Գյումրիի «Բարեկամության» այգու բեմի վերակառուցման համար հանրային արշավ է սկսվել

Այսօրվանից մեկնարկել է Գյումրիի «Բարեկամության» այգու բեմի վերակառուցմանն ուղղված հանրային արշավը։ Այսինքն՝ հայտարարվել է դրամահավաք և բոլոր ցանկացողները կարող են նվիրատվություն կատարել ու բեմի վերակառուցման մասնակից դառնալ։ «Բարեկամության» այգու բեմը 60-ականներին կառուցվել է խորհրդային մոդեռնիզմի ոճով։ Նախատեսվում է այն վերակառուցել՝ պահպանելով նախկին տեսքը, միևնույն ժամանակ՝ նորագույն մեթոդների կիրառմամբ։ Այս մասին այսօր երկխոսության մեդիա կենտրոնում խոսել են ծրագրի պատասխանատուները։

Հիմա խարխուլ բեմը խորհրդային տարիներին «Բարեկամության» այգում նորարարությունների հարթակ է ծառայել։ Այստեղ ելույթ են ունեցել այդ տարիներին ոչ այնքան ընդունված ռոք  և երաժշտության այլ ազատ ոճերի կատարողները։ 88-ի երկրաշարժի հետևանքով բեմը դարձավ վթարային, բարեկամության այգին վերածվեց տնակային թաղամասի։ Տարիների ընթացքում անխնամ բեմահարթակը հիմա խիստ վթարային է, բայց ոչ այնքան, որ հնարավոր չլինի վերականգնել։ «Բարեկամության» այգու շինարարական աշխատանքների համակարգողը շեշտում է՝ առաջնայինը ամրակայումն է, որ բեմը ապահովագրվի հետագա փլուզումներից։

«Կատարվելու է մետաղական էլեմենտներով ամրացում, որը կօգնի, որ չշարունակվեն փլուզումները։ Հետո հերթը կհասնի դեկորատիվ մասին, կպատվի բեմը նուրբ ցանցով։ Կդառնա ԱՐՏ օբյեկտ, երեկոյան լուսավորություն կունենա։ Բեմը կլինի կանչող օղակ, որ մտնեն այգի, տեսնեն ինչպես է այն վերակառուցված, միևնույն ժամանակ վերապրեն իրենց հուշերը»,- ասել է «Բարեկամության» այգու շինարարական աշխատանքների համակարգող Մուշեղ Գոնչոյանը։

Բացօթյա բեմը կոմերցիոն նպատակներով չի օգտագործվելու, այլ ծառայելու է բացառապես սոցիալական հարթակ Գյումրիում գործող խմբերի ու անհատ կատարողների համար։ Գյումրիում ներկայում հանրային բացօթյա բեմահարթակ չկա։

Հանրային բեմահարթակը նախատեսվում է, որ վերակառուցվելու է հանրային ջանքերով։ Բեմի վերականգնման համար հանրային արշավ է սկսվել, որի նպատակն է դրամահավաք անցկացնել, որը տևելու է 3 ամիս։ Նախատեսվում է 3 ամսում հավաքագրել բեմի վերակառուցման համար անհրաժեշտ գումարը՝ 100 հազար դոլար։

«Սա առաջին հերթին կոչ է միանալու և դառնալու զբոսայգու մի մասը։ Այգու յուրաքանչյուր էլեմենտ, վերակառուցման կոնցեպտը հիմնված է բարեկամության և ընկերության սկզբունքի վրա»,- ասել է «Զբոսաշրջության և քաղաքաշինության» (ТUF) բարեգործական հիմնադրամի Գյումրիի զարգացման ծրագրերի ղեկավար Ելենա Մուրադյանը։

Հանրային արշավը նախաձեռնել է «Զբոսաշրջության և քաղաքաշինության» (ТUF) բարեգործական հիմնադրամը՝ «ռեԱրմենիա» համագործակցության հարթակում։ Համոզված են ճիշտ ռազմավարության դեպքում դրամահավաքը կհաջողի։ Առավոտյան է օնլայն հարթակում դրամահավաքը մեկնարկել ու արդեն հանգանակություններ կան։

Բեմի վերակառուցման ժամկետները կախված են դրամահավաքի արդյունքներից։ «Բարեկամության» այգու վերակառուցումը մեկնարկեց այս տարվա գարնանը։ Որոշ օբյեկտների շինարարությունը նախատեսված է ավարտել այս տարվա աշնանը, իսկ ամբողջական այգու վերակառուցման վերջնաժամկետը 2023-ի աշունն է։