Վեդանտ Պատելը Հայաստանին և Ադրբեջանին կոչ է արել Բրյուսելում համաձայնության գալ սահմանից ուժերի հեռացման վերաբերյալ

Մայիսի 11-ին Հայաստանի ու Ադրբեջանի սահմանին ռազմական բախումներին է անդրադարձել ԱՄՆ պետքարտուղարության փոխխոսնակ Վեդանտ Պատելը, նա կոչ է արել կողմերին մայիսի 14- ին Բրյուսելում կայանալիք հանդիպման ժամանակ համաձայնության գալ սահմանի երկայնքով ուժերի հեռացման վերաբերյալ:

Լրագրողների հետ ճեպազրույցում նա ասել է.

«Մենք կարծում ենք, որ նմանատիպ բռնությունները խաթարում են Հայաստանի և Ադրբեջանի առաջընթացը դեպի կայուն և արժանապատիվ խաղաղություն, և մենք կոչ ենք անում այս երկու երկրների ղեկավարներին, որ Բրյուսելում մայիսի 14-ի հանդիպման ժամանակ համաձայնեցնեն իրենց ուժերը հեռացնել սահմանի երկայնքից, ինչպես քննարկվել է քարտուղար Բլինկենի կողմից այս բանակցություններին մասնակցության ժամանակ, որոնք մենք հյուրընկալել ենք այստեղ՝ Վաշինգտոնում, մայիսի սկզբին:»,- ասել է փոխխոսնակը:

Լրագրողը հարց է ուղղել, թե արդյոք ԱՄՆ դիտարկում է գալիք բանակցությունները Բրյուսելում որպես վաշինգտոնյան բանակցությունների շարունակություն, Վեդանտ Պատելը պատասխանել է.

«Մենք տեսնում ենք երկխոսությունը, որը հյուրընկալել ենք այստեղ, որպես կարևոր, դրական քայլեր, որոնցում մենք զգացեինք, որ երկու երկրները հնարավորություն ունեն ներգրավվելու որոշ կարևոր հարցերի շուրջ, ընկալելու մյուս կողմի տեսակետները: Եվ մենք հավատում ենք, որ երկարատև առաջընթացի ուղին կլինի շարունակական: Կարծում ենք, որ առկա է խաղաղ լուծում: Ահա թե ինչու մենք՝ սկսած պետքարտուղարից, շարունակել ենք այդքան խորապես ներգրավված լինել այս հարցում: Ես չեմ պատրաստվում առաջ ընկնել այս բանակցություններից»,- հայտնել է դիվանագետը:

Ռուս գործընկերը կասկածի տակ դրեց պետքարտուղարի լավատեսությունը Վաշինգտոնի բանակցությունների արդյունքի վերաբերյալ. նկատում է լրագրողը՝ հետաքրքրվելով Ռուսաստանի այս դիրքորոշման մասին: Ամերիկացի դիվանագետը պատասխանում է.

«Ես շատ ժամանակ չեմ ծախսում մտածելու այն մասին, թե ինչ է ասում իմ ռուս գործընկերն իր ամբիոնից: Ինչ ես կարող եմ ասել, այն է, որ, քանի որ դա վերաբերում է Հայաստանի և Ադրբեջանի միջև խաղաղության այս շատ կարևոր խնդրին, այս գերատեսչությունը կշարունակի խորապես ներգրավված մնալ: Մենք հավատում ենք, որ կա հստակ ճանապարհ դեպի առաջ։ Մենք ուրախ էինք մայիսի սկզբին հյուրընկալել այս երկու երկրներին։ Մենք կարծում ենք, որ այդ բանակցություններն արդյունավետ էին և հիմք դրեցին Բրյուսելից սկսվող այս բանակցությունների շարունակության համար, և մենք կնպաստենք այդ գործընթացի հաջող ընթացքին»,-ասել է պետքարտուղարի փոխխոսնակը: