ԱԳՆ գլխավոր քարտուղարի լիազորությունները կընդլայնվեն

ԱԺ պետաիրավական և մարդու իրավունքների պաշտպանության մշտական հանձնաժողովն այսօր դրական եզրակացությամբ մարտի 20-ին մեկնարկող հերթական նիստերի օրակարգ է ընդգրկել «ՀՀ դիվանագիտական ծառայության մասին» օրենքում փոփոխություններ կատարելու վերաբերյալ օրենքի նախագիծը: 

Նախագծով սկզբունքային մի շարք փոփոխություններ են նախատեսվում՝

1- դիվանագիտական ծառայության խնդիրների համապատասխանացումը՝ ՀՀ Սահմանադրությամբ ՀՀ կառավարությանն ու պետական կառավարման համակարգի մարմիններին վերապահված լիազորություններին, այսինքն, այս փոփոխությունը կատարվում է խորհրդարանական կառավարման համակարգին անցնելու պատճառով:

2-Սահմանվում է նոր կարգ՝ օտարերկրյա պետություններում դիվանագիտական ներկայացուցչությունների հիմնման եւ  լուծարման, դիվանագիտական ներկայացուցիչների նշանակման և հետկանչի, բարձրագույն դիվանագիտական աստիճաններ շնորհելու և դրանցից զրկելու մասով:

3- Հստակեցվում է դիվանագիտական ծառայության պաշտոնի համալրման, դիվանագետի ատեստավորման և պաշտոնական առաջխաղացման կարգը: 

4- Նախագծով դիվանագետներին տրվում են որոշակի սոցիալական երաշխիքներ՝ մասնավորապես դիվանագիտական աստիճանի համար հավելավճարի ավելացում, օտարերկրյա պետություն մեկնելիս և վերադառնալիս անձնական ուղեբեռի ծախսերի փոխհատուցում, ծառայության ընթացքում յուրաքանչյուր տարի մեկ անգամ դեսպանի և նրանց ընտանիքների անդամների և ծառայության ընթացքում մեկ անգամ դիվանագետների և նրանց ընտանիքների անդամների Հայաստանի Հանրապետության տարածքում արձակուրդի գալու դեպքում ճանապարհածախսի փոխհատուցում, դիվանագետների կենսաթոշակներում դիվանագիտական հավելավճարների հաշվարկում:

Երկար ժամանակ շրջանառվում էին նաև լուրեր, որ տվյալ նախագծով էականորեն ընդլայնվում են արտաքին գործերի նախարարության գլխավոր քարտուղարի լիազորությունները, և նա իր գործառույթներով հակակշիռ է դառնալու նախարարին: Արտաքին գործերի փոխնախարար Շավարշ Քոչարյանը, սակայն, այսօր հերքել է արտաքին գործերի նախարարության գլխավոր քարտուղարին նման լիազորություններ տրամադրելու մասին խոսակցությունները:

«Տարբերությունը` արտաքին գործերի նախարարության գլխավոր քարտուղարի և այլ նախարարությունների, կայանում է մի հարցում: Հաշվի առնելով դիվանագիտական ծառայության մասին օրենքի առանձնահատկությունները և այն հանգամանքը, որ գլխավոր քարտուղարի պաշտոնը նաև դիվանագիտական ծառայության պաշտոն է, ինքն ունի տարբերվող այլ լիազորություններ, որոնք չունեն այլ գերատեսչությունների գլխավոր քարտուղարները: Այդքանը»,- նշել է փոխնախարարը, պնդելով, որ նախարարին հակակշռելու մասին լուրերը ամենեւին իրականությանն ու նախագծի բովանդակությանը չեն համապատասխանում: 

Լրագրողները փոխնախարարից հետաքրքրվել են նաև, թե ճի՞շտ են արդյոք այն տեղեկությունները, որ Վատիկանում ՀՀ դեսպանը հրաժարական է ներկայացնելու, ինչին Շավարշ Քոչարյանը արձագանքել է՝« Գիտեք ինչ, խոսվել և այլն…. ես ըտենց հարցերին չեմ էլ պատասխանում, որովհետև ինչ ասես` խոսվում է, իսկ իրականությունը լրիվ ուրիշ է լինում»: