Մոխրոտիկի էֆեկտ կամ ի՞նչ ճակատագրի են արժանանում «Օսկարի» թանկարժեք զգեստները

«Օսկա՜ր», «Օսկա՜ր», «Օսկա՜ր» …

Այո՛, ճիշտ հասկացաք, մենք սրտի տրոփյունով սպասում ենք այս մրցանակաբաշխությանը և արդեն սկսել ենք հաշվել րոպեները: Վաղն առավոտյան ամեն ինչ պարզ կդառնա՝ «Տարվա լավագույն ֆիլմը», «Տարվա լավագույն ռեժիսորը», «Տարվա լավագույն դերասանը», «Տարվա լավագույն դերասանուհին», և օսկարյան մեծ բեմից կհնչի ևս մի քանի երջանիկի անուն։

Թվարկվածների մասին կխոսենք վաղը, իսկ այսօր խոսենք մրցանակաբաշխության նախապատրաստական աշխատանքներից և աստղային տրամադրությունից: Այժմ մասշտաբային իրադարձությանը պատրաստվում են հարյուրավոր աստղեր, նրանք հագնում են իրենց շքեղ զգեստները, կրում են իրենց սիրելի ադամանդները ու զարդերը, դիմահարդարվում և գեղեցիկ ու թրենդային սանրվածքներով պատրաստվում են զարմացնել աշխարհին:

Ջենիֆեր Լոուրենս / Զգեստը՝ Dior

Յուրաքանչյուր նորաձևության տուն կամ հայտնի դիզայներ այս օրերին հասցնում է օգտվել «Օսկարի» ընձեռած կոմերցիոն հնարավորություններից և իրենց նախընտրելի աստղի հետ բանակցում են՝ կարմիր գորգին իրենց մոդելավորած զգեստը կամ զարդը կրելու հարցում:

SHANTNEWS-ը որոշել է ներկայացնել, թե ինչ ճակատագրի են արժանանում աստղերի շքեղ բրենդային զգեստները, երբ վերջանում են կարմիր գորգը, «Օսկար» մրցանակաբաշխությունը և դրան հաջորդող խելահեղ երեկույթը …

Ամեն ինչ նման է Մոխրոտիկի պատմությանը

Բլեյք Լայվլի/ Զգեստը՝ Vivienne Westwood

Վերոնշյալ հարցի ճիշտ պատասխանը կարող են տալ միայն հայտնիների ոճաբանները: Նրանցից շատերը հարցազրույցների ժամանակ բացահայտել են աստղային զգեստների գաղտնիքը: Այդ զգեստները աստղերին չեն պատկանում և դրանք մրցանակաբաշխությունից հետո շատ սեղմ ժամկետներում պետք է վերադարձվեն  նորաձևության տներին։

Քեյթ Ուինսլեթի և Հիլարի Սուոնկի արտաքին տեսքի պատասխանատու Տանյա Ջիլն իր հարցազրույցներից մեկում ասել է.

«Հիմանականում զգեստները վերադարձնում են նորաձևության տանը, որտեղ այն պահպանվում է արխիվում: Հասկանում եք, ամեն ինչ շատ նման է Մոխրոտիկի պատմությանը՝ դուք շքեղ հագնվում, գնում եք պարահանդեսի, իսկ կեսգիշերից հետո ամեն ինչ անհետանում է»:

Քեյթ Ուինսլեթ/ Զգեստը՝ Ralph Lauren

Քրիստեն Ստյուրատի ոճաբան Թարա Սվեննեն հաստատում է, որ առավոտյան արդեն զգեստները կախարդական փայտիկի ուժով անհետանում են աստղերի սենյակներից:

«Հաճախ խնդրում ենք, որ զգեստը վերադարձնեն հենց հաջորդ առավոտյան, իսկ եթե շատ բախտներս բերի, ապա ծայրահեղ դեպքում մեզ տալիս են ընդամենը 48 ժամ: Սովորության համաձայն, երբ Քրիստենը արդեն գնում է մրցանակաբաշխությանը նվիրված երեկույթին, ես արդեն զանգում և հստակեցնում եմ զգեստը և զարդերը վերադարձնելու ժամանակը»:

Քրիեստեն Ստյուարտ /Զգեստը՝ Reem Acra

Եվ կապ չունի, որ այդ զգեստը հայտնի դիզայները մոդելավորել է հատուկ տվյալ դերասանուհու համար կամ զգեստն այնքան լավն է ու կատարյալ համապատասխանում է դերասանուհու կազմվածքին ու էությանը, միևնույն է, զգեստը դիզայների աշխատանքն է և դիզայների սեփականությունը:

Ոճաբանները նշում են, որ դիզայները կարող է նվիրել իր մոդելավորած զգեստը տվյալ աստղին, բայց նման դեպքեր շատ հազվադեպ են տեղի ունենում:

Ջենիֆեր Լոպես /Զգեստը՝ Versace

Ամենահայտնի դեպքերից մեկը, երբ Versace նորաձևության տունը Ջենիֆեր Լոպեսին նվիրեց իր մոդելավորած հայտնի կանաչ զգեստը, որը երգչուհին հագել էր «Գրեմմի» մրցանակաբաշխությանը:

Ի՞նչ է լինում զգեստների հետ «հայրական» տուն վերադառնալուց հետո 

Dior-ի, Chanel-ի կամ Valentino-ի նման հայտնի նորաձևության տները իրենց զգեստները պահում են արխիվում, պատմության համար և երբեք ուրիշ ցանկացողների չեն տրամադրում: Իսկ, եթե զգեստը պատկանում է ոչ այնքան հայտնի նորաձևության տան կամ երիտասարդ դիզայների աշխատանք է, ապա հավանական է, որ այդ նույն զգեստը ինչ-որ ուրիշ միջոցառան ընթացքում կրի այլ հայտնի աստղ։