ԿԸՀ անդամների թեկնածուներ են առաջադրվել Աննա Գրիգորյանը, Ժիրայր Կարապետյանը և Նունե Հովհաննիսյանը

«ԱԺ կանոնակարգ» սահմանադրական օրենքի 145-րդ հոդվածի համաձայն՝ ԱԺ «Քաղաքացիական պայմանագիր» խմբակցությունը Կենտրոնական ընտրական հանձնաժողովի անդամների թեկնածուներ է առաջադրել Աննա Գրիգորյանին, Ժիրայր Կարապետյանին և Նունե Հովհաննիսյանին, տեղեկացնում է ՀՀ ԱԺ պաշտոնական կայքէջը:

Թեկնածուների կենսագրական տվյալների, մասնագիտական որակների ու աշխատանքային գործունեության մասին բարձրաձայնել են «Քաղաքացիական պայմանագիր» խմբակցության պատգամավորներ Լիլիթ Մինասյանը, Արմեն Խաչատրյանը և Արփինե Դավոյանը:

Դժվար է գնահատել ԿԸՀ դերը ժողովրդավարական ինստիտուտների կայացման, ժողովրդավարական սկզբունքների և արժեքների պահպանման գործում. նման կարծիք է հայտնել ԿԸՀ անդամի թեկնածու Աննա Գրիգորյանը: Նրա խոսքով՝ այս ինստիտուտն իր բովանդակությամբ և գործիքակազմով ՀՀ քաղաքացիների արտահայտած անբեկանելի կամքի արձանագրման ու ամրագրման առաջնային երաշխավորն է: Այս տեսանկյունից թեկնածուն կարևորել է այն հանգամանքը, որ հանձնաժողովն առաջնորդվի բացառապես ՀՀ քաղաքացիների, Հայաստանի Հանրապետության շահով:

«ՀՀ համար այս վճռորոշ ժամանակաշրջանում ԿԸՀ-ն ժողորդավարության անխափան ընթացքի և ժողովրդավարական ինստիտուտների լիարժեք կենսագործունեությունն ապահովող առաջնային դերակատարն է»,- ասել է թեկնածուն:

Աննա Գրիգորյանն անդրադարձել է նախորդ տարի անցկացված խորհրդարանական և ՏԻՄ ընտրություններին, փաստել, որ ԿԸՀ-ն լիովին ծառայում է և հավատարիմ է իր կոչմանը: Նրա խոսքով՝ ԿԸՀ-ն մեծածավալ աշխատանք է իրականացնում՝ միտված հանրային իրազեկմանը, քաղաքացիական գիտակցության բարձրացմանն ու ընտրական գործընթացների վերաբերյալ քաղաքացների գիտելիքների ձեւավորմանը:

Հաջորդ թեկնածու Ժիրայր Կարապետյանը տեղեկացրել է, որ 2006 թ. մշտապես համագործակցել է ԿԸՀ-ի հետ և հավաստիացրել, որ պատգամավորների վստահությանն արժանանալու դեպքում կկարողանա առավել արդյունավետ ու նպատակային գործել ու ապահովել հետադարձ կապը ԿԸՀ-ի և ստորադաս հանձնաժողովների միջև՝ զարգացնելով ընտրական վարչարարությունը և նվազագույնի հասցնելով հնարավոր բացթողումներն ու սխալները: Թեկնածուն կարևորել է ոչ միայն ընտրական վարչարարությունը և ընտրական համակարգերի կայացվածությունը, այլ նաև՝ հանրային վստահությունը դրանց նկատմամբ:

Ընտրությունները ժողովրդավարության կարևոր տարրերից են և ժողովրդավարության նախապայման են. ասել է ԿԸՀ անդամի մեկ այլ թեկնածու Նունե Հովհաննիսյանը: Նա անդրադարձել է ոլորտում կատարված օրենսդրական բարեփոխումներին՝ նշելով, որ դրանք կարևոր ռազմավարական նշանակություն են ունեցել, քանի որ նպատակն է եղել ընտրությունները հասցնել ավելի բարձր մակարդակի:

Ըստ նրա՝ Հայաստանում միջազգայնորեն ամրագրված ընթացակարգային երաշխիքներն ապահովում և իրացվում են: Թեկնածուն խոսել է ընտրական գործընթացների կատարելագործմանն ուղղված աշխատանքների, ընտրությունից ընտրություն օրենսդրական փոփոխությունների իրականացման, հանրային իրազեկման բարձրացման ուղղությամբ լրացուցիչ քայլերի անհրաժեշտության մասին:

«Ինչպես ցանկացած ոլորտ, այնպես էլ ընտրական գործընթացները միշտ ունեն բարելավման, կատարելագործման և նորացման անհրաժեշտություն»,- ընդգծել է Նունե Հովհաննիսյանը: