Շոգ եղանակները նպաստում են աղիքային վիրուսների ակտիվացմանը․ Գյումրիի մանկական և ինֆեկցիոն հիվանդանոցներում հոսպիտալացումների թիվն ավելացել է

Գյումրիի բժշկական հաստատություններում երկու շաբաթվա ընթացքում արձանագրվել է աղիքային վարակիչ հիվանդությունների թվի աճ։ Մեծահասակների և երեխաների շրջանում հոսպիտալացումներն են ավելացել։ Մասնագետները սա համարում են ամառային սեզոնին բնորոշ ակտիվացում, պատճառը շոգերն են և սննդի օգտագործման կամ պահպանման ոչ ճիշտ պայմանները։

Գյումրիի մոր և մանկան ավստրիական հիվանդանոցում հուլիս ամսվա այս 15 օրերին հոսպիտալացումերի թիվը կտրուկ ավելացել է։ Ամռան շոգին նաև թոքաբորբի ախտանշաններով մանկահասակ 30-ից ավելի երեխաների են ընդունել, այս պահին ստացիոնար բուժումը շարունակում է 10 երեխա։ Հիվանդանոցի մանկական բաժանմունքի մահճակալները գրեթե ամբողջությամբ զբաղված են։

«Օբստրուկտիվ բրոնխիտով հիվանդ երեխաներ ունենք այս պահին պառկած: Ամառվա այս սեզոնին մենք ունենք ավելի շատ աղեստամոքսային տրակտի խանգարումներով երեխաներ, որոնց մոտ հիմնականում ադենովիրուսային ինֆեկցիա է, այդ ժամանակ պրոցեսի մեջ է մտնում նաև աղեստամոքսային տրակտը»,- ասում է Գյումրիի մոր ու մանկան ավստրիական հիվանդանոցի մանկական բաժանմունքի վարիչի ԺՊ Ժաննա Սարգսյանը։

Բժիշկների ախտորոշումներով հայտնաբերված աղիքային վարակը՝ ադենովիրուսային ինֆեկցիան, որն ուղեկցվում է աղեստամոքսային տրակտի խանգարումներով, մասնագետները համարում են սեզոնին բնորոշ վիրուսային տարածվածություն։ Ամառային շոգ եղանակը նպաստավոր պայմաններ է ստեղծում աղիքային ինֆեկցիաների ակտիվացման համար։

«Դրանք հիմնականում էնտերովիրուսներով կամ ռոտավիրուսներով են պայմանավորված, որոնք ընթանում են փսխումներով, լուծով, ջերմությամբ։ Սա նորություն չէ մեզ համար, ուղղակի էս տարի մի փոքր ավելի շատ են դեպքերը»,- ասում է «Գյումրի» ԲԿ-ի ինֆեկցիոն բաժանմունքի ղեկավար Կարինե Տոնոյանը։

Հունիսի վերջերից արդեն «Գյումրի» բժշկական կենտրոնի ինֆեկցիոն բաժանմունքում դիմելիության աճ նկատվել։ Միայն հուլիս ամսվա առաջին կեսին հոսպիտալացվել ու բուժում է ստացել աղիքային վարակներին բնորոշ ախտանշաններ ունեցող մոտ 80 հիվանդ՝ դարձյալ մեծամասամբ երեխաներ։

«Երեխաների հոսքը  բավականին շատ է, նախորդ ամսվանից դիմելիությունն ավելացավ։ Երեխաների մոտ հիմնականում բարձր ջերմություն է՝ 39-40 աստիճան, ցնցումներ, ուշագնացություն, կոլապտոիդ վիճակներ։ Դրանք ուղեկցվում են անզուսպ փսխումներով, բավականին հաճախակի, որովայնի ցավով և լուծով»,- նշում է վարակաբանը։

Հոսպիտալացվածների մեջ քիչ չեն դեպքերը, երբ ընտանիքի անդամները նույն գանգատներով դիմել են ինֆեկցիոն բաժանմունք և ստացիոնար բուժում անցել։ Վիրուսների տարածումը հիմնականում  կոնտակտային կամ օդակաթիլային ճանապարհով է, և դա է պատճառը, որ ընտանիքում մեկի մոտ ախտանշաններ ի հայտ գալուց հետո շղթայաբար այն փոխանցվում է նաև մյուսներին։ Ինֆեկցիաների ակտիվացմանը զուգահեռ, տապին ակտիվանում են նաև բակտերիալ աղիքային վարակները, որոնց զարգացման համար նպաստավոր է սննդային գործոնը։

«Պտուղ-բանջարեղենի լավ չլվանալը, ձեռքերը մաքուր չպահելը, դրանք գործոններ են, որ նպաստում են վարակի տարածմանը։ Բացի դրանից՝ եթե մսամթերքը, երշիկեղենը ոչ նորմալ պայմաններում են պահպանվում կամ թերմիկ մշակման լավ չեն ենթարկվում, կարող է բերել բակտերիալ աղիքային ինֆեկցիաների»,- նշում է Կարինե Տոնոյանը։

Վիրուսային կամ աղիքային հիվանդություններից ոչ բոլորի դեպքում է, որ վարակաբաններն ունեն հստակ անվանում, թե ինչ տեսակի վիրուսի հետ գործ ունեն, այսինքն՝ լաբորատոր ձևով չի հայտնաբերվում, թե ինչ հարուցիչ է, բայց միևնույն ժամանակ բոլոր հիվանդների մոտ առկա նույն ախտանշաններից պարզ է, որ աղիքային վարակիչ հիվանդությունների տարածվածությանը նպաստող միջավայրը բավական ակտիվ է, և դա կարող է լինել սնունդը, դրա ոչ ճիշտ պահպանումը, գուցե նաև ջուրը։