ՀՀ-ում առկա ավտորիտարիզմը անցում է կատարում դեպի տոտալիտարիզմ. «Երկիր Ծիրանի»

«Երկիր Ծիրանի» կուսակցության լրատվական ծառայությունը հայտարարություն է տարածել, որը ներկայացնում ենք ամբողջությամբ.

«Հայաստանի Հանրապետության անունից հերթական անգամ 2018 թվականի մարտի 20-ին հանուն բռնապետության հրապարակվեց դատավճիռ, որով ազատազրկման դատապարտվեցին Ժիրայր Սեֆիլյանը, Գևորգ Սաֆարյանը, Ներսես Պողոսյանը, Սասունիկ Կիրակոսյանը, Գալուստ Գրիգորյանը և Հրայր Թոփչյանը։

Այս դատավարությունը և դատավճիռը ահազանգ և վկայություն են, որ Հայաստանի Հանրապետությունում առկա ավտորիտարիզմը (վերահսկվող ժողովրդավարությունը) անցում է կատարում դեպի տոտալիտարիզմի (աղքատ և ծեր ժողովրդով ամբողջատիրության): Այս և նման այլ որոշումները, որոնք հրապարակվել են քառորդդարյա նորանկախ Հայաստանի Հանրապետության անունից, որոշումներ են ընդդեմ հայ ազգի, ներկայիս հայոց պետականության, Հայաստանի և Արցախի ինքնիշխանության:

Նորանկախ Հայաստանի Հանրապետությունում ժողովրդի արդար ցասումը մշտապես ճնշվել է բռնակալության կողմից, ինչի հետևանքով ունեցել ենք և՛ զոհեր, և՛ վիրավորներ, և՛ քաղաքական հալածյալներ: Արցախյան վերազարթոնքը և Հայաստանի անկախացումը մեր առջև չբացեցին ազգային ինքնության և անկախ պետականության ընձեռած հորիզոնները: Դեռ իննսունականներից ներդրված բռնակալական քաղաքական համակարգը ձախողեց նորանկախ հայոց պետականությունը: Հայոց ձախողված պետականությունը մեծ քայքայումներ մտցրեց մեր կյանքի բոլոր բնագավառներում, հոգեկան անկումն ու հուսալքությունը հայրենիքից վանեցին միլիոնավոր մարդկանց՝ և՛ հայրենիքում ապրողներին, և՛ հայրենիքից դուրս:

Չնայած համատարած հուսահատությանն ու կրավորականությանը` 2016 թվականը դարձավ ազգային, քաղաքացիական և հասարակական ակտիվության տարի: Հայ ազգը ցուցադրեց  կամք իր կյանքի ընթացքը տնօրինելու հարցում՝ կանխեց պատերազմը և հավանություն տվեց  Սասնա Ծռերի ապստամբությանը: 

Քաղաքական հայացքների համար քաղաքացիներին ազատազրկելը, քաղաքական բանտարկյալների թիվն ավելացնելը, այլախոհությունը չհանդուրժելը և ազատությունների բռնաճնշումները վկայությունն են, որ Հայաստանում շուրջ քառորդ դար գործող ապօրինի իշխանությունը հետագայում ևս շարունակելու է իր մարդատյաց և կեղեքող գործունեությունը, եթե  տեղի չունենա համազգային դիմադրություն և համազգային ընդվզում ընդդեմ բռնակալության:

«Երկիր Ծիրանի» կուսակցությունը կոչ է անում ստեղծել ընդվզման օջախներ Հայաստանում  և Հայաստանից դուրս հայաշատ բոլոր քաղաքներում մեկ գաղափարի և մեկ օրակարգի շուրջ՝ տապալել բռնակալությունը և հայ ազգի բոլոր հատվածներին վերադարձնել ընտրելու և ընտրվելու իրավունքը հայոց պետականության քաղաքական ինստիտուտներում»:

Հիշեցնենք, որ ավելի վաղ «Ժառանգություն» կուսակցությունը հայտարարություն էր տարածել, որտեղ «քաղաքական հաշվեհարդար» էր որակել Ժիրայր Սեֆիլյանի, Գևորգ Սաֆարյանի և մյուսների նկատմամբ Երևանի ընդհանուր իրավասության դատարանի կատարած դատավճիռը:

SHANTNEWS-ն ավելի վաղ հայտնել էր, որ այսօր՝ մարտի 20-ին, Երևանի ընդհանուր իրավասության դատարանի Շենգավիթի նստավայրում ավարտվեց «Հիմնադիր խորհրդարանի» նախագահ Ժիրայր Սեֆիլյանի և մյուսների դատավարությունը: Ժիրայր Սեֆիլյանը դատապարտվեց 10 տարի հինգ ամսվա ազատազրկման:

Գևորգ Սաֆարյանը դատապարտվեց 5.5 տարվա ազատազրկման: Դատավորը հաշվարկեց մեկ այլ՝ «տոնածառի» գործով Սաֆարյանի՝ արդեն կրած երկու տարվա պատժաչափը: Այսինքն՝ այսօր Գևորգ Սաֆարյանը դատապարտվեց 3.5 տարվա ազատազրկման:

Այս գործով անցնող մյուս մեղադրյալներ Սասունիկ Կիրակոսյանը և Ներսես Պողոսյանը դատապարտվեցին 3.5-ական, Գալուստ Գրիգորյանը և Հրայր Թոփչյանն էլ՝ 3-ական տարվա ազատազրկման:

Ամենամեղմ՝ 2 տարվա ազատազրկման դատավճիռը մեղադրյալ Հովհաննես Պետրոսյանինն էր: Նա միակն էր, ով դատարանում ոտքի էր կանգնում, երբ դատավորը ներս էր մտնում: Նա է դատարանում Սեֆիլյանի դեմ ցուցմունք տվել: Հովհաննես Պետրոսյանը ընդամենը երկու ամսից ազատ կարձակվի: