահատում՝ վճիռը կատարվե՞լ է, թե՞ ոչ: Իսկ տվյալ դեպքում նման հայտարարություն չի արվել նրանց կողմից:

Պատգամավորը տեղեկացրել է նաև, որ ՄԻԵԴ-ի կողմից նման վճռի կատարումից հետո ՀՀ-ն այդ գործը վերաբացել է և այս պահին էլ քննություն է ընթանում: Ինչ վերաբերում է գումարի փոխհատուցմանը, Կոստանյանի խոսքով, 31 հազար եվրոն վճարվել է Վիրաբյանին:

Դիտարկմանը, թե Վիրաբյանը նորից է ուզում դիմել ՄԻԵԴ, պատգամավորը պատասխանել է.

«Նման դեպքերում ոչ միայն Վիրաբյանը, այլ շատ նման սուբյեկտներ, որոնց նկատմամբ եվրոպական դատարանի վճռի հիման վրա ճանաչվել է խախտման փաստը, բավարարված չլինելով իրենց ակնկալիքների տեսակետից, գտնում են, որ այլ միջոցառումներ ևս պետությունը պետք է իրականացվի: Բայց, բարեբախտաբար, վճիռը կատարվում է, թե չի կատարվում, դա քննարկվում է բացառապես Եվրոպայի կոմիտեի նախարարների կողմից, անգամ եթե անձը, որի վերաբերյալ վճիռ է կայացվում, բավարարվածություն չունի: Եվրոպայի խորհրդի նախարարների կոմիտեն կարող է համարել գործը փակված: Եվ մենք հիմա քննարկում ենք նախարարների կոմիտեի հետ գործի կատարված լինելու հանգամանքը որոշելու հարցը»,- ասել է նա:   

Կոստանյանի պնդմամբ՝ պարբերաբար նախարարների կոմիտեին ներկայացնում են «գործողությունների ծրագիր և հաշվետվություն», թե ինչ են կատարել այս գործով և ինչ են պատրաստվում կատարել: Իսկ այն նկատառմանը, որ իր բողոքներում Գրիշա Վիրաբյանը հիշատակում է նաև Կոստանյանի անունը, ավելին, ասում է, թե վերջինս համոզել է Վիրաբյանին, որպեսզի չդիմի ՄԻԵԴ և նույնիսկ կաշառք է առաջարկել, ԱԺ պատգամավորը նշել է.

«Անգամ անհարմար եմ զգում դա մեկնաբանել, որովհետև կաշառքը պաշտոնական հանցագործություն է, և կաշառքը տրվում է պաշտոնատար անձի:  Կաշառքը ստանում է պաշտոնատար անձը, պաշտոնատար անձ չհանդիսացող սուբյեկտին կաշառք չես կարող տալ, որ շատ ուզենաս էլ»,- ասել է Կոստանյանը:

Նա նշել է, որ որպես ՄԻԵԴ-ում Հայաստանի ներկայացուցիչ հաճախ է շփվում Մարդու իրավունքների եվրոպական դատարան դիմած կամ նման քայլի պատրաստվող անձանց հետ.

«Եվրոպական կոնվենցիան սահմանում է բանակցելու անհրաժեշտությունը: Ինչո՞ւ, որովհետև Եվրոպական կոնվենցիան ասում է՝ գիտեք, մինչև ինձ հասնելը, կամ թեկուզ հասել եք եվրոպական ատյաններին, փորձեք ձեր հարցերն իրար հետ լուծել: Դրա համար ես բանակցում եմ և պարտավոր եմ բանակցել բարեկամական ձևով հարցերը լուծելու համար: Վիրաբյան չէ, ինչքան վիրաբյաններ կան հիմա ՄԻԵԴ դիմած, եթե տեսնում եմ հաշտության հնարավորություն, ես իրենց հետ որպես պետության ներկայացուցիչ ՄԻԵԴ-ում նստում եմ բանակցելու»,- ընդգծել է Գևորգ Կոստանյանը: