Ինչո՞ւ է Թեհրան մեկնում Նիկոլ Փաշինյանը

Վարչապետ Նիկոլ Փաշինյանը վաղը պաշտոնական այցով մեկնելու է Թեհրան: Պաշտոնական տեղեկությունն այս մասին տարածել է Իրանի պետական ԻՌՆԱ գործակալությունը:  Ի՞նչ հարցեր են քննարկվելու և  Բաքվի ու Թեհրանի միջև առճակատումը նվազելու միտում նկատվո՞ւմ է. թեմայի շուրջ «Հորիզոնի» տաղավարում մանրամասներ է հայտնել Արտյոմ Երկանյանը:

«Հետաքրքիր է, որ հայկական պաշտոնական աղբյուրներն այս պաշտոնական այցի մասին տեղեկություն դեռևս մինչև այս ժամը չեն տարածել, բայց տեղեկությունը կարող ենք արդեն հաստատված համարել, քանի որ այս այցի մասին ասել է նաև Իրանի նախագահի քաղաքական հարցերով գրասենյակի ղեկավարի տեղակալ Մոհամմադ Ջամշիդին: Իրականում անակնկալ չէր, որովհետև դեռ անցած շաբաթ հայտնի դարձավ, որ այդպիսի այց նախատեսվում է, քանի որ Կապանում հյուպատոսության բացման արարողության ժամանակ Իրանի արտգործնախարար Աբդոլահիանը տեղեկացրեց, որ փոխանցել է Հայաստանի վարչապետին Իրանի նախագահի հրավերը Թեհրան այցելելու վերաբերյալ: Փաստորեն, ընդամենը մեկ շաբաթ անց այդ այցն իրականություն է դառնում:

Հիշեցնեմ, որ վերջին անգամ Հայաստանի վարչապետն այցով Իրանում է եղել անցած տարվա օգոստոսին, բայց դա աշխատանքային այց էր, այս այցը պաշտոնական է, ավելի բարձր մակարդակ ունի: Հայտնի է, որ երկու երկրների ղեկավարների հանդիպումը տեղի է ունենալու Սաադաբադ պատմամշակութային համալիրի տարածքում, և նրանց հանդիպումից հետո կկայանա մի շարք միջպետական, միջկառավարական փաստաթղթերի ստորագրում: Թե ինչ փաստաթղթեր են, առայժմ հայտնի չէ: Հայտնի չէ նաև պատվիրակության կազմը, ինչը կարող ենք վստահ ասել, որ վարչապետին ուղեկցելու է Տարածքային ենթակառուցվածքների նախարար Գնել Սանոսյանը, քանի որ նրա այցն արդեն այսօր է սկսվել: Իսկ նոյեմբերի 7-9-ը Թեհրանում աշխատանքային այցով է լինելու ՀՀ ֆինանսների նախարարը: Կարևոր է, թե արդյո՞ք պատվիրակության կազմում կլինի ՀՀ պաշտպանության նախարարը, առայժմ հայտնի չէ, բայց հիշեցնեմ, որ օրեր առաջ մամուլ էր թափանցել տեղեկությունն այն մասին, որ Հայաստանն այն 22 պետություններից մեկն է, որ հայտ է ներկայացրել Իրանում արտադրվող անօդաչու թռչող սարքերը գնելու վերաբերյալ: ՀՀ ՊՆ-ում պարզաբանել են, որ դա պետական գաղտնիք է, և դժվար է առայժմ ասել այս սպասվող այցի ընթացքում այս հարցին անդրադարձ կլինի՞, թե՝ ոչ:

Այսօր պաշտոնապես հաստատվեց տեղեկությունն այն մասին, որ Ադրբեջանն Իսրայելում դեսպանություն է բացելու: 30 տարի է, ինչ Իսրայելի և Ադրբեջանի միջև դիվանագիտական հարաբերություններ կան, սակայն Բաքուն դեսպանություն չէր բացում, հավանաբար, զգուշանալով Իրանի արձագանքից ու վերաբերմունքից: Այժմ արդեն Բաքվի իշխանություններին բացարձակ չի հետաքրքրում, թե ինչ կմտածեն այդ մասին Թեհրանում, և կարծում եմ՝ Թեհրանի պատասխան քայլը նույնպես իրեն սպասեցնել չի տա: Եվ նաև հետաքրքիր է, որ ադրբեջանական լրատվամիջոցները անոնսում են, որ մոտակա 10 օրերի ընթացքում կսկսվի Ադրբեջանում գործող, մեջբերում եմ՝ «իրանական գործակալական ցանցի տապալումը», հավանաբար, նոյեմբերն Ադրբեջանում լինելու է թեժ՝ իրանաադրբեջանական հարաբերությունների հարցում»,- ասաց Արտյոմ Երկանյանը:

Մանրամասները՝ ամբողջական հարցազրույցում: