Շրջակա միջավայրին հասցվել է 5 մլն դրամի վնաս

Մարտի 12-ից 16-ն ընկած ժամանակահատվածում բնապահպանության նախարարության բնապահպանության և ընդերքի տեսչական մարմնի ստորաբաժանումների աշխատակիցները ստուգումների, շրջայցերի, հաշվետվությունների ընդունման, տեսչական մարմնին հանձնված վարչական վարույթի քննության արդյունքում հայտնաբերել և արձանագրել են 23 իրավախախտում:

Արդյունքում շրջակա միջավայրին հասցվել է 5.045.410 դրամի վնաս: 

Բուսական աշխարհի պահպանության ոլորտում արձանագրվել է իրավախախտման 12 դեպք: Քննված վարչական վարույթներով նշանակվել է 2.150.000 դրամի վարչական տուգանք, հաշվարկվել 5.045.410 դրամի շրջակա միջավայրին հասցված վնաս: Ներկայացնենք օրինախախտման դեպքերն ըստ մարզերի.

• Լոռի՝ ապօրինի ծառահատման 3 դեպքով (11 բոխի, 2 կաղնի) հաշվարկվել է 394.500 ՀՀ դրամի, վառելափայտի ապօրինի տեղափոխման 1 դեպքով (0.2 խմ փայտանյութ)՝ 7.200 ՀՀ դրամի շրջակա միջավայրին հասցված վնաս:
• Տավուշ՝ ապօրինի ծառահատման 6 դեպքով (7 հաճարենի, 7 բոխի, 14 կաղնի) հաշվարկվել է 3.793.750 ՀՀ դրամի շրջակա միջավայրին հասցված վնաս, որից 3 դեպքով հաղորդում է ներկայացվել իրավապահ մարմիններին։ Վառելափայտի ապօրինի տեղափոխման 1 դեպքով (1.7 խմ փայտանյութ) հաշվարկվել է 61.200 ՀՀ դրամի շրջակա միջավայրին հասցված վնաս: 
• Սյունիք՝ ապօրինի ծառահատման 1 դեպքով (1 բոխի, 1 կաղնի) նշանակվել է 100.000 ՀՀ դրամի վարչական տուգանք, հաշվարկվել 67.500 ՀՀ դրամի շրջակա միջավայրին հասցված վնաս:

Կենդանական աշխարհի պահպանության ոլորտում արձանագրվել է իրավախախտման 3 դեպք, բոլորն էլ ձկան և խեցգետնի ապօրինի որս Գեղարքունիքում: Առգրավվել է 112 հատ՝ 15.6 կգ կարաս տեսակի ձուկ, հանձնվել  Սևանի թիվ 1 Հեքիաթ մանկապարտեզ, 136 հատ՝ 2 կգ խեցգետին բաց է թողնվել Սևանա լիճ, 31 հատ՝ 15 կգ սիգ տեսակի ձուկ հանձնվել է «Վարդենիսի նյարդահոգեբանական տուն-ինտերնատ» ՊՈԱԿ, 24 հատ՝ 10,5 կգ սիգ տեսակի ձուկ հանձնվել է «Գավառի մանկատուն» ՊՈԱԿ։

Մթնոլորտային օդի և ջրերի պահպանության, թափոնների տեղաբաշխման, հողերի օգտագործման և պահպանման ոլորտ ևս արձանագրվել է իրավախախտման 3 դեպք: Քննված վարչական վարույթներով նշանակվել է 210.000 ՀՀ դրամի վարչական տուգանք․
Երևանում առանց անթափանց ծածկոցի շինարարական աղբի տեղափոխում, նշանակվել է 50.000 ՀՀ դրամ,
Լոռիում հողի օգտագործման կարգի խախտումը, առանց թույլտվության արտադրական թափոնների տեղադրումը և  հողի օգտագործման կարգի խախտումը տուգանվել են 80.000-ական դրամով:

Ընդերքի պահպանության ոլորտ Վայոց ձորում հրաբխային խարամի տեղափոխման 1 դեպքի վերաբերյալ վարչական իրավախախտման վարույթը գտնվում է քննության ընթացքում։

Ընդհանուր առմամբ բնապահպանության նախարարության բնապահպանության և ընդերքի տեսչական մարմնի պատժամիջոցներից հաշվետու ժամանակահատվածում  պետական բյուջե է մուտքագրվել 749.040 ՀՀ դրամ: