Արցախյան կողմը մերժել է Բաքվում հանդիպում անցկացնելու Ալիևի առաջարկը. ինչու՞

Արցախի Հանրապետության ԱԳՆ-ն մեկնաբանություն է տարածել Արցախի ներկայացուցիչների հետ հանդիպում անցկացնելու Ադրբեջանի առաջարկության վերաբերյալ:

«Հանդիպման վայրի և օրակարգի հետ կապված ադրբեջանական կողմի հնչեցրած պայմանները, ինչպես նաև համատեքստը, որում ներկայացվել է տվյալ առաջարկը, վկայում են, որ Ադրբեջանի իշխանությունների նպատակը ոչ թե առկա խնդիրների շուրջ իրական քննարկումն է, այլ հնարավոր երկխոսության խաթարումը կամ հարկադրանքի, շրջափակման, կյանքի անտանելի պայմանների ստեղծման և ռազմական ուժի կիրառման միջոցով սեփական քաղաքական օրակարգի պարտադրումը։ Այդ կապակցությամբ հարկ ենք համարում հիշեցնել, որ երեք օր առաջ՝ մարտի 25-ին, Ադրբեջանի զինված ուժերը, կոպտորեն խախտելով 2020 թ․ նոյեմբերի 9-ի եռակողմ հայտարարության դրույթները, հատել են շփման գիծը և առաջխաղացում կատարել դեպի Արցախի Հանրապետության տարածքի խորքը՝ Ստեփանակերտ-Լիսագոր գրունտային ճանապարհի ուղղությամբ»,-ասվում է Արցախի Հանրապետության ԱԳՆ-ի տարածած  մեկնաբանության մեջ:

Մենք երեկ կանխատեսում էինք, որ պատասխանը մոտավորապես այսպիսինն է լինելու: Երբ շաբաթներ առաջ Բաքուն առաջին անգամ տարածեց հանդիպելու առաջարկը, Արցախի ԱԳՆ-ն իր պայմանները շարադրեց: Այս անգամ պայմանների մասին այլևս խոսք չկա: Այսօր Ալիեվը հանդիպել է նրանցից մեկի հետ, ում հետ առաջարկում էր բանակցել արցախցիներին: Նոր պաշտոն է ստեղծվել: Ի՞նչ պաշտոն է: Թեմային «Հորիզոնի» տաղավարում անդրադարձել է Արտյոմ Երկանյանը:

«Առաջին անգամ Ադրբեջանն իր այս առաջարկը հնչեցրեց մարտի 13-ին, և այդ ժամանակ ԱՀ ԱԳՆ-ն արձագանքեց՝ սկզբունքորեն չբացառելով հանդիպման անցկացումը: Մի քանի հանդիպակաց առաջարկ արեց, որպեսզի այդ հանդիպումն իսկապես լինի բովանդակային, իսկապես լինի իրատեսական: Մի քանի առաջարկ էր արել. 1-ինը, որ հանդիպմանը պարտադիր պետք է լինեն ռուս միջնորդները, 2-րդը՝ հանդիպումը պետք է տեղի ունենա ռուս խաղաղապահների շտաբում, ինչպես և նախորդ հանդիպումն էր տեղի ունեցել, և 3-րդը՝ քննարկվող հումանիտար և ենթակառուցվածքային հարցերը չպետք է արհեստականորեն քաղաքականացվեն, իսկ քաղաքական հարցերը պետք է քննարկվեն միջազգային ձևաչափով, որտեղ պետք է լինեն այսպես ՝ ձեռք բերված համաձայնության իրականացման հստակ երաշիքներ:

Այս անգամ Արցախի ԱԳՆ-ն չի կրկնել իր այս առաջարկները կամ կոչերը, քանի որ իրավիճակն է բոլորովին այլ. կիրակի օրը հերթական անգամ, ադրբեջանական ագրեսիայից հետո վիճակը կրկին փոխվել է: Բանակցություններն անցկացնելը իմաստ կունենա այն դեպքում, երբ վստահության մթնոլորտ կլինի կողմերի միջև:

Այսօր առավոտյան Իլհամ Ալիևը ստորագրել է հրամանագիր, որով նշանակել է նախագահի հատուկ ներկայացուցիչ Լաչինում: Այդ պաշտոնում նշանակվել է Մասիմ Մամեդովը:

Այդ անձնավորությունը մեզ արդեն ծանոթ է, քանի որ հենց նաև նա էր ներկայացնում ադրբեջանական կողմը՝ մարտի 1-ին կայացած Արցախ-ադրբեջանական բանակցություններում և դրանից առաջ էլ Ստեփանակերտի օդանավակայանում կայացած հանդիպմանը ևս նա ներկա էր:

Ընդ որում, այդ ժամանակ արդեն պարզ էր դարձել, որ այս անձնավորությանն ինչ-որ պաշտոնի են նախապատրաստում, քանի որ ադրբեջանական պաշտոնական հաղորդագրություններում միայն նրա անունն էր հիշատակվում, մնացածներինը՝ ոչ»,- ասաց Արտյոմ Երկանյանը:

Մանրամասները՝ ամբողջական հարցազրույցում: