Քննարկվել է Վճռաբեկ դատարանի քաղաքացիական պալատի դատավորի թափուր տեղի համար առաջադրված դատավորների թեկնածուի ընտրության հարցը

Ազգային ժողովը հոկտեմբերի 25-ին շարունակել է հերթական նիստերի աշխատանքը եւ քվեարկություններով ընդունել նախորդ օրը քննարկված օրենսդրական նախաձեռնությունները:

Հաջորդիվ խորհրդարանը քննարկել է Վճռաբեկ դատարանի քաղաքացիական պալատի դատավորի թափուր տեղի համար առաջադրված դատավորների թեկնածուի ընտրության հարցը:

Բարձրագույն դատական խորհուրդը Վճռաբեկ դատարանի քաղաքացիական պալատի դատավորի թափուր տեղի համար առաջադրել է Կարեն Թումանյանի, Նաիրա Հովսեփյանի եւ Գուրգեն Մալխասյանի թեկնածությունները:

Բարձրագույն դատական խորհրդի նախագահ Կարեն Անդրեասյանը ներկայացրել է Վճռաբեկ դատարանի քաղաքացիական պալատի դատավորի թափուր տեղի համար առաջադրված թեկնածուների կենսագրական տվյալներն ու աշխատանքային անցած ուղիները:

Թեկնածու Կարեն Թումանյանն ունի 22 տարվա մասնագիտական ստաժ, դասավանդում է «Վանաձորի պետական համալսարան» հիմնադրամում, «Թումանյան» փաստաբանական գրասենյակի հիմնադիր-տնօրենն է:

Նա փաստել է, որ դատական իշխանության անկախությունը ժողովրդավարության հիմնաքարերից է: Ըստ նրա՝ ժողովրդավարության զարգացման գործում իր կարեւոր դերակատարությունն ունի Վճռաբեկ դատարանը՝ արդար դատաքննությամբ:

Հաջորդ թեկնածու Նաիրա Հովսեփյանն ավարտել է ԵՊՀ իրավագիտության ֆակուլտետն ու ասպիրատուրան, ունի 31 տարվա մասնագիտական ստաժ, որից 27-ը՝ դատավորի: Նա Երեւանի առաջին ատյանի ընդհանուր իրավասության քաղաքացիական դատարանի դատավոր է, ԲԴԽ անդամ:

Թեկնածուն ելույթում նշել է, որ Վճռաբեկ դատարանը պետք է ապահովի օրենքի միատեսակ կիրառումը եւ իրականացնի արդար դատաքննություն:

ԱԺ «Քաղաքացիական պայմանագիր» խմբակցության պատգամավոր Գեւորգ Պապոյանի հարցը վերաբերել է իշխանության տարբեր ճյուղերի միջեւ գործակցությանը: Ի պատասխան նշվել է, որ իշխանության երեք թեւերի համար պետք է գործի օրինականության սկզբունքը:

Թեկնածու Գուրգեն Մալխասյանն ունի 29 տարվա մասնագիտական ստաժ, «Մալխասյանց փաստաբանական կենտրոն» ՍՊԸ-ի փոխտնօրենն է, 2023 թվականից Շիրակի մարզի առաջին ատյանի ընդհանուր իրավասության դատարանի դատավոր է:

Նա դիտարկումներ է ներկայացրել արդար դատաքննության, Վճռաբեկ դատարանի գործունեության եւ կայացրած վճիռների վերաբերյալ: Ըստ նրա՝ Վճռաբեկ դատարանն իրավունքի դատարան է:

ԱԺ «Քաղաքացիական պայմանագիր» խմբակցության պատգամավոր Բաբկեն Թունյանի հարցը վերաբերել է հատկապես տնտեսությանն առնչվող դատական գործերի ժամկետների ձգձգմանը: Նա հետաքրքրվել է, թե ինչ հնարավորություններ է տեսնում թեկնածուն այդ գործերի դատաքննությունը ժամանակին ավարտելու ուղղությամբ:

Ի պատասխան նշվել է, որ այդ հարցում անհրաժեշտ են օրենսդրական փոփոխություններ:

ԱԺ «Քաղաքացիական պայմանագիր» խմբակցության պատգամավոր Արուսյակ Ջուլհակյանը հետաքրքրվել է, թե թեկնածուն ինչու է որոշել առավել բարձր պաշտոնի տեղափոխվել:

«Ես հաղթահարել եմ առաջին ատյանի դատավորի համար անհրաժեշտ շեմը»,- պատասխանել է Գուրգեն Մալխասյանը:

Մտքերի փոխանակությանն ԱԺ «Քաղաքացիական պայմանագիր» խմբակցության ղեկավար Հայկ Կոնջորյանն իր ելույթում անդրադարձել է ընդդիմադիր գործընկերների նախորդ օրը հնչեցրած հարցադրումներին եւ դիտարկումներին: Նա անընդունելի է համարել որեւէ դատավորի՝ որեւէ թեկնածուին թիրախավորելը:

«Հայաստանի Հանրապետությունն իրավական պետություն է, եւ դատական համակարգը պետք է զերծ լինի ազդեցություններից»,- ասել է Հայկ Կոնջորյանը: Նա նաեւ ուղերձ է հղել դատավորներին, դատական համակարգի ներկայացուցիչներին՝ փաստելով չենթարկվել ճնշումներին ու սպառնալիքներին:

Բանախոսն անդրադարձել է նաեւ չընտրված թեկնածուներին եւ փաստել, որ նրանք գնահատված են համակարգի կողմից: «Մենք ունեցել ենք թեկնածուներ, որոնք ստացել են զրո ձայն, բայց հաջորդ ընտրությանն ընտրվել են: Ապագայում էլ ունենալու ենք, որովհետեւ սա մեզ համար խաղ չէ, սա մեզ համար դատական իշխանության բարելավման գործընթաց է եւ ես վստահ եմ, որ այն թեկնածուները, որենք եկել են այստեղ՝ բոլորն էլ բավականաչափ պատրաստված են, բոլորն էլ արժանավոր են ու գնահատված: Մենք հավատում ենք, որ մենք թե՛ այս քննարկմամբ, թե՛ մեր ընտրությամբ ավելի ենք ամրապնդում ՀՀ-ում իրավունքի գերակայությունը, դատական համակարգի կայունությունը եւ իրավակարգը»,- փաստել է խմբակցության ղեկավարը:

Թեկնածուներն իրենց եզրափակիչ ելույթներում շնորհակալություն են հայտնել օրենսդիր իշխանությանը նպատակային եւ շահագրգիռ քննարկումների համար: