Արդյո՞ք նոր օրինագծով հնարավոր կլինի երեխաներին խլե՞լ ընտանիքից

Վերջին շրջանում համացանցում թեժ քննարկաման թեմա է դարձել «Ընտանեկան բռնության կանխարգելման և ընտանեկան բռնության ենթարկված անձանց պաշտպանության մասին» օրենքի նախագիծը: Օրենքի ընդդիմախոսները պնդում են, որ  այն նպատակ ունի խարխլել հայ ընտանիքները:

Իրականում ի՞նչ է իրենցի ներկայացնում նոր նախագիծն ու արդյո՞ք այն ուղղված է ընտանիքները խարխլելուն,այն թույլ կտա՞ արդյոք երեխաներին խլել ընտանքիներից և վաճառել այլ անձնանց:  ShantNEWS-ը փորձել է գտնել օրինագծին առնչվող մի շարք հարցերի պատասխաները:  

Ի՞նչ է պատահել

Ընտանեկան բռնության կանխարգելման և ընտանեկան բռնության ենթարկված անձանց պաշտպանության մասին օրենքի նախագիծն  անցած տարի  նոյեմբերի 28-ին է հրապարակվել: Հենց հրապարակումից հետո  օրինագիծը մեծ աղմուկի պատճառ դարձավ: Ընդդիմախոսները պնդում էին, որ դա խարխլելու է ավանդական ընտանիքի հիմքերն ու արժեքները: Կրքերը կրկին բորբոքվեցին, երբ այս տարի կառավարությունը վերահրապարակեց օրինագիծը: 

Ո՞րն է նոր օրենք ունենալու հիմնավորումը

Ընտանեկան բռնության կանխարգելման և ընտանեկան բռնության ենթարկված անձանց պաշտպանության մասին ՀՀ օրենքի և հարակից օրենքների ընդունման  մասին կառավարության հիմնավորման մեջ նշվում է, որ  գործող օրենսդրությունն ունակ չէ համարժեք պատասխան տալ ծագած մարտահրավերներին և դրանով հնարավոր չէ ապահովել ընտանեկան բռնության իրական սպառնալիքի ներքո գտնվող անձանց անվտանգությունը և պաշտպանությունը: Հիմնավորման մեջ ընտանեկան բռնության տարածվածության վերաբերյալ պաշտոնական վիճակագրությունն է բերվում:

Կանանց դեմ ընտանեկան բռնության դեպքերի քանակը 2012-2016

Բացի այդ, հիմնավորման մեջ ասվում է, որ  ՀՀ քննչական կոմիտեի հրապարակած տվյալների համաձայն՝ 2015 թվականին ընտանեկան բռնության համատեքստում սպանությունները կազմում են հանրապետությունում գրանցված սպանությունների 17 տոկոսը:  Իսկ 2015 թվականի միայն առաջին կիսամյակում անչափահասների սեռական ազատության և սեռական անձեռնմխելիության դեմ ուղղված հանցագործությունների դեպքերով հարուցվել է 38 քրեական գործ, որոնցից 47 տոկոսը գործադրվել է ընտանիքի անդամի կողմից:  Նշենք, սրանք միայն պաշտոնական թվերն են, իսկ ոչ պաշտոնական թվերը, ենթադրվում է՝ ավելի բարձր են:

Օրենքը հնարավորություն կտա՞ երեխային խլել ընտանքից և վաճառե՞լ այլ անձանց

Օրինագծի ընդդիմախոսները օրինագծի մասին խոսելիս անընդհատ ընդգծում են այն փաստարկը, թե իբր «Ընտանեկան բռնության կանխարգելման և ընտանեկան բռնության ենթարկված անձանց պաշտպանության մասին» օրենքը հնարավորություն կտա  առանց դատարանի, առանց հիմնավորման երեխային ընտանքից խլել, ծնողներին՝ զրկելով ծնողական իրավունքից: Օրինագծի ընդդիմախոսներից մեկն անգամ պնդում է, թե երեխաներին խլելուց հետո, պետությունը նրանց վաճառելու է:  Այս պնդումը որևէ հիմանվորում չունի:

Ծնողին  ծնողական իրավունքից զրկելու մասին պնդումը ևս անհիմն է, քանի որ նման կետ օրինագծում նշված չէ:  «Հեռանկարի»-ն տված հարցազրույցի ընթացքում էլ Արդարադատության նախարար Դավիթ Հարությունը հերքել է ասվածը՝ նշելով, որ օրինագիծը նպատակ ունի կանխարգելել և պաշտպանել բռնության ենթարկված անձին:

Օրենքի ընդդիմախոսները այդ պնդումն անելիս օրինակներ են բերում, այն մասին, թե իբր արտասահմանում առանց դատական քննության, խնամակալության մարմնի ներկայացուցչի որոշմամաբ երեխային վերցնում են ընտանիքից: Խաչիկ Ստամբոլցյանն օրինագծի մասին խոսելիս անգամ  այսպիսի արտահայտություն էր արել՝  « Սատանան դուրս ա եկել մարդկության դեմ, դրա հետևում կանգնած են դիվային ուժեր», և ավելացրել, որ  ինքն ու իր համախոհները Սատանայի դեմ Աստծով են պայքարելու: