Ոչ թե հյուրանոցային համալիր, այլ կանաչ գոտի. Սամվել Կարապետյանը հրաժարվել է Գյումրիի իր բիզնես նախագծից

Գյումրիի Ռուսթավելի փողոցում, որտեղ «Տաշիր Գրուպ» ընկերության սեփականատեր Սամվել Կարապետյանը մեկ տարի առաջ 2 տարբեր մասնավոր անձանցից տարածք էր գնել հյուրանոցային համալիր կառուցելու նպատակով, հիմա հրաժարվել է բիզնես գաղափարից ու փոխել նախագիծը: Սեփականատերը հյուրանոցի փոխարեն կանաչ գոտի է հիմնելու և օգտագործման իրավունքով տրամադրելու է քաղաքին։ Այս մասին SHANTNEWS.am-ին փոխանցել է Գյումրիի գլխավոր ճարտարապետ Հենրիկ Գասպարյանը:

«Այդ տարածքի սեփականատերն էլի մնում է «Տաշիր Գրուպ»-ը, բայց իրենք հիմա այդ տարածքում հիմնում են այգի ու դա տալիս են համայնքին՝ օգտագործման համար: Տարածքում լինելու է այգի՝ շատրվանով ու նստարաններով,  իսկ հարակից շինությունում հաջորդ տարի նոր աշխատանքներ կսկսվեն»,- SHANTNEWS.am-ին ասել է ճարտարապետը:

Ռուսթավելի փողոցում սա միակ տարածքը չէ, որ նախագծային փոփոխություն է կրել: Մեկ այլ գործարար, ով նախկին տան տարածքը ռեստորանի էր վերածելու, դադարեցրել է շինարարությունը: Ներդրողը նախագիծը փոխել է ու դեռ հայտնի չէ, թե ինչ է կառուցելու: Գյումրիի այս տարվա մասնավոր շինարարության ծավալները նույնն են, ինչ նախորդ տարի: 8 ամսվա ընթացքում 34 շինթույլտվություն է տրվել կառուցապատման և կիսակառույցների շինարարությունն ավարտելու համար: Ավելի շատ են ժամկետանց շինթույլտվությունները: Տասնյակ տարիներ առաջ մասնավորեցված շինություններն ու տարածքները, որոնց համար շինարարության թույլտվություններ կան, այդպես էլ չեն կառուցապատվել: Մինչդեռ թույլտվությունները տրվել են հստակ ժամկետներում կառուցման համար: Տարածքները կա՛մ վաճառվել են, կա՛մ մնացել կիսակառույց: Առանձին դեպքերում էլ կառուցապատողները նախագծային փոփոխություններ են կատարել: Կառուցապատումից չեն հրաժարվում, բայց ժամկետներն են խախտում: Շինթույլտվությունը հստակ ժամկետով է տրվում, թե քանի ամսում կամ տարում է պարտավորվում կառուցել։ Քաղաքի գլխավոր ճարտարապետի խոսքով՝  նախագծի ժամկետներից ուշանալու դեպքում տույժեր են կիրառվում, բայց Գյումրիում նման բան գործնականում չկա: Ժամկետից ուշացողներին քաղաքապետարանը չի էլ պարտավորեցնում, հակառակը՝ մի բան էլ զիջումների է գնում: Հետևանքը բազմաթիվ կիսակառույցներն են, որոնց շինարարությունն անգամ երկարացված նախագծերով ավարտին չի հասցվում: Նախկին «Գյումրի» ռեստորանի տարածքը մասնավորեցված է, միայն թե սեփականատերը մեկը չէ, այլ մի քանիսը։ Նրանցից և ոչ մեկն իր պարտավորությունները չի կատարում։ Տարածքի մի մասի նկատմամբ պարտավորություններ ունի Գյումրիում Իտալիայի պատվո հյուպատոս Անտոնիո Մոնտալդոն, ով ոչինչ էլ դեռ չի սկսել: Իսկ թե ինչու, պատվո հյուպատոսն այս մասին չցանկացավ խոսել: Ըստ նախագծի՝ տարածքում պետք է ճարտարապետական դպրոց և Գյուրջիևի կենտրոն լիներ: Հիմա քաղաքապետարանը պատրաստվում է հետ վերցնել տարածքը հյուպատոսից: Կառուցապատման 34 հայտերից, որոնց քաղաքապետարանը շինթույլտվություն է տվել, ընդամենը 6-ն է բնակարանի կառուցման նպատակ հետապնդում։