Ոստիկաններին անցորդներն են խնդրել միջամտել. Վալերի Օսիպյանը՝ փողոցային երաժիշտների հետ կապված միջադեպի մասին

ՀՀ ոստիկանապետ Վալերի Օսիպյանն արձագանքել է սոցկայքերում ակտիվ քննարկումների առիթ դարձած տեղեկությունները, թե փողոցային երաժիշտների նկատմամբ Հյուսիսային պողոտայում բռնություն է կիրառվել: Օգոստոսի 30-ին՝ կառավարության նիստից հետո պատասխանելով լրագրողների հարցին՝ արդյո՞ք ծառայողական քննություն կատարվել է այս հարցով, նա պատասխանեց, որ ծառայողական քննության անհրաժեշտություն չկա, այս հարցը շատերին է մտահոգում, այդ թվում՝ ֆեյսբուքյան օգտատերերին: Օսիպյանն ասաց, որ կատարվածն իր մոտ էլ է վրդովմունք առաջացրել, նշեց՝ կան մի շարք պետություններ և քաղաքներ, որտեղ անձամբ է տեսել՝ կան նմանատիպ փողոցներ, որտեղ երաժշտություն է հնչում:

«Շատ գեղեցիկ է, շատ հաճելի, հատկապես՝ զբոսաշրջիկները, որ քայլում են, նրանց համար գրավիչ է, սակայն այն գեղեցիկ է այդտեղով անցնող քաղաքացիների, զբոսաշրջիկների համար, մինչդեռ աղմուկ է բնակիչների համար: Մենք ունենք բազմաթիվ ահազանգեր, բողոքներ քաղաքացիներից: Մի պահ պատկերացնենք այդտեղի բնակիչներին, որոնք առավոտից լսում են այդ երաժշտությունը, որ դարձել է աղմուկ»,- ասել է նա:

Օսիպյանը նշեց, որ միջադեպի մասնակից երկու օտարերկրացի երաժիշտները եղել են ոչ սթափ, միջադեպը երկուսի մեջ է եղել, միմյանց քաշքշել են, հայհոյանքներ տվել, ոստիկանները ստիպված են եղել միջամտել: Նա հայտնեց, որ ոստիկաններին քաղաքացիները՝ անցորդներն են դիմել, խնդրել, որ արձագանքեն: Ոստիկանության պետի խոսքերով՝ կոպիտ խախտում կար համակեցության կանոնների, նրանց մոտ գարեջրի տարաներ են եղել, մինչդեռ հասարակական վայրերում անթույլատրելի է ալկոհոլ օգտագործել: Ոստիկանության գործողություններն, ըստ Օսիպյանի, օրենքի սահմաններում են եղել, որևէ մեկի նկատմամբ օրենքից դուրս քայլ անելու մտադրություն ոստիկանները չեն ունեցել: Օսիպյանն ասաց, որ երաժիշտները բերման են ենթարկվել ոստիկանություն, կազմվել է արձանագրություն, որոշվել է նրանց ոչ սթափ լինելը, սահմանված ժամկետը լրանալուց հետո նրանք բաց են թողնվել և այս պահին էլ ազատության մեջ են:

«Առավոտյան հանձնարարական եմ տվել ոստիկաններին, որ մոտենան, հրահանգավորեն, զգուշացնեն՝ երաժշտությունը շատ բարձր չլինի, որպեսզի իրենց էլ հաճելի լինի, նաև համակեցության կանոնները ու մեր համաքաղաքացիների անդորրը չխախտեն, պետք է հիշել, որ կան տարբեր տարիքի, տարբեր առողջական վիճակ ունեցող քաղաքացիներ»,- ասաց նա՝ հավելելով, որ երաժշտությունը պետք է հնչի մինչև 23:00:

Դիտարկմանը, թե ոստիկանությունը բիրտ ուժ է կիրառել երաժիշտների նկատմամբ, Օսիպյանն արձագանքեց, որ ոստիկանությունը գործել է օրենքի սահմաններում, ապա նշեց՝ համացանցում անպայման վատ պահերն են տեղադրում, հայտնեց, որ օրենքը ոստիկանության համար նախատեսում է ֆիզիկական ուժի գործադրում:

«Դրանից պետք չէ վախենալ, դա օրենքով է կարգավորվում: Չի կարող ոստիկանը բոլորի նկատմամբ լինել այնպիսին, ինչպես բոլորն են ուզում տեսնել: Ոստիկանը ցանկալի է այն մարդկանց համար, ովքեր օրենք են հարգում, ոստիկանին ու համազգեստը, այսինքն՝ օրինապաշտների համար, իսկ օրենք խախտողների, օրինազանցների համար, վստահեցնում եմ, ցանկալի չէ»,- նշեց նա: