Լեռնային Ղարաբաղից բռնի տեղահանված 4145 երեխա արդեն հաճախում է դպրոց

Վարչապետի մամուլի քարտուղար Նազելի Բաղդասարյանը Կառավարության «Հումանիտար կենտրոնից» ներկայացրել է մանրամասներ Լեռնային Ղարաբաղից բռնի տեղահանված անձանց կեցավայրերի, սննդի, զբաղվածության, կրթության ապահովման ուղղությամբ Կառավարության աջակցության ծրագրերը:

«Ձեզ կներկայացնենք, թե այս պահի տվյալներով տարբեր ուղղություններով ինչ գործընթացներ են իրականացվել Լեռնային Ղարաբաղից բռնի տեղահանված անձանց կեցության, առողջապահական, կրթության և այլ ոլորտներում հումանիտար խնդիրների լուծման համար»,-նշել է վարչապետի մամուլի քարտուղարը:

Նազելի Բաղդասարյանը տեղեկացրել է, որ վերջին տվյալներով Լեռնային Ղարաբաղից բռնի տեղահանված անձանց թիվը մնում է անփոփոխ՝ 100 625: Հաշվառվածների թվում կա փոփոխություն, և այս պահին այն կազմում է 95 711, այսինքն՝ բռնի տեղահանվածների առավել քան 95 տոկոսը հաշվառվել է: Հաշվառված անձանց թվում շուրջ 29 000-ը երեխաներ են: Երեխաների համար երկու կարևոր գործընթաց է իրականացվում՝ դպրոցների տեղավորումը և 100 000 դրամի միանվագ աջակցության տրամադրումը:

Վարչապետի մամուլի քարտուղարը տեղեկացրել է, որ երեկ երեկոյան Կառավարությունն արդեն իսկ գրավոր ընթացակագով հաստատել է 100 000 միանվագ աջակցության տրամադրման որոշումը և տրամադրման կարգը: Այն բոլոր ընտանիքներում, որտեղ կան անչափահաս երեխաներ, անհրաժեշտություն կա մուտք գործել Աշխատանքի և սոցիալական հարցերի նախարարության հարթակ, որտեղ երեխայի մայրը կամ խնամակալը պետք է լրացնեն երեխայի ծննդյան վկայականի տվյալները, որպեսզի այդ տվյալները կապվեն մոր կամ խնամակալի տվյալներին և գումարը փոխանցվի մոր կամ խնամակալի հաշվեհամարին:

Բոլոր այն անձինք, ովքեր առաջին կամ երկրորդ կարգի հաշմանդամություն ունեն կամ 75-ից բարձր տարիքային խմբում են, հատկացվելիք գումարը կարող են ստանալ Հայփոստի միջոցով:

Եվս մեկ անգամ ներկայացնելով 100 000 դրամ միանվագ աջակցության ստացման ընթացքը՝ մամուլի քարտուղարը նշել է, որ այն անձինք, ովքեր ունեն բանկային քարտեր, մոտ օրերս կստանա այդ գումարը, իսկ այն անձինք, ովքեր չունեն բանկային քարտեր, պետք է մոտենան մոտակա ցանկացած բանկ (բացի Մելլաթ և Ֆասթ բանկերից) և բանկային քարտի հաշիվ բացեն, որից հետո կստանան այդ գումարը: Բանկային քարտային հաշվի բացումը և քարտի տրամադրումը տեղի կունենա անվճար: Բանկային քարտային հաշվի բացումից հետո, անհրաժեշտություն չկա այն ներկայացնել Միասնական սոցիալական ծառայություն, բավարար է պարզապես մոտենալ բանկ և բացել քարտային հաշիվ:

Առողջապահության նախարարության փոխանցած տվյալների համաձայն, այս պահին 345 բուժառու Հայաստանի տարբեր բուժհաստատություններում ստանում է բուժօգնություն, նրանցից 102 վիճակը շարունակում է մնալ ծանր, 37-ը՝ ծայրահեղ ծանր, վերակենդանացման բաժանմունքում գտնվում է 9 երեխա: Հատուկ խնամիք կարիք ունեցող անձինք, ինչպես նաև մեծահասակները նույնպես պետության ուշադրության կենտրոնում են:

Երեխաների կրթության հետ կապված հարցերը նույնպես Կառավարության ուշադրության կենտրոնում են: Միգրացիայի և քաղաքացիության ծառայության ներկայացրած տվյալների համաձայն, 0-5 տարեկան երեխաների թիվը կազմում է 7996, 6-19 տարեկան երեխաների թիվը կազմում է 21 266: Դպրոցահասակ 21 266 երեխաներից 4145-ն արդեն հաճախում է դպրոց: Ըստ մարզերի բաշխումը հետևյալն է՝ Սյունիքում՝ 285, Վայոց ձորում՝ 112, Գեղարքունիքում՝ 179, Արարատում՝ 758, Կոտայքում՝ 800, Արագածոտնում 223, Արմավիրում՝ 415, Շիրակում՝ 177, Լոռիում՝ 185, Տավուշում՝ 161 և Երևանում՝ 850:

Զբաղվածության ապահովման շրջանակում վարչապետի մամուլի քարտուղարի ներկայացմամբ՝ Աշխատանքի և սոցիալական հարցերի նախարարությունը գործարկել է հարթակ՝ www.workforall.am, որի միջոցով Լեռնային Ղարաբաղից բռնի տեղահանված անձինք կարող են դիմել իրենց հարմար աշխատանքի համար: Տվյալ պահին կայքում նշված է, որ շուրջ 4500 թափուր աշխատատեղ կա:

Նազելի Բաղդասարյանը նաև ներկայացրել է կրթության ոլորտում Երևանի և մարզերի դպրոցներում առկա թափուր հաստիքները, ըստ որի՝ ուսուցչի 1035 թափուր աշխատատեղ կա, որից Սյունիքում՝ 7, Վայոց ձորում՝ 6, Գեղարքունիքում՝ 22, Արարատում՝ 132, Կոտայքում՝ 60, Արագածոտնում՝ 48, Արմավիրում՝ 258, Շիրակում՝ 26, Լոռիում՝ 449, Տավուշում՝ 11 և Երևանում՝ 16: Առողջապահության ոլորտում առկա է 273 ավագ բուժաշխատողի թափուր հաստիք և 59 միջին բուժաշխատողի թափուր հաստիք: Ըստ մարզերի բաշխվածությունը հետևյալն է՝ Արագածոտնում՝ շուրջ 37, Արարատում՝ 26, Արմավիրում՝ 13, Գեղարքունիքում՝ շուրջ 46, Կոտայքում՝ 32, Լոռիում՝ 65, Շիրակում՝ 32, Սյունիքում՝ 32, Տավուշում՝ 23, Վայոց ձորում՝ 23: