Որոշումը հետաձգվել է. Ավետիսյանների իրավահաջորդները դիմել են ՍԴ

ՀՀ Սահմանադրական դատարանը որոշել է Ավետիսյանների  իրավահաջորդների դիմումի վերաբերյալ որոշման հրապարակումը հետաձգել մինչև մարտի 16-ը: Այս տեղեկությունը հաղորդել է տուժողների իրավահաջորդների շահերի պաշտպան Արամազդ Կիվիրյանը:

SHANTNEWS-ի հետ հեռախոսազրույցում փաստաբանն ասաց, որ ինքը ներկա չի եղել որոշման հրապարակման ժամանակ: Բանն այն է, որ փաստաբանին Սահմանադրական դատարանի աշխատակազմից խոստացել են զանգահարել որոշման հրապարակումից 30 րոպե առաջ, սակայն չեն զանգահարել: Փաստաբանի հարցին, թե ինչու չեն զանգահարել, Սահմանադրական դատարանից պատասխանել են, որ որոշման հրապարակումը հետաձգվել է, քանի որ լրացուցիչ նյութեր կան ուսումնասիրման համար: Փաստաբանը փորձել է ճշտել, թե ինչ նյութերի մասին է խոսքը, սակայն Սահմանադրական դատարանի աշխատակազմից ոչինչ չեն հայտնել:

«Ես նախ՝ անկեղծորեն չեմ հասկանում, որ ասում են 30 րոպե առաջ պիտի տեղեկացնեն ու չեն տեղեկացնում, երկրորդ՝ ինչո՞ւ է հետաձգվում որոշման հրապարակումը: Գրավոր ընթացակարգով, երբ քննարկում է տեղի ունենում, զեկուցողը կարող է  հարցադրումներ անել: Մինչդեռ այսօր ժամը 10.00-ին՝ առավոտյան նիստի ժամանակ, ոչ մի քննարկում չի եղել: Իրենք առավոտյան ասացին, որ ամեն ինչ արդեն պատրաստ է որոշման կայացման համար: Եվ հանկարծակի ասում են, որ անհրաժեշտ է ինչ-որ նյութեր ուսումնասիրել»,- ասաց Արամազդ Կիվիրյանը:

Հիշեցնենք՝ 2015 թվականի հունվարի 12-ին Գյումրիի Մյասնիկյան 188  հասցեում սպանված Ավետիսյանների 7 հոգանոց ընտանիքի անդամների իրավահաջորդների շահերի պաշտպան Արամազդ Կիվիրյանը դիմել է ՀՀ Սահմանադրական դատարան՝ վիճարկելու այն դրույթը, որ քրեական դատավարության շրջանակում տուժողն իրավունք չունի դիմել ոչ նյութական վնասի փոհատուցման պահանջով:

Հիմնավորումն այն է, որ քրեական դատավարությունը ենթադրում է բացառապես նյութական վնասի փոխհատուցում: Տվյալ դեպքում ներկայացրած դիմումը վերաբերում է այդ նորմերը հակասահմանադրական ճանաչելուն:

Բանն այն է, որ տուժողի իրավահաջորդները ներկայացրել են ոչ նյութական վնասի փոխհատուցման պահանջ Հայաստանի դատարան, սակայն դիմումը չի ընդունվել  նույն հիմնավորմամբ:

 «Եթե Սահմանադրական դատարանն այդ դրույթը հակասահմանադրական ճանաչի, նշանակում է՝ դատարանն արձանագրում է, որ իրենք կարող են դատարան դիմել քրեական գործի շրջանակներում և ներկայացնել այդպիսի պահանջ: Դա նաև հիմք է, որպեսզի մենք հետագայում դիմենք քրեական գործի վերանայման վարույթ հարուցելու և քննություն իրականացնելու համար»,- ասել է փաստաբանը:

Նա ասել է նաև, որ ոչ նյութական վնասի փոխհատուցման հայց Հայաստանում հնարավոր է ներկայացնել բացառապես պետական և տեղական ինքնակառավարման մամինների և պաշտոնատար անձանց ոչ իրավաչափ գործողությունների վերաբերյալ:

«Սահմանված  է  նաև ժամկետ, ինչը, կարծում եմ, այքան էլ իրավաչափ  չէ: Այդ ինստիտուտը դեռ չի գործում այն ծավալով, որ կարող էր գործել: Ոչ նյութական վնասի փոխհատուցման էությունը այն է, որ անձի խախտված իրավունքը լիարժեք վերականգնվի»,- ասել է Արամազդ Կիվիրյանը: