Գյումրիում և Վանաձորում «էկո» ավտոբուսների ձեռքբերման համար կպահանջվի քաղաքապետարանների և կառավարության ներդրումը

Գյումրի և Վանաձոր քաղաքներում նախատեսվում է ներդնել պլաստիկ շշերի վերամշակման պրակտիկա, գործարկել, այսպես կոչված՝ «կանաչ» ավտոբուսներ։ Խոսքը էլեկտրական ավտոբուսների մասին է։ Այս ամենը նախատեսված է «Դաշինք հանուն կայուն և կանաչ կառավարման» ծրագրով, որը ֆինանսավորում է եվրամիությունը։ Տեղի է ունեցել ծրագրի ղեկավար կոմիտեի 3-րդ նիստը, որտեղ քննարկվել են ընթացիկ հարցերը և խնդիրները։ Դրանք հիմնականում կապված են էլեկտրական ավտոբուսների ձեռք բերման հետ։

Նպաստել Գյումրի և Վանաձոր քաղաքների կայուն կառավարմանը, ծառայությունների որակի բարելավմանը։ Սա ենթադրում է երկու քաղաքներում բնապահպանական միջոցառումների անցկացում, աղբահանության և ուղևորատար տրանսպորտային պարկի ենթակառուցվածքների թարմացում։ Ավելի պարզ` երկու քաղաքներում ներդրվելու են էլեկտրական ավտոբուսներ, որոնք կթարմացնեն ավտոպարկը, միևնույն ժամանակ բնապահպանական խնդիրներ չեն առաջացնի, քանի որ աշխատելու են էլեկտրականությամբ։ Ծրագիրը մի քանի տարի է մշակվում է, քննարկվում և հիմա պարզվում է, որ բյուջեն չի բավականացնում Գյումրիի և Վանաձորի համար նախատեսված ավտոբուսները ձեռք բերելու համար։

Այսինքն, ի սկզբանե ավտոբուսների ձեռքբերման համար նախատեսված ֆինանսավորումը հիմա արդեն չի բավականացնում և լրացուցիչ ֆինանսավորման կարիք կա։ Տարբերակ ծրագրի ղեկավարն է նշում՝ պետք է ներդրում անեն քաղաքապետարանները և կառավարությունը։

«Տրանսպորտի հարցով մենք խնդիր ունենք բյուջեի հետ կապված։ Պետք է փորձենք հասկանալ, թե ի՞նչ լուծումներ կլինեն։ ֆինանսավորման առումով այն տարբերությունը, որը մեզ մոտ առաջանում է, միգուցե երկու համայնքները և կառավարությունը այս խնդրի լուծմանը գանք։ Բոլորս էլ հասկանում ենք, որ մեր ունեցած ռեսուրսները բավարար չեն, որ կարողանանք գնել այն, ինչը պլանավորել ենք»,- ասել է «ԿԿԿ դաշինք» ծրագրի ղեկավար Նատալյա Լափաուրին։

Գյումրիի ուղևորատար տրանսպորտի պարկը թարմացվեց սուբվենցիոն ծրագրով ձեռքբերված միկրոավտոբուսներով։ Բայց սա հնարավորություն տվեց նորացնել քաղաքի տրանսպորտի միայն մի մասը։ 22, 18, 14 համարի երթուղիները դեռ հին միկրոավտոբուսներով են սպասարկում։ «Դաշինք հանուն կայուն և կանաչ կառավարման» ծրագրի հաջորդ բաղադրիչը Գյումրիում և Վանաձորում աղբահանության կազմակերպմանն է վերաբերում։ Նախատեսվում է նոր աղբամաններ գնել, աղբը տեսակավորել և վերամշակել։

«Յուրաքանչյուր համայնքի համար ձեռք ենք բերում 630 աղբաման, որը նախատեսված է և՛ խառը աղբի համար, և՛ պլաստիկ շշերի համար։ 330-ը խառը աղբի համար է, 300-ը՝ պլաստիկ շշերի համար։ Անկախ նրանից, թե պլաստիկ ինչքան կհավաքվի, մենք նաև խառը աղբի տարանջատման հոսք կարող ենք ունենալ։ Երկու քաղաքում էլ կտեղադրվեն հոսքագծերը»,- ասել է Նատալյա Լափաուրին։

Նախատեսվում է երկու քաղաքներում աղբի վերամշակման հոսքագծեր տեղադրել։ Արդեն որոշել են, որ պլաստիկից կկարողանան մայթերի երեսապատման սալիկներ ստանալ։ Ծրագրի հաջող արդյունքի դեպքում երկու քաղաքները՝ Վանաձորն ու Գյումրին, կկարողանան աղբի վերամշակումից ստացած հումքի փոխանակություն կատարել։

Հիշեցնենք, տարիներ առաջ Գյումրիում աղբի տեսակավորման արտադրամաս բացվեց, որը երկար չգործեց, այն պատճառաբանությամբ, որ Գյումրիում տեսակավորման ենթակա աղբի քանակությունը քիչ էր։