Շիրակի մարզում մեկնարկել է գյուղաջակցության սեզոնային զբաղվածության ծրագիրը

Հունիսի 1-ից մեկնարկել է գյուղական բնակվայրերում սեզոնային աշխատանքների պետական աջակցության ծրագիրը։ Սեզոնային զբաղվածության օժանդակության ծրագիրն ուղղված է սոցիալական խնդիրների մեղմացմանը։

Հովիկ Կարապետյանն այն 95 շահառուներից մեկն է, որն օգտվել է սեզոնային զբաղվածության գյուղատնտեսական ծրագրից և նախորդ տարի իր սեփական հողը մշակելու դիմաց աշխատավարձ է ստացել։ Ընդհանուր մոտ 3 հեկտար հողատարածք է մշակում, դրա զգալի մասը ցորեն ու գարի է, մի փոքր հատվածում էլ բանջարեղեն է աճեցնում։ Աշխատում են ընտանիքի բոլոր անդամներով, միայն թե բերքահավաքին օգնող ձեռքի կարիք են ունենում։

«Երեք ամիս օգտվել եմ, ահագին օգուտ էր։ Օգնող է պետք քաղհանի ժամանակ էլ, բերքահավաքին էլ։ Ընտանիքով 5 հոգի ենք, չեն կարող էդքան կարտոֆիլը հավաքենք, մի 2 հոգի կողքից պետք է։ Մարդը գալիս, աշխատում է, թեկուզ մոտիկդ լինի, ինչ տարբերություն, էլի ծախս է, իրենց օրվա փողը դրանից եմ տվել»,- ShantNews.am-ի հետ զրույցում նշել է Հովիկ Կարապետյանը։

Ժամանակավոր աշխատուժի ներգրավման դեպքում գյուղատնտեսական աջակցության ծրագրից օգտվող շահառուն ինքն է կարգավորում հավելյալ աշխատուժի վճարման ծախսերը։ Հողագործը ծրագրով իրեն հատկացված գումարից օրավարձ է տալիս իրեն օգնողներին։ Շահառուն ինքն է որոշում՝ որտեղ և ինչ նպատակի ծառայեցնել այդ գումարը։

«Ասենք բերքահավաքը 30 օր է տևում, բնականաբար, ինքը մենակ չի կարող կատարել։ Մի 10 հոգի էլ կարող է ներգրավել, բայց մենք աջակցություն աշխատավարձը տալիս ենք անմրցունակ գործազուրկ հողագործին»,- պարզաբանում է  Միասնական սոցիալական ծառայության Ախուրյանի տարածքային կենտրոնի աշխատանքի և զբաղվածության ծրագրերի բաժնի ավագ մասնագետ Լաուրա Մարտիրոսյանը։

Սեզոնային զբաղվածության խթանման միջոցով գյուղատնտեսության աջակցման ծրագրից օգտվում են այն հողօգտագործողները, որոնք ունեն մինչև 3 հեկտար հողատարածք և աշխատաշուկայում համարվում են անմրցունակ։ Առաջնահերթություն է համարվում բարձր լեռնային և սահմանամերձ գյուղում բնակվելը, հաշմանդամություն ունենալը, նպաստառու լինելը, երկու և ավելի անչափահաս երեխա ունենալը։ Նաև հստակ պայման է՝ այս ծրագրում ընդգրկվելու համար գյուղացին պետք է պետական որևէ սուբսիդավորումից օգտվող չլինի։

Ծրագիրն ունի նաև ֆիքսված տևողություն, այն նախատեսված է մինչև 180 օրվա համար, գյուղացին իր հողը մշակում է, որի դիմաց վճարվում է 50 հազարից մինչև 350 հազար դրամ՝ կախված աշխատանքի ծավալից։

«Հաշվում ենք իրենց կատարած աշխատանքային ծավալը, մեկ օրվա համար գյուղացուն նախատեսվում է 4000 դրամ, իսկ եթե գյուղտեխնիկա է աշխատում՝ մեկ ժամի համար 5000 դրամ»,- նշել է Լաուրա Մարտիրոսյանը։

Գումարը գյուղացուն տրամադրվում է բանկային փոխանցման եղանակով, այն եկամուտ չի համարվում, չի հարկվում և, որպես պետական աջակցություն, նաև արգելանք չի դրվում, եթե շահառուն բանկային այլ ժամկետանց պարտավորություններ ունի։

Նախորդ տարի մոտ 18 մլն դրամի աջակցությունից օգտվել են Ախուրյանի տարածաշրջանի գյուղացիական 95 տնտեսություններ։ Այս տարվա աջակցության ծրագրի մեկնարկը տասը օր առաջ է տրվել, միասնական սոցիալական տարածքային կենտրոններում ընթացքի մեջ են շահառուների ցուցակների հստակեցումները, միաժամանակ տարածքային կենտրոնների մասնագետները հանդիպելու են գյուղացիներին՝ ճշտելու պոտենցիալ շահառուների ցանկը։ Դիմումատուներ արդեն ունեն, ծրագիրը չի սահմանափակում նախորդ տարի ծրագրից օգտվածներին դարձյալ դիմելու հնարավորությունը։ Առայժմ հստակ չէ, թե նախորդ տարվա համեմատ՝ գյուղատնտեսական սեզոնային զբաղվածության համար այս տարի ինչքան կկազմի ֆինանսավորման չափը։