Գյումրիում հուղարկավորություններ են կատարվում անթույլատրելի տարածքներում՝ գերեզմանատների սահմաններից դուրս

Գյումրիում գործող 3 գերեզմանատներում նոր հողհատկացումների համար վաղուց տեղ չկա, բայց անթույլատրելի տարածքներում հուղարկավորությունների արգելք չի գործում, որի հետևանքն է գերեզմանատների  նախատեսված սահմաններից դուրս կատարվող թաղումները։ Խնդիրը  նոր չէ, բայց կարգավորումների համար հստակ մեխանիզմներ ու լծակներ չկան։ Պատասխանատու կառույցները սա բացատրում են ռեսուրսների պակասով, ինչի արդյունքում գերեզմանատներում ամենօրյա վերահսկողություն իրականացնելն անհնար է։ Այս մասին «Երկխոսության մեդիա» կենտրոնում հրավիրված քննարկմանն ասել է Գյումրիի «Հավերժ հիշատակ» ընկերության տնօրենը։

«Ես համաձայն եմ, որ կատարվում են բոլոր տեսակի ապօրինություններ, բայց ինչու է մեր բնակչության մեջ մտած, որ կարելի է մտնել գերեզմանատներ ու պղծել դրանք, կատարել թաղումներ այնտեղ, որտեղ արդեն հուղարկավորվածներ կան։ Խոսքը մեկ տարի առաջ կատարած հուղարկավորության մասին է, որտեղ  կառուցել են, նույնիսկ չեմ պատկերացնում, թե ինչ, դա դուրս է բոլոր տեսակի նորմերից։ Էս պահին, երեկվա դրությամբ դադարեցված է այդ շինարարության ընթացքը։ Այստեղ խնդիր է առաջացել մայրուղով անցնող ճանապարհի վրա կառուցելու համար։ Մեր անձնակազմը շատ փոքր է, և խնդիրն այն է, որ այդ քիչ կազմով հնարավորություն չենք ունենա խստորեն  ու մանրակրկիտ վերահսկել, որովհետև 3 գերեզմանատունը միասին մոտ 80 հա է կազմում, մեզ համար դժվար է այդքան տարածքում վերահսկողություն իրականացնել։ Եթե մենք ուզում ենք ունենալ վերահսկվող տարածքներ, պետք է ներդրվեն մեծ գումարներ, վարչական ռեսուրս, բանվորական ուժ և սպասարկում»,- նշել է Գյումրիի «Հավերժ հիշատակ» ՓԲԸ տնօրեն Էդուարդ Բաղրամյանը։

Հուղարկավորություն կատարելու համար ազատ հողատարածքների խնդրի լուծման  անթույլատրելի հատվածներում կատարվող հուղարկավորությունները բացառելու այլընտրանքային տարբերակը  դիակիզման մեթոդն է։ Սրանով է պատճառաբանվում դիակիզարաններ կառուցելու անհրաժեշտությունը։

«Մենք օրենք ունենք, որն ընդունվել է 2006 թվականի փետրվարի 27-ին դիակիզման վերաբերյալ, որը մինչև հիմա չի կիրառվում, վրահուղարկավորումների մասին օրենք կա, բայց շատ քիչ է կիրառվում, նույնը նաև վերահուղարկավորումների մասին կարող ենք ասել՝ օրենքով սահմանված է, բայց չի վերահսկվում ու շատ դեպքերում նաև գաղտնի է արվում։ Իսկ դիակիզարանների  մասով որևէ աշխատանք չի տարվում, ինչը մեր  եկեղեցին մերժեց»,- նշել է  «Սրաբազան հող» ՀԿ նախագահ Սուսաննա Էլբակյանը։

Քննարկմանը ներկա Շիրակի թեմի հոգևորական Տեր Նշան քահանա Պանֆյորովը շեշտել է, որ Հայ Առաքելական եկեղեցին, այո՛, դեմ է դիակիզմանը և չի հորդորում դիակիզում անել, քանի որ այն քրիստոնեական չէ։

«Երբ որ դիակիզումը կատարվում է, եթե երբևէ ներկա լինեք կհասկանաք, որ մի փոքր դժոխային կրակների է նման, և այնտեղ հանգստություն չկա։ Իսկ երբ որ գնում եք գերեզմանատուն, շրջում եք այնտեղ, ի զարմանս շատերի՝ հանգստություն եք ձեռք բերում, ինչը երբեք դիակիզման ժամանակ չեք զգա»,- ասում է Շիրակի թեմի հոգևորական Տեր Նշան քահանա Պանֆյորովը։

Գյումրիի երեք գերեզամանատներում  հուղարկավորությունների համար տեղ չկա, դրանք համարվում են փակ։ Նոր հողատարածք հատկացնելու գործընթացը դեռ շարունակվում է։ 4-րդ գերեզմանատունն է հիմնվում, որի համար քաղաքապետարանը մեկ տարի առաջ Շիրակ գերեզմանատան հարակից հատվածում ձեռք է բերել մոտ 9 հա հողատարածք, որը պատկանում է նախկին խոշորացված Մարմաշեն համայնքին։ Հողհատկացման գործընթացը մեկ տարի է՝ փաստաթղթային ձևակերպումների փուլում է ու դեռ հայտնի էլ չէ, թե երբ կավարտվի։