Արևմուտքը կոտրեց Ադրբեջանի դիմադրությունը՝ քաղաքացիական առաքելության ուղարկմամբ. զրույց՝ քաղաքագետի հետ

ԵՄ դեսպանները համաձայնել են Հայաստան ուղարկել քաղաքացիական առաքելություն, երեկ էլ հայտնի դարձավ, որ դիտորդների նախնական թիմը ժամանել է Երևան` նախապատրաստելու այս ամիս սպասվող Եվրամիության բուն դիտորդների այցը Հայաստան։ Ո՞րն է ի վերջո լինելու այս առաքելության գործառույթները և ի՞նչ կարող է սա տալ Հայաստանին: Թեմայի շուրջ հեռուստամեկնաբան Վահագն Հակոբյանը «Հորիզոնի» տաղավարում զրուցել է Անվտանգային քաղաքականության հետազոտական կենտրոնի փորձագետ, քաղաքագետ Ռոբերտ Ղևոնդյանի հետ:

«Այս առաքելությունը առաջին հերթին Եվրամիության և հավաքական Արևմուտքի ներկայությունն է մեր տարածաշրջանում՝ ֆիզիկական իմաստով, որովհետև մենք տեսնում ենք, որ Մինսկի խմբի փաստացի չգործելուց հետո Բրյուսելում հանդիպումներ լինում էին, նույնիսկ վերջում, այս ամիսներին, հանդիպումներ եղան ԱՄՆ-ում, այնուամենայնիվ, ֆիզիկական իմաստով Հայաստանում և տարածաշրջանում ընդհանրապես, Հարավային Կովկասը վերցնենք` նկատի ունեմ գտնվում են միայն ռուսական խաղաղապահ ուժեր և ռուսական ռազմական կոնտինգենտ, և այս քաղաքական նախաձեռնությունը որոշակի առումով նաև հավասարակշռում է այս բալանսը մեր ամբողջ տարածաշրջանում, ոչ միայն Հայաստանում: Զարմանալի չէ, որ Ադրբեջանը դեմ էր արտահայտվում, և զարմանալի չէ, որ Արևմուտքը կարողացավ կոտրել այդ դիմադրությունը և ստիպված եղավ Ադրբեջանը համաձայնել, որպեսզի չխոչընդոտի այդ դիտորդական առաքելության գործունեությանը:

Մյուս կողմից էլ այդ առաքելությունը հնարավորություն է տալու հենց տեղից տեղեկատվություն ստանալու Եվրոպայի, ԱՄՆ-ի համար, ինչը բավականին խnդրահարույց էր մինչ այս, թեև շատ են խոսում այն մասին, որ հզոր տեխնոլոգիական միջոցներով իրավիճակի նկատմամբ վերահսկողություն և հետախուզական տվյալներ ունեն կարևոր կենտրոնները, այնուամենայնիվ, ֆիզիկական ներկայությունն ավելի մանրամասն և ժամանակային առումով ավելի հապճեպ տեղեկություն տրամադրելու հնարավորություն է, ինչը հնարավորություն այլևս չի տա կողմերին մանիպուլիացիաների դիմելու, միմյանց մեղադրելու տարբեր սադրանքների մեջ` խոսքը ոչ միայն ռազմական սադրանքների մասին է, այլև, ընդհանրապես, սահմանային միջադեպերի»,- ասաց քաղաքագետ Ռոբերտ Ղևոնդյանը:

Քաղաքագետն անդրադարձավ նաև Հայաստանի շուրջ այլ զարգացումներին, Մակրոնի հայտարարությանը, Ադրբեջանի ռազմաքաղաքական ղեկավարության որդեգրած գործելաոճին և առաջիկայում կանխատեսվող քաղաքական այլ իրադարձություններին:

Մանրամասները՝ ամբողջական հարցազրույցում: