«Մենակատարների շքերթ»․ Գյումրիի պետական սիմֆոնիկ նվագախմբի համատեղ համերգը Բրյուսելի եվրոպական դպրոցի սիմֆոնիկի պատանի երաժիշտների հետ

Բրյուսելի եվրոպական դպրոցի սիմֆոնիկ նվագախմբի պատանի երաժիշտները նորից Գյումրիի հյուրն են, Հայաստան են այցելել իրենց դիրիժորի՝ ծնունդով գյումրեցի Արման Սիմոնյանի հետ, որը մշտապես ու սիրով եվրոպական հարթակում հանրայնացնում է Հայաստանյան մշակույթը։ Բրյուսելի եվրոպական դպրոցի սաները Գյումրիի պետական սիմֆոնիկ նվագախմբի հետ հանդես են եկել համատեղ համերգով։ Բրյուսելի  եվրոպական  դպրոցի պատանի երաժիշտների ծնողները հանդիսանում են Եվրոպական խորհրդարանի անդամներ։

Եվրոպական դպրոցի սիմֆոնիկ նվագախմբի ղեկավար և դիրիժոր, ջութակահար Արման Սիմոնյանը երկար տարիներ է, որ Բրյուսելում ղեկավարում է նվագախումբը, իր սաների մասին մեծ ոգևորությամբ է խոսում, որոնք եվրոպական դպրոց են հաճախում 9-ը տարեկանից։

10 տարուց ավելի է՝ ղեկավարում է Բրյուսելի եվրոպական դպրոցի լարային բաժինը, դպրոցում հիմնել է սիմֆոնիկ նվագախումբ։ Նվագախմբի ամբողջ կազմով 4 տարի առաջ է եղել Գյումրիում ու դարձյալ սիմֆոնիկ նվագախմբի հետ մասնակցել «Սերունդների երկխոսություն» խորագրով համերգին։ Այս անգամ Հայաստան է եկել նվագախմբի շատ փոքր կազմով՝ Եվրոպայի տարբեր երկրներ ներկայացնող լավագույն 4 պատանի երաժիշտներով։

«Սա ինձ համար ֆանտաստիկ հնարավորություն է, որը ես հեքիաթներում եմ տեսել։ Այս համերգին 2 տարի եմ սպասել, այն լրիվ փոխեց իմ կյանքը։ Սա իմ կյանքի առաջին համերգն է, որտեղ ես ելույթ եմ ունենում պրոֆեսիոնալ երաժիշտների հետ, իսկ այդ հնարավորության համար ես պարտական եմ Հայաստանին»,- ասում է Բրյուսելի եվրոպական դպրոցի սան Ջուլիա Բարբերոն։

«Արդեն 3-րդ տարին է, որ սովորում եմ Արման Սիմոնյանի մոտ, հասցրել եմ ջութակի շատ գեղեցիկ գործեր նվագել սովորել, նա ինձ մոտիվացնում է ու ստիպում շատ պարապել, ճիշտ է՝ դժվար է, բարդ գործեր ենք նվագում, երբեմն հոգնում եմ, բայց նա մեզ պարտադրում է միշտ ժպիտով նվագել»,- նշում է Բրյուսելի եվրոպական դպրոցի սան Իրինա Բոդեվինսը։

Բրյուսելյան դպրոցի հայաստանյան այցը և Գյումրիի պետական սիմֆոնիկ նվագախմբի հետ համատեղ համերգը մշակութային համագործակցությունից բացի, մեկ այլ կարևորություն էլ ունի։ Այն հնարավորություն է Հայաստանն ու հայկական մշակույթը Եվրոպայում հանրայնացնելու։

«Գլխավորն այն է, որ մեր երաժիշտ երեխաները հնարավորություն ունեն նվագել պրոֆեսիոնալ երաժիշտների հետ, դա մեզ համար մի յուրահատուկ կամուրջ է, հատկապես որ Հայաստանը շատ գեղեցիկ երկիր է։ Հայաստանն ու Իտալիան բարեկամ երկրներ են, և այս իրավիճակում մենք բարեկամանում ենք նաև մշակութային ոլորտում, քանի որ մեր երեխաները Հայաստանում պրոֆեսիոնալ նվագախմբի հետ երաժշտություն են ստեղծում»,- իր տպավորությունների մասին է պատմում Եվրոպական խորհրդարանի Իտալիայի ներկայացուցիչ Միրկո Բարբերոն։

Բրյուսելի եվրոպական դպրոցի նվագախմբի դիրիժորը կապը հայրենի քաղաքի հետ պահպանում է Կարա Մուրզայի անվան երաժշտական քոլեջի միջոցով, պարբերաբար վարպետության դասեր է անցկացնում գյումրեցի երիտասարդ ջութակահարների համար։ Այս անգամ քոլեջում մասնակցել է լարային գործիքների ամառային ճամբարին։

Մենակատարների շքերթին եվրոպացի ջութակահարները և Գյումրիի պետական սիմֆոնիկ նվագախումբը կատարել են համաշխարհային կոմպոզիտորների՝ Չայկովսկու, Բախի, Մենդելսոնի և այլ դասականների լավագույն ստեղծագործությունները։ Համատեղ համերգային հանդիպման Գյումրիի սիմֆոնիկի հետ եվրոպացի  պատանի երաժիշտներն արդեն ծրագրում են նաև հաջորդ տարի։ «Մենակատարների շքերթ», որով Գյումրիի սիմֆոնիկը փակեց իր համերգաշրջանը։