Նիկոլ Փաշինյանի պատասխանը Ռոբերտ Քոչարյանին

«Ռոբերտ Քոչարյանը պետք է պատասխանի հարցերին: Իրեն չի հաջողվի ճոռոմ բառերով այդ օրակարգից ուշադրությունը շեղել, ինքը պետք է պատասխանի հարցերին»,- նշել է այսօր ԱԺ «Ելք» խմբակցության ղեկավար Նիկոլ Փաշինյանը՝ արձագանքելով ՀՀ երկրորդ նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանի՝ մարտի 12-ին արված հայտարարությանը:

Հիշեցնենք, որ օրեր առաջ, պատասխանելով լրատվամիջոցներից մեկի այն հարցադրմանը, որ Նիկոլ Փաշինյանը Մարտի 1-ի գործի առնչությամբ գրություն էր ուղարկել ՀՀ գլխավոր դատախազին՝ առաջարկելով հարցաքննության կանչել Ռոբերտ Քոչարյանին, ՀՀ երկրորդ նախագահի գրասենյակի ղեկավար Վիկտոր Սողոմոնյանը պատասխանել էր.

«Անկեղծ ասած, Փաշինյանի գործողությունները ինձ բացարձակապես չեն հետաքրքրում: Բայց, օգտվելով առիթից, ասեմ, որ իր «շնորհիվ» ականատես դարձա մեր նորագույն պատմության ամենացինիկ տեսարանի. Մարտի 1-ի անկարգությունների գլխավոր սադրիչն ու կազմակերպիչը Ազգային ժողովում Մարտի 1-ի գործով լսումներ էր կազմակերպել ու նստած ԱԺ նախագահի աթոռին՝ վարում էր նիստը»:

«Ցինիզմ», «սադրիչ» ու «կազմակերպիչ» որակումներին Փաշինյանը գրեթե չի անդրադարձել՝ պնդելով, որ քոչարյանական թիմը նման ճոռոմ խոսքերով փորձում է շեղել հարցը բուն էությունից: 

«Ես՝ ինքս, ասել եմ, ընդ որում, ասել եմ լսումների ժամանակ, որ հպարտ եմ իմ կազմակերպած բոլոր գործողություններով 2008 թվականի մարտի 1-ին, որովհետև դրանով նաև կազմակերպել եմ քաղաքացիների դիմադրությունը պետական հեղաշրջման պրոցեսին»,-  SHANTNEWS-ի հարցին պատասխանել է Նիկոլ Փաշինյանը՝ միաժամանակ ընդգծելով, որ «այս կարգի մեկնաբանություններով Ռոբերտ Քոչարյանը փորձում է, այսպես ասած, շրջանցել ամենակարևոր հարցը.

«Ինքը արել է հայտարարություն 2008 թվականի մարտի 1-ի իրադարձությունների մասին, որ ցուցարարները մեքենայի հետևից դուրս էին գալիս, կրակում զինվորների վրա, հետո թաքնվում»:

Նիկոլ Փաշինյանի պնդմամբ՝ այս հայտարարության իսկությունը մինչ այսօր պարզված ու ճշտված չէ, ու պարզ չէ, թե Ռոբերտ Քոչարյանը ինչ փաստական նյութի վրա է նման հայտարարություն կատարել, ինչի արդյունքում ցուցարարների նկատմամբ զենք է կիրառվել: 

«Հիմա ինչ ասենք, չասենք, էս անհրաժեշտությունը դրված է սեղանին ու օրակարգում, և Ռոբերտ Քոչարյանը պետք է շատ հստակ պատասխան տա՝ ինչի հիման վրա է արել նման հայտարարություն և կարծում եմ, որ մարտի 1-ի սպանությունների բացահայտումը պետք է սկսել հենց այստեղից՝ հենց Ռոբերտ Քոչարյանից այս հարցի պատասխանը լսելուց»,- հայտարարել է Նիկոլ Փաշինյանը: