Նախատեսվում է հաշմանդամություն ունեցող անձանց համար առանձնացված ավտոկայանատեղեր գծանշել

Նախատեսվում է կատարել օրենսդրական փոփոխություն, որի նպատակը հաշմանդամություն ունեցող անձանց համար տարբերակված գույնով ավտոկայանատեղերի գետնանշումն է: Այս մասին տեղեկացնում է ԱԺ մամուլի ծառայությունը:

Նախաձեռնությունն առաջին ընթեցմամբ քննարկվել է ԱԺ տարածքային կառավարման, տեղական ինքնակառավարման, գյուղատնտեսության եւ շրջակա միջավայրի պահպանության հարցերի մշտական հանձնաժողովի նոյեմբերի 30-ի նիստում: Փոփոխությունն առաջարկվում է կատարել «Ավտոտրանսպորտային միջոցների կայանատեղերի տեղական վճարի եւ վարչական վարույթի առանձնահատկությունների մասին» օրենքում:

Նախագծի ընդունման արդյունքում կհեշտացվի համայնքային վճարովի ավտոկայանատեղերի տարբերակիչ գետնանշումների գույնի եւ ձեւի վերաբերյալ փոփոխությունների իրականացման գործընթացը, կբարձրացվի տեղական ինքնակառավարման մարմինների կողմից առաջացող խնդիրների արագ արձագանքման հնարավորությունը, ինչի արդյունքում հնարավորինս դյուրին տարբերակով կսահմանվեն առանձնացված հատվածներ համայնքային վճարովի ավտոկայանատեղիներում հաշմանդամություն ունեցող անձանց համար, ինչպես նաեւ հնարավոր կլինի իրականացնել տարբերակված դրույքաչափերի սահմանումն ըստ գոտիականության` ընդհանուր ավտոկայանատեղիների եւ ծառայողական ավտոկայանատեղիների կազմակերպման առնչությամբ:

Ավտոկայանատեղերի գույնը եւ ձեւը կորոշի Կառավարությունը. ասել է հիմնական զեկուցող, ՀՀ տարածքային կառավարման եւ ենթակառուցվածքների նախարարի տեղակալ Արմեն Սիմոնյանը` պատասխանելով պատգամավոր Սերգեյ Բագրատյանի հարցին: Պատգամավորը նաեւ հետաքրքրվել է, թե արդյո՞ք տուգանքներ նախատեսվում են այն անձանց համար, որոնք կխախտեն օրենքը` մեքենան կայանելով հաշմանդամություն ունեցող անձանց համար նախատեսված տեղում: Փոխնախարարը նշել է, որ գործող օրենսդրությամբ սահմանված են վարչական տույժեր այդ կապակցությամբ, իսկ քննարկվող նախագիծը վերաբերում է տարբերակված գետնանշումների սահմանմանը:

Պատգամավոր Ռուստամ Բաքոյանն էլ հետաքրքրվել է` ինչպե՞ս է կատարվելու վերահսկողությունը: Արմեն Սիմոնյանը հայտնել է, որ վերահսկողության մեխանիզմի հարցը դեռեւս կարգավորված չէ, սակայն ակնկալվում է, որ հաշմանդամություն ունեցող անձանց մեքենաների վրա տարբերակիչ նշաններ կլինեն:

Հանձնաժողովը երկրորդ ընթերցմամբ քննարկել է «ՀՀ հողային օրենսգրքում փոփոխություն եւ լրացում կատարելու մասին», ««Պետական գույքի կառավարման մասին» օրենքում փոփոխություններ կատարելու մասին» եւ ««Տեղական ինքնակառավարման մասին» օրենքում լրացում կատարելու մասին» օրենսդրական նախաձեռնությունը: Նախագծերի ընդունմամբ կկանոնակարգվեն պետական սեփականություն հանդիսացող կառուցապատված հողամասերի օտարման բնագավառում առաջացող իրավահարաբերությունները:

Նախագծերն արժանացել են հանձնաժողովի դրական եզրակացությանը: