Արդյո՞ք քաղաքական պատճառներով է «Գազպրոմը» զգալիորեն կրճատել Հայաստան մղվող գազի ծավալը

Արդեն 8 օր է, ինչ Ռուսաստանից ստացվող գազի ծավալները զգալիորեն կրճատվել են: Ու թեև Աբովյանի գազապահեստարանի հնարավորությունները թույլ են տվել վերացնել գազալացակայաններին գազի մատակարարման ժամանակավոր սահմանափակումները, իրավիճակը շարունակում է մտահոգիչ մնալ:

Արդյո՞ք գազի ծավալների կտրուկ կրճատումը կարող է քաղաքական ենթատեքստ ունենալ:

Թեմային հետևել է Արտյոմ Երկանյանը և «Հորիզոնի» տաղավարում մանրամասներ ներկայացրել.

«Հիշեցնեմ՝ «Գազպրոմ» ընկերության մամլո ծառայությունը հաղորդագրություն էր տարածել այն մասին, որ փետրվարի 14-ից Ստավրոպոլի երկրամասում գազատարի խցանման հետևանքով մասամբ դադարեցվել է դեպի Հայաստան գազամատակարարումը, այսինքն՝ զգալիորեն նվազել են Հայաստան մղվող գազի ծավալները: Թե որքանո՞վ է նվազել, կոնկրետ թիվ չի հրապարակվում, բայց ենթադրում եմ՝ եթե օգտագործվում է «զգալիորեն» բառը, ապա, ամենայն հավանականությամբ, առնվազն կեսի մասին է խոսքը:

Հայաստանի կառավարությունը՝ պետական մարմինները՝ մասնավորապես Հանրային ծառայությունները կարգավորող հանձնաժողովը որոշեց, որ անհրաժեշտ է տնտեսելու ռեժիմի անցնել և ժամանակավորապես սահմանափակումներ մտցվեցին ավտոգազալցակայաններին գազ մատակարարելու հարցում, ինչպես հայտնի է՝ այդ սահմանափակումներն արդեն վերացվել են, բայց հիշեցնեմ, երբ շաբաթներ շարունակ Հայաստանն ընդհանրապես գազ չէր ստանում Ռուսաստանից, այդպիսի սահմանափակումներ չէին կիրառվում, քանի որ Աբովյանի գազապահեստարանը դրա հնարավորությունը տալիս էր՝ խնդիրը լուծելու, այս անգամ որոշվեց անցնել տնտեսելու ռեժիմին: Այդ հանգամանքը հարցեր է առաջացնում:

2-րդ հարցի պատճառն այն է, որ ընդամենը ամիսներ առաջ՝ նոյեմբերին, նույն այդ գազատարի վրա՝ այդ թվում նաև Ստավրոպոլի երկարամասի հատվածում պրոֆիլակտիկ վերանորոգման աշխատանքներ են իրականացվել: Այսինքն՝ փոքր-ինչ անսպասելի է թվում այդ խցանումը: Ամեն դեպքում, ես որևէ գնահատական տալու իրավունք չունեմ և չեմ կարող պնդել, որ այստեղ պարտադիր անհրաժեշտ է փնտրել քաղաքական ինչ-որ ենթատեքստեր, բայց ամեն դեպքում տեղի ունեցածը պետք է առիթ դառնա, որպեսզի այսօր արդեն մտածենք մեր գազային մատակարարումների դիվերսիֆիկացիայի մասին, որպեսզի կարողանանք ապահովել մեր էներգետիկ անվտանգությունը: Եվ եթե իսկապես այս խցանումը Ռուսաստանի կողմից մեզ ուղղված ինչ-որ քաղաքական ազդակ է, ապա արդեն այսօր պետք է մտածենք, թե ի՞նչ ենք անելու, երբ «Գազպրոմ»-ի հետ մեր ունեցած այժմյան պայմանագրի ժամկետը լրանա, ի՞նչ նոր սակագին են առաջարկելու, արդյո՞ք մեզ համար ընդունելի են լինելու այդ սակագները, և արդյո՞ք մենք պատրաստ ենք լինելու այդ գներն ընդունել, թե՞ պետք է այլընտրանքներ փնտրենք»,- ասաց Արտյոմ Երկանյանը:

Երեկ Ազգային ժողովում ՏԿԵ նախարարը հավաստիացնում էր, որ խնդիրներ չպետք է լինեն, քանի որ ավելացվելու են Իրանից ստացվող գազի ծավալները: Այդ դեպքում ի՞նչն է խանգարում, որ դիտարկենք իրանական զագը որպես ռոսականի այլնտրանք:

Մանրամասները՝ ամբողջական տեսանյութում: