Մեկնարկել է Ադրբեջանի հերթական՝ «գլխից մեծ» զորավարժությունը

Այսօր մեկնարկել է Ադրբեջանի բանակի այս տարվա խոշորագույն զորավարժությունների մեկը, որին, երկրի ՊՆ հաղորդագրության համաձայն, մասնակցում է 25 հազար զինծառայող՝ տարբեր զորատեսակների ու միավորումների կազմում։

Զորավարժությանը ներգրավված զինտեխնիկան համեմատելի է վերջին 2-3 տարիներին Ադրբեջանի բանակի անցկացրած զորավարժությունների քանակների հետ.

• 250 միավոր տանկեր և այլ զրահատեխնիկա
• 1000 միավոր հրթիռահրետանային տեխնիկա
• 50 միավոր ավիացիոն տեխնիկա։

Նախորդների համեմատությամբ՝ զգալի աճել է միայն հրթիռահրետանային սպառազինության ծավալը։

Զորավարժության վերաբերյալ հրապարակումներից հայտնի է դառնում, որ դրա ընթացքում կիրառվելու են «Սմերչ» համազարկային կրակի ռեակտիվ համակարգեր, զրահապատ մեքենաներ, փողային հրետանի, ինքնաթիռներ, հարվածային ուղղաթիռներ և այլ տեխնիկա։ Զորավարժության սցենարի համաձայն՝ ադրբեջանցիները «ազատելու» են հայկական կողմի «գրաված» բարձրունքները։

Զորավարժության անցկացմանն արձագանքել է Հայաստանի արտաքին գործերի նախարարությունը։ ԱԳՆ խոսնակ Տիգրան Բալայանը հայտնել է, որ Ադրբեջանը պատշաճ ժամկետներում տեղեկատվություն չի տարածել զորավարժության անցկացման մասին, ինչը ԵԱՀԿ պայմանավորվածությունների խախտում է։

#Azerbaijan started military exercises (the most crowded event of @presidentaz re-“election” campaign) in blatant violation of @OSCE commitments, without prior notification of #OSCE participating states. pic.twitter.com/kr6BzGO9uM

— Tigran Balayan (@tbalayan) March 12, 2018

Նման վարքն Ադրբեջանի համար սովորական է դարձել։ Գոյություն ունի Վիեննայի փաստաթուղթ, որի հիման վրա խոշոր զորավարժություններ անցկացնող երկրները պարտավոր են նախապես զգուշացնել դրանց մասին փաստաթղթի տակ ստորագրած բոլոր երկրներին, որոնց թվում են նաև Հայաստանը և Ադրբեջանը։ Սակայն վերը նշված ոչ մի խոշոր զորավարժության ժամանակ Ադրբեջանը պատշաճ ծանուցում չի իրականացրել։

Նշենք նաև, որ Ադրբեջանի ՊՆ հաղորդագրություններում նշված թվերը կարող են և ոռճացված լինել, քանի որ նման քանակի անձնակազմ ու զինտեխնիկա տեղաշարժելը հսկայական ֆինանսական միջոցներ է պահանջում, որոնց կարիքն Ադրբեջանը շատ ունի։ Հավանական է, որ այս զորավարժությունները Իլհամ Ալիևը նախաձեռնել է նախընտրական շրջանից առաջ՝ որպես ներքին լսարանին ուղղված քարոզչական քայլ։

#Азербайджан: на самом крупном предвыборном мероприятии @presidentaz примут участие 25000 человек, 250 единиц бронетехники, 1000 ракетно-артиллерийских установок, 50 единиц авиации. Аналитики ломают головы над тематикой выступления кандидата с самой большой звездой на погонах. pic.twitter.com/z9NEp8i86j

— Tigran Balayan (@tbalayan) March 9, 2018