Շիրակի մարզում հացահատիկի բերքահավաքը շարունակվում է․ աշնանացան ցորենի միջինը՝ 25 ցենտներ բերք են ակնկալում

Շիրակի մարզի Ախուրյանի, Անիի և Արթիկի տարածաշրջաններում հացահատիկի բերքահավաքը շարունակվում է։ Վերջին օրերի անձրևները մի փոքր խախտել են հացքաղի ժամկետները ցածրադիր գոտիներում։ Ամբողջ մարզում կատարվել է մոտ 32 հազար հա ցանք։ Նախորդ տարիների համեմատ ուժեղ կարկտահարություններ չեղան, տեղումներն էլ նորմայի սահմաններում էին և նախնական գնահատումներով բերքի միջին ցուցանիշի բավարար արդյունք է սպասվում։ Օրինաչափորեն, Շիրակի մարզում աշնանացան ցորենի միջինը՝ 25 ցենտներ, իսկ գարու 15-20 ցենտներ բերքատվություն է գրանցվում։

«Անցյալ տարի հեչ անձրևային չէր, 10 հա ցանել էի, ոչինչ չհավաքեցի, էս տարի ընդամենը 1 հա էի ցանել, անցած տարվանից շատ հավաքեցի»,- ասում է հողագործը։

Մարզի երեք տարածաշրջանների բերքատվության նախնական արդյունքներով գյուղատնտեսները կանախատեսում են ցորենի միջին բերքատվության 3 անգամ անցած տարվա համեմատ: Բերքի շատ ու լավ լինելն էլ կախված է սեզոնին կատարված մշակությունից։ Թե հողագործը ժամանակին ու բավարար պարարտանյութ է տվել ու ջրել է արտերը՝ լավ բերք է ստացել։ Որակից ու քանակից դժգոհ են անջրդի հողերի տերերը։

«Ով որ կարողանում է ջրել, պարարտանյութ տալ, լավ բերք ստանում է, ով որ չէ, արդյունք չի ստանում։ Իմ արտը անջրդի հողերում է, այս տարի ոչ մի հատիկ չեմ հավաքել, թողել եմ դաշտը էդպես չորանա, նույնիսկ որպես անասնակեր չեմ կարող հավաքել, հիմա տեսնենք ով պտի ցորեն ծախե, որ առնենք ցանենք»,- ասում է ախուրյանցի գյուղատնտեսը։

Ախուրյանի տարածաշրջանում հացահատիկի ցանքատարածքները պակասել են մոտ 15 տոկոսով։ Պատճառը նախորդ տարի ստացած բերքի վատ արդյունքն էր, որի պատճառով գյուղացիական տնտեսությունները սերմացու չունեցան, փոխարենը ցորենի դաշտերում սկսեցին ավելի շատ կարտոֆիլ մշակել։ Պարարտանյութն էլ թեկուզ սուբսիդավորված՝ թանկ գնի պատճառով շատ հողագործներ չկարողացան ձեռք բերել։ Հացահատիկի բերքատվության վրա որոշակի ազդեցություն են ունեցել նաև գարնան կեսին ջերմաստիճանի նվազումը։

«Անջրդի հողատարածքներից կարելի է ասել շատ քիչ՝ 5-7 ց կամ ամենաշատը 10 ց բերք է սպասվում, մի քիչ բարվոք է ջրովի դաշտերի վիճակը։ Բայց ընդհանուր առմամբ այս տարի բերքը ցածր է, որի պատճառներից մեկն էլ գարնանային աննախադեպ ցրտահարություններն էին, որովհետև մինչև մայիս ամսվա առաջին տասնօրյակը ցրտահարություններ եղան, որից պիտի տուժեր բերքը, փաստորեն այդպես էլ եղավ»,- ասում է Ախուրյանի համայնքապետի տեղակալ Վարդան Իկիլիկյանը։

Կոմբայնավար Ռաֆիկ Հարությունյանը գրեթե ամեն տարի նույն արտերում հացքաղ է անում։ Վերջին տարիների արդյունքները համեմատելով է ասում, թե բերքահավաքից հետո գյուղացին իր ծախսերը չի հանի։

«Օրական երևի 10-15 տ բերք եմ հավաքում, դա շատ քիչ է, ժողովուրդը չի կարողացել ջրել, բերքը քիչ է եղել։ Ես ամեն տարի էս նույն տեղում քաղել եմ ու միշտ շատ լավ բերք է ստացվել, բայց էս տարի լավ չէ։ Ծախսերի համեմատ զրո էլ չեն կանգնի մարդիկ, հազիվ կեսը հանեն»,- ասում է  նա։

Ցածրադիր գոտիներում ընթացող հացքաղին զուգահեռ բարձրադիր հատվածներում խոտքաղ է կատարվում։ Խոտհարքները մարզում չեն պակասել, ընդհանուր առմամբ, այս տարի խոտի բերքից չեն դժգոհում։ Նախորդ տարիների խոտի պակասի պատճառով տնտեսությունները ստիպված անասնագլխաքանակը նվազեցրին:

Մի քանի օրից արտհունձը կսկսվի նաև Աշոցքում և Ամասիայի հացահատիկային մշակաբույսերի ցանքատարածքներում Ընդհանուր առմամբ հացահատիկային մշակաբույսերի ցանքերը մարզում նվազել են մոտ 4 հազար հեկտարով։ Բայց մարզպետարանի գյուղատնտեսության վարչության նախնական գնահատումներով նախորդ տարվա համեմատ մարզում գյուղատնտեսական մշակաբույսերի համախառն բերքի աճ է կանխատեսվում: