Ի՞նչ հանձնարարականներ տրվեցին գործակարգավարական հերթական խորհրդակցության ժամանակ

Ինչու՞ որոշ փողոցներում արտաքին լուսավորությունն ամբողջական չէ, ո՞ր փուլում է Երևանյան լիճ թափվող կոյուղագծերի խնդիրների ուղղությամբ հայտարարված մրցույթը.Երևանի քաղաքապետարանում անցկացվել է գործակարգավարական հերթական խորհրդակցությունը:

Հրաչյա Սարգսյանը խորհրդակցությունը սկսեց հիշեցմամբ. Երևանը նախորդ ուրբաթ ունեցավ նոր փոխքաղաքապետ. Տիգրան Ավինյանը համակարգելու է քաղաքապետարանի շինբարեկարգման, բնապահպանության, մշակույթի ոլորտները:

Սարգսյանը հերքեց քաղաքապետարանում շրջանառվող այն խոսակցությունները, թե իբրև գործակարգավարական խորհրդակցություններ էլ չեն անցկացվելու, հակառակը, ըստ նրա այդ ձևաչափով հնարավոր է դառնում աշխատանքային միջավայրում համատեղ քննարկել փոխկապակցված խնդիրները և դրանց ուղղությամբ առաջարկել լուծումներ: Ապա ըստ ոլորտների, բաժին առ բաժին զեկուցեցին թե անցած շաբաթվա ընթացքում մայրաքաղաքում ի՞նչ դեպքեր են արձանագրվել:

Այժմ՝ հանձնարարականների մասին: ՄԱԿ-ի էներգախնայողության ծրագրի շրջանակնում մրցութային գործընթացով մայրաքաղաքի 12 մանկապարտեզների տանիքներ պետք է վերանորոգվեին, ուստի հանձնարարվել էր հետևել այդ աշխատանքների ընթացքին: Զեկուցեցին.պայմանագիր հավանաբար կկնքվի 10 օր անց, ապա և աշխատանքները կմեկնարկեն:

Անվտանգության նկատառումներից ելնելով հանձնարարվել էր պարզել, ինչու՞ որոշ փողոցներում արտաքին լուսավորությունն ամբողջական չէ, զեկուցեցին, որ այդ փողոցներում հարկավոր է ծառերի էտ իրականացնել, որ աճած ճյուղերը չխանգարեն արտաքին լուսավորության ամբողջական տարածմանը: Ուստի տրվեց այս ուղղությամբ հանձնարական:Ծիծեռնակաբերդի բարձունքում էլ 6.5 հա վրա պետք է տնկվի 3000 ծառ: Զեկուցեցին, որ նախապատրաստական աշխատանքները ընթացքի մեջ են և եթե եղանակային պայմանները թույլ տան, ծառատունկը կիրականացվի հոկտեմբերի 15-ից:

Քաղաքապետի խորհրդական Արեյանին հանձնարարվել էր զեկուցել Երևանյան լիճ թափվող կոյուղագծերի խնդիրները լուծելու նպատակով Հրազդան գետի երկայնքով նոր կոյուղագիծ կառուցելու աշխատանքների մասին: Արեյանը նշեց, որ սեպտեմբերի 12-ին համապատասխան մրցույթը չի կայացել մասնակից չլինելու համար: Հավելեց, որ տարիների ընթացքում թեմայի շուրջ մասնագիտական դիտարկումներ շատ են եղել, տարբեր կազմակերպություններ էլ մինչ այս շատ մոտեցումներ են առաջարկել, սակայն ոչ մեկ չի դիմել մրցույթին մասնակցելու՝ նկատի ունենալով և նախագծի բարդությունները և վերանայման իրենց պոտենցիալի բացակայությունը, նշեց Արեյանը: Քաղաքապետ Սարգսյանն էլ առաջարկեց, որպես բնապահպանական բաղադրիչ, հարցը լուծելի դարձնել Ասիական զարգացման բանկի ծրագրերի միջոցով:

Մանրամասները՝ ռեպորտաժում: