Արցախի մարդու իրավունքերի պաշտպանն արձագանքել է Ասյա Խաչատրյանի հայտարարություններին

Արցախի մարդու իրավունքերի պաշտպանն արձագանքել է ՀՀ քաղաքացու պնդումներին, թե Արցախի Հանրապետության ոստիկանության կողմից իր նկատմամբ ապօրինություններ են կատարվել:

Մարտի 26-ին ժամը 20:20-ին epress.am լրատվականով հրապարակվել է «Ղարաբաղի ոստիկանները Ասյա Խաչատրյանին. Օրենք Հայաստանում կպահանջես» վերտառությամբ նյութ, որին կից տեսանյութում ներկայացվել են Արցախի Հանրապետության ոստիկանության կողմից քաղաքացի Ասյա Խաչատրյանի նկատմամբ ապօրինություններ կատարելու վերաբերյալ վերջինիս պնդումները:

Ներկայացված տեսանյութի հիման վրա, ղեկավարվելով ԱՀ մարդու իրավունքների պաշտպանի մասին օրենքի 15–րդ հոդվածով, ԱՀ մարդու իրավունքների պաշտպանը կայացրել է սեփական նախաձեռնությամբ քննարկման ընթացակարգ սկսելու մասին որոշում:

Եթե Ա.Խաչատրյանի պնդումները համապատասխանում են իրականությանը, ապա ԱՀ ոստիկանության տվյալ ծառայողների գործողությունները անընդունելի են և ենթակա են խիստ իրավական գնահատականի:

Միաժամանակ պարզաբանում ենք, որ ԱՀ մարդու իրավունքների պաշտպանի հետ հեռախոսազրույցի բովանդակությունը տեսանյութում և լրատվական նյութում ներկայացված է ոչ ամբողջական և մասնակիորեն սխալ: Իրականում ԱՀ մարդու իրավունքների պաշտպան Ռ.Մելիքյանը Ա.Խաչատրյանին պարզաբանել է նշված իրավիճակում իրավական պաշտպանության արդյունավետ միջոցները, ավելին` խրախուսել է օգտվել դրանցից: Իսկ քաղաքացին նշել է, որ իր պնդումները ԱՀ մարդու իրավունքների պաշտպանի հաստատությանը կներկայացնի գրավոր: Սակայն նշված փաստերով ԱՀ մարդու իրավունքների պաշտպանի հաստատությունը որևէ գրավոր բողոք չի ստացել :

ԱՀ մարդու իրավունքների պաշտպանի հաստատությունը լինելու է հետևողական Ա.Խաչատրյանի պնդումներին պատշաճ իրավական արձագանք ապահովելու հարցում և այդ ուղղությամբ ձեռնարկելու է օրենքով նախատեսված բոլոր միջոցները: Քննարկման հետագա ընթացքի մասին հանրությանը կտրամադրվեն լրացուցիչ տեղեկություններ:

Արցախում իրավական մշակույթի ամրապնդումը, մարդու հիմնարար իրավունքների երաշխավորումը եղել և մնում է ԱՀ մարդու իրավունքների հաստատության հավատամքը և առաջնային առաքելությունը:

Հիշեցնենք, որ երեկ Epress.am կայքում «Ղարաբաղի ոստիկանները Ասյա Խաչատրյանին. Օրենք Հայաստանում կպահանջես» վերտառությամբ նյութ էր հրապարակվել, որի տեսանյութում Ասյա Խաչատրյանը պատմում է, որ 2018-ին մեկնել է Արցախ՝ բնակվելու նպատակով: Փետրվարի 1-ին աշխատանքից դուրս է եկել և ուշ կեսգիշերին զբոսնել է Ստեփանակերտում, ինչից հետո իրեն են մոտեցել ոստիկանները՝ պահանջելով անձնագիրը, ինքը ցույց է տվել, սակայն չի թողել, որ ոստիկանները վերցնեն այն: Խաչատրյանը պնդում է, որ այդ ամենից հետո ոստիկանները սկսել են իրեն և ընկերուհուն հետապնդել, մի քանի անգամ բերման են ենթարկել բաժին, հոգեբանական և ֆիզկական բռնության են ենթարկել:  

Տեսանյութում Խաչատրյանի խոսքով՝ ինքը դիմել է Արցախի հանարապետության մարդու իրավուքների պաշտպանին՝ ներկայացնելով խնդիրը, սակայն վերջինս առաջարկել է հարցը լուծել անաղմուկ:

«Ասաց, որ դա քո իրավունք է, բայց լավ կլիներ, որ շատ աղմուկ չբարձրանար ԶԼՄ-ներով: Ասացի, գիտեմ, դա իմ իրավունք է: Ես նախընտրում եմ անել, ոնց որ ես գիտեմ: Էս պահին ես չգիտեմ ինչ անել, կախված է շարունակական դեպքերից: Ասաց՝ լավ: Պատմեցի ամեն ինչ: Տարիքս հարցրեց. 19 տարեկան եմ, և ասաց՝ եթե ուզենաս, էս  գործը շարունակություն տալուս ես, ընթացք տալու ես: Ասացի, որ պատրադիր: Ասաց, որ որոշես, ընթացք չես տալու, ինձ ասա, ես գնամ ոչ պաշտոնական ձևով իրանց վրա ջղանանամ: Հրաժարվեցի այդ ոչ պաշտոնական ճանապարհից, ասացի, որ ես ուղղակի նորմալ դատախազություն նամակ կուղարկեմ, փաստաբաններով այս հարցը կլուծեմ», – ասել է Խաչատրյանը: