ԱԺ աշխատակազմ-ՔՀԿ համագործակցություն` հանուն ներառականության. քննարկում խորհրդարանում

Մեզ համար չափազանց կարևոր է «ակտիվ քաղաքացու» գաղափարի ներդրումը գործունեության բոլոր ոլորտներում. քաղաքացին պետք է իրեն ավելի մոտ զգա Ազգային ժողովին, լավ պատկերացնի խորհրդարանական երկրի կառավարման սկզբունքները, կապ ունենա իր պատգամավորի հետ: ԱԺ աշխատակազմն էլ իր հերթին պետք է բարենպաստ պայմաններ ստեղծի այդ կապի ամրապնդման համար` սկսած տեխնիկական հագեցվածությունից մինչև գիտակրթական հարթակների ստեղծումն ու ներդրումը: Այս մասին ասել է ՀՀ ԱԺ աշխատակազմի ղեկավար-գլխավոր քարտուղար Վահան Նարիբեկյանը` «Ազգային ժողովի աշխատակազմ-ՔՀԿ համագործակցություն` հանուն ներառականության» խորագրով կլոր-սեղան քննարկման ընթացքում, տեղեկացնում է ՀՀ ԱԺ պաշտոնական կայքէջը:

Քննարկումը տեղի է ունեցել հուլիսի 15-ին ԱԺ աշխատակազմի և Խորհրդարանական կենտրոնի (Կանադա) աջակցությամբ` «Աջակցություն Հայաստանի խորհրդարանին» ծրագրի շրջանակում, որին մասնակցել են պատգամավորներ, կանանց, երիտասարդների, հաշմանդամություն ունեցող անձանց ներառականության հիմնահարցերով զբաղվող քաղաքացիական հասարակության մի շարք կազմակերպությունների ներկայացուցիչներ, ԱԺ աշխատակազմի աշխատակիցներ:

ԱԺ աշխատակազմի ղեկավար-գլխավոր քարտուղարը շնորհակալություն է հայտնել Խորհրդարանական կենտրոնի գործընկերներին մշտական աջակցության համար:

ՀՀ ԱԺ աշխատակազմը Խորհրդարանական կենտրոնի հետ համատեղ դեռևս 2022 թ. մարտի 7-ին կազմակերպել էր կլոր-սեղան քաղհասարակության կազմակերպությունների հետ` քննարկելու ԱԺ աշխատակազմի կողմից ներդրվող Կորպորատիվ ռազմավարական ծրագրի ներառականության հարցերը: ՀՀ ԱԺ աշխատակազմի ղեկավարի տեղակալ Հեղինե Խաչիկյանի խոսքերով` այսօրվա քննարկման նպատակն առաջին հանդիպումից հետո խորհրդարանի ձեռնարկած քայլերի ներկայացումն է` Կորպորատիվ ռազմավարական ծրագրում ներառականությունն առաջ մղելու, ինչպես նաև համագործակցության հարթակների ստեղծման գործնական քայլերը հստակեցնելու համար: Նա ներկայացրել է այն հարցերի շրջանակը, որոնց իրականացման համար ակնկալվում է հասարակական կազմակերպությունների աջակցությունը` գործընթացներն ավելի ներառական դարձնելու համար: Մասնավորապես, շեշտադրվել է Ազգային ժողովի շենքն ավելի ներառական և հաշմանդամություն ունեցող անձանց համար ավելի մատչելի դարձնելու կարևորությունը՝ հաշվի առնելով շենքի պատմամշակութային կոթողի կարգավիճակը, ինչպես նաև Ազգային ժողովի կայքէջի և կրթական ծրագրերի ներառականությանը հարցերը:

Խորհրդարանական կենտրոնի Եվրոպայի և Ասիայի տարածաշրջանային տնօրեն Իվո Բալինովը, շնորհակալություն հայտնելով պատգամավորներին, ԱԺ աշխատակազմին, քաղաքացիական հասարակության կազմակերպությունների ներկայացուցիչներին քննարկմանը մասնակցելու համար, նշել է, որ այս միջոցառումը կարևոր քայլ է` համաձայնեցնելու և սկսելու գործնական աշխատանքային գործընթաց: Նա քննարկման մասնակիցներին է փոխանցել ՀՀ-ում Կանադայի արտակարգ և լիազոր դեսպան Էլիսոն Մարի Լը Քլերի ուղերձը:

«Աշխատանքի և սոցիալական հարցերի մշտական հանձնաժողովի գործառույթների առարկան է նաև հաշմանդամություն ունեցող անձանց համար բարենպաստ իրավական միջավայրի ձևավորումը: Ծրագրի շրջանակում քաղաքացիական հասարակության կազմակերպությունները հանդես են գալու որպես գործընկեր և խորհրդատու, թե ինչպես ավելի մատչելի դարձնել ԱԺ շենքը, պաշտոնական կայքէջը և, ընդհանրապես, ԱԺ-ի գործունեությունը հասանելի դարձնել հաշմանդամություն ունեցող անձանց: «Մեր հանձնաժողովի հենքի վրա արդեն իսկ քաղհասարակության հետ ձևավորված հարթակներ կան: Մենք ներգրավվում ենք նաև ԱԺ աշխատակազմի հարթակում ձևավորված աշխատանքային խմբերում, որի նպատակն է ԱԺ գործունեությունը դարձնել ավելի ներառական` ի նպաստ հանրության մեջ հավասար իրացման»,- ասել է հանձնաժողովի նախագահ Հերիքնազ Տիգրանյանը:

Աշխատանքի և սոցիալական հարցերի մշտական հանձնաժողովի անդամ Զարուհի Բաթոյանի խոսքերով` քննարկման առաքելությունը խորհրդարանն ավելի ներառական դարձնելն է:

«Կանադայի գործընկերները պատրաստակամություն են հայտնել զարգացնելու ԱԺ աշխատակազմի կարողությունները, վերանայելու շենքային պայմանները, ապահովելու տարբեր ծրագրերի իրականացումը: Կարծում եմ` լավ ավանդույթ է ձևավորվում, և անցնում ենք գործնական քայլերի»,- ասել է պատգամավորը:

Քաղաքացիական հասարակության ներկայացուցիչները ևս մեկ անգամ պատրաստակամություն են հայտնել աջակցելու ԱԺ աշխատակազմին: Քննարկվել են մասնագիտական աշխատանքային խմբեր ձևավորելուն, խորհրդարանի շենքի մատչելիությանը և ԱԺ այցելող քաղաքացիների հետ աշխատող անձնակազմի վերապատրաստմանը վերաբերող հարցեր: Առաջարկվել է ԱԺ-ի` նախագծվող նոր կայքէջը փորձարկել ներառականության` տեղեկատվության հասանելիության և մատչելիության տեսանկյունից` սահմանափակ տեսողություն կամ լսողություն ունեցող անձանց համար:

Կողմերի միջև ձեռք է բերվել պայմանավորվածություն՝ հանդիպումները դարձնելու պարբերական: