Հայաստանում բոլոր ապահովագրական ընկերությունները խախտումներով են աշխատում. Արտակ Խաչատրյան

Վարորդների իրավունքների պաշտպան Արտակ Խաչատրյանը և «Խաչատուրով» փաստաբանական գրասենյակի փաստաբան Գայանե Պապոյանն այսօր խոսել են այն մասին, թե ինչ բնույթի խախտումներով են աշխատում ապահովագրական ընկերությունները: Բանախոսներն ասել են, որ ընկերությունները հրաժարվում են փոխհատուցել վարորդներին՝ ասելով, որ ուշ են զանգահարել՝ հաշվի չառնելով, որ շատ հաճախ զանգերին միշտ չէ, որ պատասխանում են՝ հատկապես գիշերային ժամերին:

«Ապահովագրական ընկերությունները սուբրոգացիայի նոր հիմք են մտածել: Մինչև 2017 թվականը ԱՊՊԱ պայմանագրերի մեջ նշվում էր լիազորված վարորդների ցանկ: Այժմ ընկերությունները գումարի բռնագանձման պահանջ են ներկայացնում այն ապահովադիրների դեմ, ովքեր մինչև 2017 թվականը կնքել են այդ նույն ԱՊՊԱ պայմանագրերը, սակայն լիազորված վարորդների ցանկում նշված չեն եղել: Ստացվում է՝ անձը պետք է ինքն իրեն լիազորեր: Հիմա ապահովագրական ընկերությունները պահանջ են ներկայացնում, ասում են, որ, այո՛, դու ապահովադիր ես, բայց քո անունը նշված չի եղել, ուստի դու պարտավոր ես վերադարձնել մեր հատուցած գումարները»,-ասել է Գայանե Պապոյանը:

Ըստ փաստաբանի՝ նշվածից բացի, լինում են դեպքեր, երբ լուսանկարների հիման վրա ապահովագրական ընկերությունը հաշվարկում է վնասը, մեկ այլ դեպքում՝ հրաժարվում դա անել:

«Պատկերացրեք իրավիճակ, երբ որ վթար է տեղի ունեցել, հարուցվել է վարչական վարույթ, որը մոտավորապես 6-7 ամիս կտևի, եթե ոչ ավելի երկար, էդ ընթացքում վարորդը հնարավոր է վաճառել է ավտոմեքենան: Այս ոլորտում օրենքի բաց ունենք: Օրենքն ասում է՝ այդ ամբողջ ընթացքում մեքենայի սեփականատերն իրավունք չունի մեքենան վերանորոգելու, բայց վաճառելու, օտարելու հետ կապված օրենքը ոչ մի կերպի չի կարգավորում: Վարորդը վաճառում է, և նոր սեփականատերը, ենթադրենք, վերանորոգում է, կամ նոր սեփականատիրոջից կոնտակտ չկա: Բոլոր էդ դեպքերում, երբ որ վարչական վարույթ է հարուցված լինում, ապահովագրական ընկերությունները երևի թե կռահում են, որ այս մեքենան արդեն վաճառվել է և գրություն են ուղարկում, որպեսզի մեքենան ներկայացվի զննման, երբ որ վարորդն ասում է, որ սեփականատեր է փոխվել և հնարավորություն չունի մեքենան զննման ներկայացնել, ապահովագրական ընկերությունը պատասխանում է, որ չենք կարող ձեզ հատուցել, քանի որ մեքենան չեք ներկայացնում զննման: Դեպքի օրն արված լուսանկարների հիման վրա վնասը հաշվարկելու պահանջը մերժվում է»,- հավելել է Պապոյանը:

Ըստ վարորդների իրավունքների պաշտպան Արտակ Խաչատրյանի՝ կան դեպքեր, երբ մինուսներն ակտիվորեն ազդեցություն են ունենում, բայց բոնուսները՝ ոչ: Բոնուսից օգտվող վարորդը, երբ դիմում է, իրեն ասում են, որ վերջին տարվանը միայն կարող են փոխհատուցել, դրանից առաջ ունեցած բոնուսը չեղարկում են: Խաչատրյանն ասել է, որ Հայաստանում չկա ապահովագրական ընկերություն, որն աշխատում է առանց խախտումների: