Դեկտեմբերի 5-ը կամավորների միջազգային օրն է

Այսօր ամբողջ միջազգային հանրությունը նշում է կամավորների օրը։ Այս օրն այն մարդկանց համար է, ովքեր ընտրել են մարդկությանն անշահախնդիր ծառայելու ու բարդ իրավիճակներում հայտնված անձանց աջակցելու ուղին։

Ինչպես տեղեկացնում են ԿԳՄՍ նախարարությունից, կամավորների միջազգային օրը հաստատվել է 1985 թվականի դեկտեմբերի 17-ին Միացյալ ազգերի կազմակերպության Գլխավոր ասամբլեայի 40-րդ նստաշրջանի ժամանակ և այդ թվականից ի վեր հանդիսանում է միջազգայնորեն հիշատակելի օր։

ԿԳՄՍ նախարարի տեղակալ Արթուր Մարտիրոսյանը հասարակության վերափոխման գործում ընդգծում է կամավորական աշխատանքի դերը և բարձր գնահատում կամավորների սրտացավ վերաբերմունքն իրենց առաքելությանը.

«Կամավորների միջազգային օրվա կապակցությամբ շնորհավորում եմ բոլորին։ Կամավորությունը հանգեցնում է մեր իրականության բարեփոխմանը, համատեղ կերտելու մեր երկրի ապագան: Վստահեցնում եմ, որ կամավորական աշխատանքը գնահատվում է ըստ արժանվույն»։

Կարևորելով երիտասարդների շրջանում կամավորական աշխատանքի խթանումը, երիտասարդների օգնությամբ կամավորության միջոցով հանդուրժողականության և համերշախության զարգացումը, ինչպես նաև երիտասարդների շրջանում կամավորական աշխատանքի համար անհրաժեշտ փափուկ հմտությունների ձևավորումն ու զարգացումը՝ 2022 թվականին ՀՀ կրթության, գիտության, մշակույթի և սպորտի նախարարությունը ՀՀ երիտասարդական պետական քաղաքականության շրջանակում գործընկեր կազմակերպության հետ օգոստոս-նոյեմբեր ամիսներին իրականացրել է «Երիտասարդ կամավորներ» դասընթացների և խորհրդատվության անցկացման ծրագիրը։

Ծրագրին մասնակցել են Երևանի, ՀՀ մարզերի, Արցախի 16-35 տարեկան 34 երիտասարդներ, որոնց համար երկու ամիս շարունակ իրականացվել են տեսական և գործնական դասընթացներ։

Գործնական պարապմունքներին հաջորդել են հանդիպումներ երկարամյա փորձառություն ունեցող կամավորների հետ, այցելություններ կազմակերպություններ, ինչի արդյունքում 10-ից ավելի մասնակիցներ այդ կազմակերպությունների կամավորական աշխատանքներում ընդգրկվելու հնարավորություն են ունեցել։

Մասնակիցներից շատերը հավաստել են, որ պետական ֆինանսավորմամբ իրականացված «Երիտասարդ կամավորներ» ծրագրի շնորհիվ ձեռք են բերել դժվարին իրավիճակներում արագ կողմնորոշվելու, բարդ խնդիրներին այլընտրանքային լուծումներ գտնելու կարողություններ, ինչպես նաև զարգացրել են իրենց հաղորդակցման, ժամանակի կառավարման և այլ փափուկ հմտություններ։

Ծրագրում ներգրավված կազմակերպություններից մեկի ղեկավարը նշել է, որ աշխատելով բազում նախագծերում՝ իբրև կամավորների պատասխանատու, հետզհետե տեսանելի են դառնում երիտասարդների շրջանում կամավորական աշխատանք կատարելու գիտակցված ցանկությունը, մեծ պատասխանատվությամբ և նախաձեռնողականությամբ աշխատանքի կատարումը և բարիք գործելուն ուղղված մոտեցումը։

ՀՀ ԿԳՄՍ նախարարությունը 2023 թ.-ին ևս իրականացնելու է «Երիտասարդների համար երիտասարդական աշխատանքի և կամավորության խթանում» դրամաշնորհային ծրագիրը բյուջեի կրկնակի ավելացմամբ։