Ո՞ր երկրներում են փորձել խոչընդոտել Հայոց ցեղասպանությանը վերաբերող ակցիաների անցկացումը

Հակառակ իշխանությունների արգելքի, Ստամբուլում նույնպես կայացել են հայոց ցեղասպանության զոհերի հիշատակը հավերժացնեղ միջոցառուներ:

Արդյո՞ք արգելողը երկրի քաղաքական իշխանություններն են եղել:  Ովքե՞ր են  ակցիայի կազմակերպիչները: Թեմային՝ «Հորիզոնի» տաղավարում անդրադարձել է Արտյոմ Երկանյանը.

««Ապրիլի 24-ի հիշատակի պլատֆորմ» կոչվող հանրային շարժումը, որն արդեն մի քանի տարի է, ինչ կազմակերպում է այդ օրը միջոցառումներ, այս տարի ևս նախապես պաշտոնապես դիմել է պատկան մարմիններին՝ խնդրելով արտոնել միջոցառման անցկացումը՝ Ստամբուլի Քադիքոյ շրջանում: Ինչպես և անցած տարի, իշխանությունները չէին արտոնել, այսինքն՝ արգելել էին միջոցառման անցկացումը՝ պարզաբանելով, որ այն անտեղի է:

Նախաձեռնողները տարածել են հատուկ հայտարարություն, որում բողոք են արտահայտել կայացրած որոշման կապակցությամբ: Ընդ որում ընդգծում են, որ նույն այդ իշխանությունները արտոնում են ազգայնականների անցկացվող միջոցառումները, որտեղ վիրավորում են ազգային և կրոնական փոքրամասնությունների ներկայացուցիչներին:

Ընդգծեմ, որ ընդամենը մի քանի օր առաջ Ստամբուլի քաղաքապետ Էքրեմ Իմամօղլուն եկել էր Ստամբուլի հայոց պատրիարքարան: Պաշտոնական վարկածն ընդամենը շնորհավորելն էր Սուրբ Զատկի տոնը, բայց պարզ է, որ գլխավոր նպատակն ընտրություններից առաջ հայերին սիրաշահելն էր և Իմամօղլուն հայտարարել էր, որ աջակցելու է հայերին՝ իրենց բոլոր իրավունքները պաշտպանելու հարցում: Այս դեպքում ստացվում է՝ իշխանություններն իրենց խոստումը չեն կատարում:

Բացի դրանից հիշեցնեմ, որ Իկրեմ Իմամօղլուն ամիսներ առաջ մշակույթի հարցերով իր գլխավոր խորհրդական էր նշանակել հայտնի մտավորական, բալետի պարուհի Զեյնեբ Թամբային, ով «Հայեր ներեցեք մեզ» ակցիայի գլխավոր նախաձեռնողներից  է և ով տարիներ շարունակ պայքարում է Հայոց Ցեղասպանության ճանաչման և դատապարտման համար: Բայց պարզվում է, որ իրականում այդ մերժումը տված ատյանը ոչ թե քաղաքապետարանն է, այլ Ստամբուլի նահանգապետարանը: Այսինքն՝ մերժել է, ոչ թե Իքրեմ Իմամօղլուն, այլ Էրդողանի կողմից նշանակված նահանգապետը: Այդպիսով, քաղաքապետին կհաջողվի պահպանել իր դեմքը՝ չփչացնելով հարաբերությունները հայերի հետ, բայց արդյունքում միջոցառումը, այնուամենայնիվ, արգելվել է:

Կայացավ մեկ այլ ակցիա, որը նույնպես արտոնված չի եղել և որի արտոնության համար անգամ չեն էլ դիմել: Երեկ ժամը 17-ին Քուրթուլուշ շրջանում, ուր այն կայարանն է, որտեղ 108 տարի առաջ հավաքել էին հայ մտավորականներին: Հենց այդ վայրից ոչ հեռու մեկ այլ ցույց է կազմակերպվել՝ Կանաչների և Ձախ ապագայի կուսակցությունների կողմից: Եվ ահա այդ ակցիայի նախաձեռնողներից մեկն է հայտնի լրագրող, հրապարակախոս Հասան Ջեմալը, ով Ջեմալ Փաշայի հարազատ թոռն է: Հասան Ջեմալը ժամանակին ոչ միայն դատապարտել էր պապի արածները, այլ նաև եկել էր Երևան և Ծիծեռնակաբերդում ծաղիկներ էր դրել ու իր խոնարհումը բերել՝ հայտարարելով, որ ճանաչում է Հայոց Ցեղասպանության փաստը և անգամ գիրք էր գրել, որ հենց այդպես էլ կոչվում է «Հայոց Ցեղասպանություն-1915»: Ավելին, Երևանում նաև հանդիպել էր իր պապին սպանած գործչի թոռանը և ընկերացել նրա հետ: Եվ ահա այդ միջոցառմանը Հասան Ջեմալը երեկ շատ տպավորիչ ելույթ է ունեցել :

Մեկ այլ միջոցառում էլ տեղի է ունեցել Ստամբուլի հայկական գերեզմանատներից մեկում, ուր հիշում էին Սևակ Բալկչիին, որին թուրք ազգայնականը 2021թ.-ի ապրիլի 24-ին սպանել էր բանակում  և ակնհայտ է, որ պատճառը ազգային հողն էր»,-ասել է Արտյոմ Երկանյանը:

Կա՞ն էլի երկրներ, ուր փորձել են խոչընդոտել միջոցառումների անցկացումը: Մանրամասները՝ ամբողջական հարցազրույցում: