5000 տոննայի փոխարեն՝ 3500-ը. Շիրակի մարզում պետական սուբսիդավորման ծրագրով պարարտանյութի հայտավորված քանակը չի իրացվել

Անցած երկու ամիսների ընթացքում  Շիրակի մարզի  գյուղացիական  ու ֆերմերային տնտեսություններին  պետական աջակցության ծրագրով մատակարարվել է  շուրջ 3500 տոննա պարարտանյութ՝ նախապես  հայտագրված 5000 տոննայի փոխարեն: Նախնական պահանջի ծավալների նվազումը պայմանավորված է մեկ պարկ պարարտանյութի շուկայական արժեքի թանկ գնով, ինչի պատճառով հողօգտագործողների մի մասը հրաժարվել է և ցանք կատարել առանց հողը պարարտացնելու:

Ախուրյանի տարածաշրջանի Բասեն գյուղում այս տարի 1460 հեկտար վարելահողերի 65-70 %-ն է մշակվել, չեն կարողացել ցանել դեռ աշնանը վարած հողակտորները: Գյուղացիները որակյալ սերմացու չեն կարողացել գտնել, հետո էլ, նախորդ տարվա համեմատ, մի քանի անգամ բարձրացել են դիզվառելիքի ու պարարտանյութի գները։

«Ուշացավ պարարտանյութը, 136 տնտեսությունից սկսեց նվազել, մայիս ամսին մենք ունեցանք 57 տնտեսություններ, որոնք ցանկություն ունեցան պարարտանյութ ձեռք բերել։ Կար երկու պատճառ։ Առաջինը, որ մեր գյուղի բարձրադիր դիրքի համար արդեն ուշացած էր  հողին պարարտանյութ տալը, և իրենք էլ չկարողացան ժամանակին մատակարարեին և երկրորդ՝ գնի խնդիրը կար, բավականին թանկ էր, 13-14 հազար դրամ, հենց դա էլ հիմք հանդիսացավ, որ մարդիկ հրաժարվեն»,- նշում է Բասեն գյուղի վարչական ղեկավար Համլետ Պետրոսյանը։

Հրաժարվելու պատճառներից է նաև գյուղում ոռոգման համակարգի բացակայությունը։ Բասենի վարելահողերի 95 տոկոսն անջրդի է, այս դեպքում նույնիսկ հողի պարարտացումն արդյունավետ չէ:

«Մեր գյուղում առաջնային խնդիրը ոռոգման ցանցն է, պարարտանյութ ցանեցիր, ու անձրև չեկավ, հողը վառի, կթափի բույսը, էլ իմաստը ո՞րն է  պարարտանյութի, եթե ոռոգման ցանց չկա, անջրդի են մեր գյուղի հողերը, 99 տոկոսը չի ջրվում»,- դժգոհում են բասենցիները։

Առատ անձրևների հույսին մնացած հողերում վերջին մեկ շաբաթվա ընթացքում ցորենի ու գարու հասկերը բարձրացել են, եթե կարկուտ չգա, առանց պարարտացնելու, դաշտերից լավ բերք կհավաքեն։

Մասնակի ոռոգելի են Կառնուտի ջրամբարի ավազանի հատվածում գտնվող հողերը՝ այն էլ ընդամենը 200 հեկտարը։ Ժամանակին, երբ պոմպակայանները կային, անգամ ջրել են ամենաբարձրադիր հատվածներում գտնվող հողակտորները: Շարքից դուրս եկած ոռոգման համակարգը հիմա նախատեսում են վերականգնել, դրանից է կախված  մշակովի հողերի ավելացումը։

Անջրդի հողերի պատճառով որոշ գյուղացիական տնտեսություններ այս տարի չեն օգտվել նաև գյուղապահովագրության ծրագրից: Շիրակի մարզպետարանի գյուղվարչության  տվյալներով՝ ամեն դեպքում մարզում, անցած տարվա համեմատ, ավելացել է հողերի ապահովագրության պայմանագրերի թիվն ու հեկտարները։

«Այս տարի ապահովագրվել են շուրջ 1770 հեկտար ցանքատարածություններ, իսկ շահառուները 1255-ն են։ Նախորդ տարվա համեմատությամբ՝ պետք է ասել, որ նախորդ տարի ունեինք  1420 հեկտար ապահովագրված ցանքատարածքներ, այս տարի և՛ ապահովագրողների թիվն է ավելացել, և՛ տարածքները»,- նշում է Շիրակի մարզպետարանի գյուղատնտեսության և բնապահպանության վարչության պետ Ռոման Համայակյանը։

Ապահովագրված ցանքատարածքների հիմնական մասը հացահատիկային կուլտուրաները և կարտոֆիլն են: Մարզում բանջարաբոստանային կուլտուրաների և կարտոֆիլի ցանքատարածքներն ավելացել են, իսկ հացահատիկայինները մի փոքր նվազել: Լեռնային ու հյուսիսային տարածաշրջաններում այս տարի գյուղացիական տնտեսություններն ավելի շատ նախընտրել են բազմամյա մշակաբույսերի ցանք կատարել: