Վանաձորի բնակչի կողմից անձանց նյութապես շահագրգռելու, առցանց եղանակով խուլիգանություն կատարելու դեպքերի նախաքննությունն ավարտվել է

ՀՀ քննչական կոմիտեի Լոռու մարզային քննչական վարչությունում ավարտվել է Վանաձոր քաղաքի 38-ամյա բնակչի կողմից, հավաքին մասնակցելու նպատակով, անձանց նյութապես շահագրգռելու, տեղեկատվական կամ հաղորդակցական տեխնոլոգիաներն օգտագործելով խուլիգանություն կատարելու դեպքի առթիվ նախաձեռնված քրեական վարույթի նախաքննությունը:

Մասնավորապես՝ Վանաձոր քաղաքի 38-ամյա բնակչին առնչվող այլ քրեական վարույթի նախաքննության ընթացքում խուզարկություն է կատարվել նրա բնակության վայրում, որտեղից հայտնաբերվել և վերցվել են ձեռագիր գրառմամբ 5 ցուցակ՝ բազմաթիվ անձանց անուններով, որոնց դիմաց նշված են եղել տարբեր չափերի գումարներ:

Վարույթն իրականացնող մարմնի կողմից քննության առարկա է դարձել խուզարկությամբ հայտնաբերվածը, և դրա արդյունքում ձեռք բերված տվյալների հիման վրա, ՀՀ քրեական օրենսգրքի 236-րդ հոդվածի 2-րդ մասով, նախաձեռնվել է քրեական վարույթ։ Ավելի ուշ ևս մեկ քրեական վարույթ նախաձեռնվել է ՀՀ քրեական օրենսգրքի 297-րդ հոդվածի 2-րդ մասի 3-րդ կետով, որը, համատեղ, օբյեկտիվ և բազմակողմանի քննություն ապահովելու նպատակով, միացվել է նախորդիվ նշված քրեական վարույթին։

Քննությամբ պարզվել է, որ Վանաձորի հիշյալ բնակիչը, 2024թ․ ապրիլ ամսին Տավուշի մարզում սկսված և մայիսի 9-ից Երևան քաղաքում շարունակվող «Տավուշը հանուն հայրենիքի» շարժման հավաքներին մասնակցություն ապահովելու նպատակով, ինքնությունը դեռևս չպարզված մի շարք անձանց շահագրգռել է՝ տարբեր չափերի գումարներ տրամադրելով, իսկ ինքնությունը պարզված մեկ անձի խոստացել է օժանդակել «Վանաձորի բժշկական կենտրոն» ՓԲ ընկերությունում աշխատանքի ընդունվելու հարցում:

Վարույթի շրջանակներում կատարված անհրաժեշտ վարութային և ապացուցողական գործողություններով ձեռք բերված տվյալներով հիմնավորվել է նաև, որ Վանաձորի նշված բնակիչը տեղեկատվական տեխնոլոգիաներն օգտագործելով լրատվական կայքերից մեկին 2024թ․ մայիսի 21-ին տրված հարցազրույցում, հասարակության նկատմամբ անհարգալից, բարոյական նորմերի նկատմամբ բացահայտ արհամարհական վերաբերմունք ցուցաբերելով, հնչեցրել է Ոստիկանության ծառայողներին հասցեագրված անպարկեշտ արտահայտություններ՝ այդ կերպ անվանարկելով, վարկաբեկելով և նվաստացնելով նրանց:

Ձեռք բերված բավարար փաստերի հիման վրա՝ 38-ամյա տղամարդուն վերջնական մեղադրանք է ներկայացվել ՀՀ քրեական օրենսգրքի 297-րդ հոդվածի 2-ր մասի 3-րդ կետով և 236-րդ հոդվածի 2-րդ մասով:

Այս մասով առանձնացված և նախաքննությունն ավարտված վարույթի նյութերը, մեղադրական եզրակացությամբ, ուղարկվել են դատարան։

Խուզարկությամբ հայտնաբերված ցուցակներում նշված, հավաքներին մասնակցելու նպատակով նյութապես շահագրգռած, ինքնությունները դեռևս չպարզված անձանց մասով նախաքննությունը շարունակվում է։

Ծանուցում. Հանցանքի համար մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով դատարանի` օրինական ուժի մեջ մտած դատավճռով: